Die artikel beskryf ’n sportgebeurtenis wat in die toekoms gaan plaasvind. Die inligting is moontlik spekulatief en kan vinnig verander soos data beskikbaar raak.
Die Rugbywêreldbeker 2027 (Engels: 2027 Rugby World Cup) word van 1 Oktober tot 13 November 2027 in Australië beslis. Dit is die elfde rugbywêreldbekertoernooi van die vierjaarlikse rugbywêreldkampioenskap wat deur Wêreldrugby aangebied word en die vyfde in die Suidelike Halfrond. Australië het met Nieu-Seeland die eerste Rugbywêreldbeker 1987 saam gehuisves, asook die Rugbywêreldbeker 2003 op sy eie. In Mei 2022 is dié land deur Wêreldrugby as gasheer aangewys, nadat dit die enigste oorblywende bod was.
Die Rugbywêreldbeker 2027 is die eerste toernooi met 24 deelnemende nasionale rugbyspanne, teenoor die 20 van die vorige ses rugbywêreldbekertoernooie.[1] Die 24 deelnemende nasionale rugbyspanne is: die twaalf regstreekse kwalifiseerders van die 2023-toernooi (Argentinië, Australië, Engeland, Fidji, Frankryk, Ierland, Italië, Japan, Nieu-Seeland, Skotland, Suid-Afrika en Wallis), saam met die twaalf beste spanne van die kwalifisering (Chili, Georgië, Hongkong, Kanada, Portugal, Roemenië, Samoa, Spanje, Tonga, Uruguay, die Verenigde State en Zimbabwe). Hongkong neem vir die eerste keer aan ’n rugbywêreldbekertoernooi deel, waarmee dit die eerste rugbywêreldbekertoernooi is waaraan twee Asiatiese spanne deelneem. Zimbabwe het vir die eerste keer sedert 1991 weer gekwalifiseer, terwyl Namibië vir die eerste keer sedert 1999 ’n toernooi versuim. Vir beide Chili en Portugal is dit die tweede agtereenvolgende toernooideelname. Spanje het vir die eerste keer sedert 1999 daarin geslaag om te kwalifiseer, waardeur vir die eerste keer tien Europese spanne deelneem. Daarbenewens is dit die eerste toernooi waaraan vyf spanne van die Amerikas en vier Spaanstalige lande deelneem.
Tydens die Rugbywêreldbeker 2027 sal 52 wedstryde gespeel word, waaronder 36 tydens die groepfase en 16 tydens die uitklopfase, insluitende die eindstryd. Die toernooi sal op 1 Oktober met die openingswedstryd tussen die gasheer Australië en Nieu-Seeland afskop. Die spanne is in ses groepe van vier elk verdeel, waarvan elke span een keer teen al die ander spanne in die groep sal speel. Die twee beste spanne van elke groep en vier beste derdeplek-spanne sal hierna vir die uitklopfase kwalifiseer. Vir die eerste keer sal ’n agtste eindrondte gespeel word, waarna die wêreldkampioen in die uitklopfase bepaal word.[2][1] Die Suid-AfrikaanseSpringbokke is die verdedigende kampioen nadat hulle in 2023 hul vierde titel ingepalm het.
