Tito Mboweni

Tito Mboweni
Mboweni by die Wêreld Ekonomiese Forum in 2011
Minister van Finansies
Ampstermyn 9 Oktober 2018 – 5 Augustus 2021
Vise	Mondli Gungubele
President	Cyril Ramaphosa
Voorafgegaan deur	Nhlanhla Nene
Opgevolg deur	Enoch Godongwana
8ste goewerneur van die Suid-Afrikaanse Reserwebank
Ampstermyn 8 Augustus 1999 – 8 November 2009
Voorafgegaan deur	Chris Stals
Opgevolg deur	Gill Marcus
Minister van Arbeid
Ampstermyn 1994 – 1999
President	Nelson Mandela
Voorafgegaan deur	nuwe pos
Opgevolg deur	Membathisi Mdladlana
Persoonlike besonderhede
Gebore	(1959-03-16)16 Maart 1959 Tzaneen, Transvaal, Suid-Afrika
Sterf	12 Oktober 2024 (op 65) Johannesburg, Suid-Afrika
Politieke party	African National Congress
Kind(ers)	3
Alma mater	Nasionale Universiteit van Lesotho Universiteit van Oos-Anglië

Tito Mboweni (16 Maart 1959 – 12 Oktober 2024) was 'n Suid-Afrikaanse politikus wat van 9 Oktober 2018 tot 5 Augustus 2021 as minister van finansies onder president Cyril Ramaphosa gedien het.

Tussen 1999 en 2009 het hy die pos as agtste goewerneur van die Suid-Afrikaanse Reserwebank beklee. Hy is op 8 Augustus 1999 in die pos aangestel om dr. Chris Stals op te volg. Me. Gill Marcus vervang hom as goewerneur op 9 November 2009. Hy het tussen 1994 en 1999 as minister van arbeid onder president Nelson Mandela gedien.

Mboweni was in Januarie 2019 teen die afskaffing van Afrikaans as onderrigtaal by die Universiteit van Pretoria gekant. In Julie 2019 het Mboweni aangekondig dat voorbereidings aan die gang is om 'n staatsbeheerde bank vir private kliënte te stig. Sodoende reageer hy op 'n versoek van die Ekonomiese Vryheidsvegters.

In Januarie 2020 het Mboweni die eerste lid van 'n Suid-Afrikaanse kabinet sedert die einde van apartheid geword wat voorgestel het dat Suid-Afrika en Lesotho as 'n federale staat verenig word. Reaksies op hierdie voorstel in beide lande was deels negatief en deels positief.

Biografie

Tito Mboweni is op 16 Maart 1959 as die jongste van drie kinders gebore. Hy het grootgeword in Tzaneen, nou in die Limpopoprovinsie, waar hy later ook lank geboer het.

Hy het aan die Universiteit van die Noorde studeer tussen 1979 en 1980, waar hy vir 'n baccalaureusgraad in handel ingeskryf het. Hy het nie sy studies voltooi nie en het Suid-Afrika in ballingskap in 1980 verlaat. In ballingskap in Lesotho het Mboweni by die African National Congress (ANC), later Suid-Afrika se regerende party, aangesluit en was 'n party-aktivis in baie hoedanighede. Hy het in 1985 'n baccalaureusgraad in ekonomie en politieke wetenskap aan die Nasionale Universiteit van Lesotho verwerf. In 1988 het hy 'n meestersgraad in ontwikkelingsekonomie aan die Universiteit van Oos-Anglië in Engeland verwerf.

Politieke loopbaan

Mboweni was van 1999 tot 2009 die agtste goewerneur van die Suid-Afrikaanse Reserwebank en die eerste swart Suid-Afrikaner wat die pos beklee het. Hy is ná die bedanking van Nhlanhla Nene op 9 Oktober 2018 as minister van finansies ingehuldig.

Sterwe

Mboweni is op 12 Oktober 2024 in 'n Johannesburgse hospitaal oorlede ná 'n kort siekbed. Hy was 65 jaar oud.

Eksterne skakels

• Wikimedia Commons het meer media in die kategorie Tito Mboweni.

Voorafgegaan deur Nhlanhla Nene	Minister van Finansies 2018–2021	Opgevolg deur Enoch Godongwana
Voorafgegaan deur Chris Stals	Goewerneur van die Suid-Afrikaanse Reserwebank 1999–2009	Opgevolg deur Gill Marcus
Voorafgegaan deur nuwe pos	Minister van Arbeid 1994–1999	Opgevolg deur Membathisi Mdladlana