Pous Callixtus I

Pous Callixtus I
Geboortenaam	Callixtus of Callistus
Pontifikaat begin	217
Pontifikaat eindig	14 Oktober 222
Voorganger	Zefirinus
Opvolger	Urbanus I
Gebore	155 Griekeland
Sterf	14 Oktober 222 Rome, Italië
Ander pouse genaamd Callixtus

Sint Pous Callixtus I
Gebore	155, Griekeland
Sterfte	14 Oktober 222, Rome, Italië
Vereer in	Rooms-Katolieke Kerk
Feesdag	14 Oktober
Beskermheilige	Begraafplaaswerkers

Callixtus I was die sestiende pous van die Rooms-Katolieke Kerk.

Biografie

Standbeeld van Pous Callixtus I in die Katedraal van Reims

Pous Callixtus I (ook Calixtus of Calistus) is waarskynlik gebore in 155 in 'n Griekse slawefamilie en het in Trastevere, 'n woonwyk in Rome aan die Tiber se regteroewer, groot geword. Hy sterf op 14 Oktober 222. Die naam Callixtus beteken “die mooiste”. In 217 volg hy Pous Zefirinus op en word na sy dood opgevolg deur Pous Urbanus I. Hy was pous tydens die bewind van die Romeinse keisers Heliogabalus en Alexander Severus.

Sy teenstander Hippolitus beskryf sy jeug. Callixtus was as jong slaaf die bestuurder van 'n bank, maar het geld verloor. Hy het uit Rome gevlug, maar is by die see naby Portus gevang en na sy meester Carpophorus in Rome teruggestuur. Sy krediteure het egter gevra dat hy vrygelaat moet word in die hoop dat hy genoeg geld sou verdien om hulle terug te betaal. Callixtus is egter gearresteer toe hy in 'n sinagoge met Joodse geldskieters baklei het. Weens sy geloof is hy na die soutmyne van Sardinië gestuur. Op voorspraak van Marcia, 'n minnares van die keiser Commodus is hy saam met ander Christene in 190 vrygelaat. Omdat sy gesondheid sleg was het Pous Victor I hom onderdak verskaf.

Pous Callixtus gee sy naam aan die Callixtus katakombe langs die Via Appia. Hy is daar begrawe en na hom is alle pouse tot Pous Eutichianus daar begrawe met die uitsondering van Pous Cornelius. Die katakombe was vergeet en verlore totdat dit in 1849 deur die argeoloog Giovanni Battista de Rossi herontdek is. Dit staan tans bekend as die Capello dei Papi. Volgens die legende sterf Callixtus self deurdat hy in 'n put gegooi is by die Santa Maria kerk in Trastevere.

Pontifikaat

Een van sy belangrikste besluite was dat alle sondes vergewe kan word, ook moord, owerspel en verkragting. Dit het gelei tot 'n kerkskeuring (skisma) waarby die eerste teenpous, Pous Hippolitus gekies is.

Verering

Callixtus word as martelaar en heilige vereer in die Rooms-Katolieke Kerk veral in Todi (Italië). Sy relieke word in verskeie kerke aangehou, onder andere in Cysoing by Doornik, Reims, Fulda, Napels en Rome. Sy feesdag is sy sterfdag 14 Oktober.

Bronne

• Catholic Encyclopedia 1908: "Pope St. Callistus"
• Encyclopaedia Britannica: Saint Calixtus I

Eksterne skakels

• CE Inskrywing in die Catholic Encyclopedia (Engels)

• BBKL Inskrywing (met Literatuurverwysings) in die Biographisch-Bibliographisches Kirchenlexikon (Duits)
• Ökumenisches Heiligenlexikon

Nota

Saamgestel uit die Nederlandse, Engelse, Duitse en Franse Wikipedias.

Opvolging

Voorafgegaan deur Zefirinus

Biskop van Rome 217 – 222

Opgevolg deur Urbanus I