Kaart van die kandidaatlande vir die Rugbywêreldbeker 2027
Wêreldrugby het die gasheerlande van beide die 2027- en 2031-manstoernooie en beide die 2025- en 2029-vrouetoernooie op 12 Mei 2022 aangekondig. Die proses om met voornemende lande te onderhandel het in Februarie 2021 begin en die formele kandidaatproses drie maande later. Die oorblywende gasheerlande is in Februarie 2022 aangekondig.[3]
Wêreldrugby se destydse voorsitter Bill Beaumont het in laat 2018 voorgestel dat die gasheer van die Rugbywêreldbeker ná die 2023-toernooi in Frankryk ’n opkomende land behoort te wees.[4] Wêreldrugby se hoof- uitvoerende beampte Brett Gosper het in 2019 ook voorgestel dat Wêreldrugby beide die 2027- en 2031-toernooie saam sal toewys (soos hulle met Engeland 2015 en Japan 2019 gedoen het), waardeur hulle “’n dapper besluit en ’n tradisionele besluit” sal kan maak.[5] Gosper het verder voorgestel dat “2031 tyd sal gun vir ’n Amerikaanse bod om baie geloofwaardig en sterk te wees.”[5] Die gashere vir die 2027- en 2031-toernooie is in Mei 2022 bekend gemaak.[6]
Die feit dat drie agtereenvolgende toernooie (Engeland 2015, Japan 2019 en Frankryk 2023) in die Noordelike Halfrond beslis is, het die lande in die Suidelike Halfrond se posisie versterk.[7]
Tot in Junie 2019 het drie lande – Argentinië, Australië en Rusland – aangekondig dat hulle die Rugbywêreldbeker 2027 wil aanbied.[8][9] Vermoede het bestaan dat beide die Verenigde State en Suid-Afrika beplan het om die toernooi te huisves, maar die Suid-Afrikaanse Rugbyunie (SARU) het bekend gemaak dat hulle nie beplan om vir nóg die 2027- nóg die 2031-toernooi aansoek te doen nie.[10] Argentinië het sy bod in April 2020 teruggetrek om die Australiese bod te versterk, waarvolgens daar twee kandidaatlande oor was.[11] Op 10 Junie 2021 is VSA Rugby amptelik aanvaar as ’n kandidaat vir beide die 2027- en 2031-toernooie, asook die Vrouerugbywêreldbeker 2029.[12] Tydens ’n spesiale vergadering van Wêreldrugby wat op 12 Mei 2022 in Dublin gehou is, het Wêreldrugby die toernooie van 2025 tot 2033 toegewys met die Vrouerugbywêreldbeker 2025 wat aan Engeland toegeken is, Australië as gasheer van beide die Rugbywêreldbeker 2027 en Vrouerugbywêreldbeker 2029 benoem is en beide die Rugbywêreldbeker 2031 en Vrouerugbywêreldbeker 2033 aan die Verenigde State toegewys is.[13] Daarmee is dit ná die Rugbywêreldbeker 1995 in Suid-Afrika, die Rugbywêreldbeker 2003 in Australië, die Rugbywêreldbeker 2011 in Nieu-Seeland, die Rugbywêreldbeker 2019 in Japan en die Rugbywêreldbeker 2023 in Frankryk die sesde rugbywêreldbekertoernooi wat geheel en al in een land aangebied word. Saam met die T20I-wêreldbeker 2028, wat Australië saam met Nieu-Seeland sal huisves, is dit een van twee vername toernooie wat Australië binne een jaar sal aanbied.
Argentinië het op 5 Oktober 2016 aangekondig dat dit vir die Rugbywêreldbeker 2027 sal aansoek doen, maar sy aansoek in April 2020 teruggetrek. Argentinië het dié toernooi nog nooit gehuisves nie en Wêreldrugby se voorsitter Bill Beaumont het aangekondig dat hy aansoeke van lande soos Argentinië sou ondersteun.[15] Argentinië is die enigste land wat die halfeindstryd van ’n rugbywêreldbekertoernooi gehaal het, maar nog nooit wedstryde van dié toernooi aangebied het nie.[16] In April 2020 het Argentinië sy aansoek teruggetrek om die Australiese aansoek ’n hupstoot te gee, waarvolgens Australië die gunstelinggasheer vir die Rugbywêreldbeker 2027 was.[11][17]
Stanislaf Droezhinin van die Russiese Rugbyunie het op 31 Mei 2019 aangekondig dat Rusland vir die Rugbywêreldbeker 2027 sal aansoek doen. Rusland wou van sy FIFA Sokker-Wêreldbekertoernooi in 2018-stadions vir dié toernooi gebruik.[18][19] Die Russiese President Wladimir Poetin het Rusland se aansoek vir die Rugbywêreldbeker 2027 ondersteun.[20] Die Russiese Rugbyunie kon nie met sy aansoek voortgaan nie aangesien CAS op 17 Desember 2020 Rusland vir twee jaar verbied het om enige belangrike sporttoernooi aan te bied.[21]
Grafiek van die kwalifiseringsproses vir die Rugbywêreldbeker 2027
Wêreldrugby het op 13 Augustus 2024 die kwalifiseringsproses vir die toernooi gespesifiseer. Vervolgens is van 2024 tot 2025 twaalf van die 24 plekke van die toernooi tydens die kwalifisering beslis. Die kwalifiseringstoernooi is in vyf streeksgroepe verdeel: Afrika, Asië, Europa, Suid-Amerika en Noord-Amerika saam met Oseanië. Vier plekke is vir die nasionale spanne van Europa gereserveer, drie vir Oseanië asook een elk vir Afrika, Asië en Suid-Amerika. Die twee oorblywende plekke is tydens ’n interkontinentale kwalifiseringsrondte (uitspeel tussen Oseanië en Suid-Amerika) en ’n uitspeelrondte (Repechage) tussen al die vastelande beslis.[22] Asië het vir die eerste keer ooit oor sy eie regstreekse plek beskik en aangesien Japan reeds vir die toernooi gekwalifiseer het, sou een span van dié vasteland vir die eerste keer ooit vir ’n rugbywêreldbekertoernooi kwalifiseer.[23] As die regstreekse klassifiseerders getel word, het 58 spanne in aanmerking vir kwalifisering vir die finale toernooi in Australië gekom.
