Asteroïde

253 Mathilde is 'n asteroïde met 'n deursnit van ongeveer 50 km.

'n Asteroïde (soms ook asteroïed), ook bekend as 'n kleinplaneet of planetoïde, is 'n klein hemelliggaam in die Sonnestelsel wat om die Son wentel, veral in die binnenste Sonnestelsel, tussen Mars en Jupiter. Asteroïdes is kleiner as planete, maar groter as meteroïdes. Die term is in die geskiedenis gebruik om na hemelliggame te verwys wat in die binnenste Sonnestelsel voorkom, siende dat die buitenste Sonnestelsel hoofsaaklik onbekend was met die ingebruikneming van die woord. Die verskil tussen 'n asteroïde en 'n komeet hang van die voorkoms af: komete het 'n duidelik sigbare koma, terwyl geen koma by asteroïdes sigbaar is nie.

Daar is meer as 300 000 asteroïdes bekend. Die grootste het 'n deursnit van byna 1000 km groot, terwyl die kleinstes slegs 10 m in deursnit is (indien die deursnit minder as 10 m is, word dit as 'n meteoroïde beskou). Asteroïdes is dikwels rotsagtige hemelliggame, maar sommige bevat ook yster en nikkel en sommige van dié wat ver van die Son af is bestaan uit ys.