William Philip Schreiner
William Philip Schreiner was eerste minister van die Kaapkolonie en broer van die bekende skrywer Olive Schreiner.
Schreiner is in 1857 in die distrik Herschel in die Oos-Kaap gebore waar sy vader, eerw. Gottlob Schreiner, 'n Duitse sendeling was. Hy studeer aan die Suid-Afrikaanse Kollege en vir toelating tot die balie aan Cambridge. In 1882 rig hy 'n geslaagde regspraktyk in Kaapstad op.
Met sy toetrede tot die politiek het hy aanvanklik vir Cecil John Rhodes ondersteun en in sy kabinet as ouditeur-generaal gedien, maar na die Jameson-inval het die verhouding versuur en Schreiner word 'n leier van die Afrikanerbond. Hy dien van 1898 tot 1900 as eerste minister. In 1906 verdedig hy Dinizulu na die Zulu-opstand, word 'n senator na Uniewording en van 1914 tot sy dood in 1919 dien hy as Suid-Afrika se hoë kommissaris in Londen.
Bronne[wysig]
- Rosenthal, Eric., Encyclopaedia of Southern Africa; Kaapstad: Juta & Co, 1978.