Daar was lank beplan om die aantal deelnemers van 20 tot 24 te verhoog, waarop op 24 Oktober 2023 amptelik besluit is.[2][1] Naas die gasheer Australië, wat ook deur sy derde plek in die groepfase van die Rugbywêreldbeker 2023 gekwalifiseer het, het ook die agt deelnemers aan die kwarteindrondte en ander drie derdeplek-spanne van die 2023-groepfase vir die Rugbywêreldbeker 2027 gekwalifiseer. Die volgende twaalf spanne het regstreeks vir die Rugbywêreldbeker 2027 gekwalifiseer: Suid-Afrika as verdedigende kampioen, Nieu-Seeland as naaswenner, Engeland as derde plek, Argentinië as halfeindrondtespan, die spanne van die kwarteindrondte Fidji, Frankryk, Ierland en Wallis, asook die derde plekke van die groepfase Australië, Italië, Japan en Skotland.[24]
Die kwalifiseringsproses het tydens die Asiatiese Rugbykampioenskap op 30 April 2024 afgeskop. Weens die voortgesette Russiese inval in Oekraïne sedert 2022 het Rusland se skorsing deur beide Wêreldrugby en Rugby Europa bly voortbestaan.[25] Op 9 Februarie 2025 het Georgië, Portugal, Roemenië en Spanje die vier Europese plekke bespreek.[26] Op 5 Julie 2025 het Hongkong die Asiatiese Rugbykampioenskap 2025 beklink en as Asië 1 vir die eerste keer ooit vir ’n rugbywêreldbekertoernooi gekwalifiseer.[27] In dieselfde maand het Zimbabwe die Afrikabeker 2025 gewen en vir die eerste keer sedert 1991 weer vir ’n rugbywêreldbekertoernooi gekwalifiseer.[28] Aan die begin van September 2025 het Kanada en Tonga tydens die Stille Oseaan-nasiesbeker, asook Uruguay tydens die Suid-Amerikaanse kwalifisering hulle plekke bespreek.[29] Een week later het die Verenigde State gevolg.[30] Aan die einde van September 2025 het Chili vir sy tweede agtereenvolgende rugbywêreldbekertoernooi gekwalifiseer.[31] Die 24ste en laaste plek is in November 2025 tydens die uitspeelrondte tussen België, Brasilië, Namibië en Samoa beslis, waartydens Samoa met ’n 13–13-gelykop in die laaste wedstryd teen België vir die tiende keer vir ’n rugbywêreldbekertoernooi gekwalifiseer het.[32] Aanvanklik het Paraguay glo die uitspeelrondte gehaal, maar nadat die Paraguaanse beheerliggaam kennis geneem het van ’n ongeskikte speler, het die Paraguane hulleself vrywillig onttrek en hul plek aan die Brasiliane oorhandig.[33]
Die volgende 16 spanne het reeds vir die Rugbywêreldbeker 2027 gekwalifiseer. Aangesien ses Europese spanne regstreeks vir die 2027-toernooi kon kwalifiseer en Europa in die kwalifisering oor vier plekke beskik het, neem vir die eerste keer tien spanne van dié vasteland aan ’n rugbywêreldbekertoernooi deel. Dit is die eerste toernooi waaraan Hongkong deelneem, waardeur vir die eerste keer twee Asiatiese nasionale spanne sal verskyn. Voorheen het die Hongkongse vrouespan vir die Vrouerugbywêreldbeker 2017 gekwalifiseer.[34] Spanje het vir die eerste keer sedert 1999 vir ’n toernooi gekwalifiseer en Zimbabwe het laas in 1991 aan ’n rugbywêreldbekertoernooi deelgeneem; sowel Chili as Portugal het vir die eerste keer agtereenvolgende toernooie gehaal. Beide Kanada en die Verenigde State keer na die toernooi terug, nadat albei nasionale spanne nie vir die 2023-toernooi kon kwalifiseer nie. Nadat Chili ook gekwalifiseer het, neem vir die eerste keer vyf spanne van die Amerikas aan ’n rugbywêreldbekertoernooi deel.[35] Daarbenewens is dit die eerste toernooi waaraan vier Spaanstalige lande deelneem. Daarteenoor het Namibië vir die eerste keer sedert 1999 versuim om te kwalifiseer en hulle is die enigste span van die vorige toernooi wat in die kwalifisering uitgeskakel is.[36] Beide Chili en Portugal het daarin geslaag om vir hul tweede agtereenvolgende rugbywêreldbekertoernooi te kwalifiser.
Spanne wat aan die kwalifiseringstoernooi deelgeneem en die wat regstreeks gekwalifiseer het; altesaam 58 spanne het deelgeneem.
Agt plekke in sewe Australiese stede is vir die Rugbywêreldbeker 2027 gekies.[37] Die openingsseremonie en -wedstryd sal op die Perth-stadion in Perth gehou word, terwyl die halfeindrondte, die bronseindstryd en die eindstryd op die Stadium Australia in Sydney beslis sal word.[38]
Vroeg in Januarie 2025 is daar berig dat die deelstaat Victoria geen wedstryde sal huisves nie, nadat dié deelstaat se regering sy bod teruggetrek het in protes teen Rugby Australia se herroeping van die Melbourne Rebels uit die Superrugby-toernooi.[39] Die volledige lys gasheerstede is later in Januarie bekend gemaak nadat daar bevestig is dat die deelstaat Victoria wél wedstryde in Melbourne sal huisves.[40][41] In Januarie 2026 is die Docklands-stadion as Melbourne se plek bevestig.[42] Daar is berig dat Wêreldrugby ’n ooreenkoms gesluit het om wedstryde op dié stadion te huisves, terwyl die Melbourne-krieketveld se beskikbaarheid in Oktober 2027 nie gewaarborg kon word nie weens ’n ooreenkoms tussen die Victoria-regering en die Nasionale Voetballiga (NFL).[43]
Die Rugbywêreldbeker 2027 sal oor 44 dae tussen 24 verskillende spanne oor 52 wedstryde beslis word. Dit sal op 1 Oktober 2027 met die openingswedstryd tussen die gasheer Australië en Hongkong afskop. Die toernooi sal op 13 November op die Stadium Australia in Sydney eindig met die eindstryd, waartydens die wenner die Webb Ellis-beker sal inpalm.
Die wedstrydskedule is op 2 Februarie 2026 deur Wêreldrugby bekendgemaak.[44] Die volgende tabel dui die Rugbywêreldbeker 2023 se daaglikse program aan. ’n Rooi blokkie dui op beide die openings- en sluitingseremonie, ’n pers blokkie op wedstryde tydens die groepfase, ’n groen blokkie op wedstryde tydens die uitklopfase, ’n blou blokkie op die bronseindstryd en ’n geel blokkie op die eindstryd.
Die loting vir die Rugbywêreldbeker 2027 het op 3 Desember 2025 in Sydney se 1 Denison Street plaasgevind
In September 2025 het Wêreldrugby die formaat vir die loting op 3 Desember 2025 bevestig.[45] Vir die eerste keer het die loting plaasgevind nadat al die deelnemende spanne vir die toernooi gekwalifiseer het. Vir die loting is die 24 deelnemende spanne in vier groepe verdeel. Die loting het op 3 Desember 2025 in Sydney se 1 Denison Street plaasgevind. Die loting het geskied na aanleiding van die Wêreldrugby-ranglys soos op 1 Desember 2025, ná die eindjaarrugbytoetsreeks gedurende Novembermaand.[46] Vir die loting is die 24 deelnemende spanne in vier groepe verdeel:
Groep 1: Die ses beste gekeurde spanne
Groep 2: Die ses naasbeste gekeurde spanne
Groep 3: Die ses naasbeste gekeurde spanne
Groep 4: Die ses laagste gekeurde spanne
Dit beteken dat die 24 gekwalifiseerde spanne soos volg gekeur is (volgens hul plek op die wêreldranglys op 1 Desember 2025):
Al die 24 gekwalifiseerde spanne was op 1 Desember 2025 onder die 25 beste spanne op die wêreldranglys. Die enigste ontbrekende span was België wat in die 21ste plek was.[47]
Ná die loting op 3 Desember 2025 lyk die groepe soos volg:[48]
Die 24 spanne wat vir die Rugbywêreldbeker 2027 gekwalifiseer het, is in ses groepe verdeel. Die groepe is verdeel van Groep A tot Groep F en elke groep bestaan uit vier spanne. Elke groep bevat twee regstreekse kwalifiseerders van die Rugbywêreldbeker 2023 met die ander twee plekke wat deur twee kwalifiseerende spanne aangevul is. Elke land sal een keer teen elke ander span in sy groep gespeel: elke land sal dus drie wedstryde tydens die groepfase speel.
Klassifisering binne elke groep sal gegrond wees op die volgende puntestelsel:
vier wedstrydpunte vir ’n oorwinning;
twee vir ’n gelykopuitslag;
geen vir ’n nederlaag;
Een bonuspunt vir die druk van vier of meer drieë, of ’n nederlaag met sewe punte of minder.[49]
Bonuspunte wat bydra tot spanne se versamelde wedstrydpuntetelling sal toegeken word in elkeen van die volgende omstandighede (een wedstrydpunt vir elke geval):
’n span druk vier of meer drieë (ongeag van die wedstryduitslag);
’n span verloor met sewe punte (’n verdoelde drie) of minder.[49]
Aan die einde van die groepfase sal die spanne gerangskik word van die eerste na die vierde posisie, gegrond op versamelde wedstrydpunte, met die twee beste spanne en vier beste derdeplek-spanne wat na die agtste eindrondte sal deurdring. As twee of meer spanne ewe veel punte sal behaal, sal ’n kriteriastelsel gebruik word om te bepaal watter span ’n hoër rang het. Die kriteriastelsel sal berus op ’n gedetailleerde analise van die wedstryde waaraan die spanne deelgeneem het. As geen uitslag met die stelsel bereik kan word nie, sal die span wat die hoër rang op die amptelike ranglys van Wêreldrugby het die hoër rang toegeken word.[49]
Van die begin van dié fase af sal die toernooi ’n uitklopformaat aanneem wat uit 16 wedstryde bestaan: agt agtste eindstryde, vier kwarteindstryde, twee halfeindstryde, ’n derdeplekwedstryd en die eindstryd.
Die twee beste spanne en vier beste derdeplek-spanne sal na die uitklopfase deurdring. Elke wedstryd in die uitklopfase moet met ’n oorwinning vir een van die spanne eindig. As daar ná tagtig minute van gewone spel ’n gelykopuitslag is, sal daar verder gespeel word om te bepaal wie die wenner is. Aanvanklik sal daar twee periodes van ekstra tyd gespeel word, tien minute in elke rigting: as daar dan steeds geen wenner is nie, sal daar vir tien minute gespeel word in ’n uitklopformaat, waar die eerste span wat daarin slaag om punte aan te teken, sal wen. As daar steeds nie ’n wenner is ná 110 minute nie sal die wenner bepaal word deur ’n stelskopkompetisie.[49]
Altesaam 2,5 miljoen kaartjies sal vir die Rugbywêreldbeker 2027 in drie fases verkoop word. Die eerste-fase-kaartjies is op 18 Februarie 2026 vrygestel.[50] Op 4 Maart 2026 het Wêreldrugby aangekondig, dat tydens die eerste fase reeds sowat 750000 van die 2,5 miljoen kaartjies verkoop is.[51]
↑Benewens regstreekse kwalifisering as gevolg van sy prestasie in 2023 is Australië die gasheer en sou die land op grond daarvan ook gekwalifiseer het.
Australië
_participating_nations.svg)
Australië
Argentinië
Engeland
Fidji
Frankryk
Ierland
Italië
Japan
Nieu-Seeland
Skotland
Suid-Afrika
Wallis
Georgië
Spanje
Roemenië
Portugal
Hongkong
Zimbabwe
Tonga
Kanada
Uruguay
Verenigde State
Chili
Samoa
.jpg)
.jpg)
