Kanaän

in Wikipedia, die vrye ensiklopedie
Spring na: navigasie, soek
’n Kaart uit 1692 van Kanaän, deur Philip Lea.

Kanaän (Noordwes-Semities: knaʿn; Hebreeus: כנען, Knaʿn; Masoreties: כְּנָעַן, Kənā'an) was in die laat 2de millennium v.C. ’n streek in die Antieke Nabye-Ooste. Volgens beskrywings in die Bybel het dit min of meer met die Levant ooreengestem, veral die suidelike dele (Israel en Palestina) waar die vertellings in die Hebreeuse Bybel afspeel.

Geskiedenis[wysig | wysig bron]

Die land Kanaän van 600 v.C. word in die Bybel veral in Genesis 10 en Numeri 34 beskryf, waar dit strek van Libanon suidwaarts oor Gasa na Egiptespruit en ooswaarts na die Jordaanvallei, insluitend die huidige Israel en Palestina. Voor dié tyd het die ou Kanaän ’n nog groter gebied beslaan, maar presiese beskrywings ontbreek.

Die term "Kanaäniete" is die etniese term wat die meeste in die Bybel gebruik word,[1] en hulle word gewoonlik beskryf as ’n volk wat uitgewis is.[2]

Baie eeue later is bewys die naam "Kanaäniete" verwys na die volk wat vanaf omstreeks 500 v.C. aan die Antieke Grieke bekend was as die Fenisiërs,[2] en ná die emigrasie van Kanaänitiessprekendes na Kartago is dit ook in die laat antieke tyd deur die Puniërs as ’n naam vir hulself gebruik. Dit weerspieël die latere gebruik van die naam in die Bybel, soos aan die einde van Sagaria, waar dit vermoedelik verwys na ’n klas handelaars of na nie-monoteïstiese aanbidders in Israel of die naburige Sidon en Tirus.

Kanaän was van aansienlike geopolitieke belang in die Armana-tydperk van die laat Bronstydperk as die gebied waar die belangesfere van die Egiptenare, Hetiete en Assiriërs ineengeloop het. ’n Groot deel van die moderne kennis oor Kanaän is verkry uit argeologiese opgrawings in dié gebied op plekke soos Tel Hazor, Tel Megiddo en Gezer. Die staat Ugarit (in hedendaagse Sirië) van die laat Bronstydperk word argeologies beskou as wesenlik Kanaänities,[3] al behoort die taal Ugarities nie tot die Proto-Kanaänitiese groep nie.[4][5][6]

Verwysings[wysig | wysig bron]

  1. William G. Dever, Who Were the Early Israelites and Where Did They Come From?, bl. 219
  2. 2,0 2,1 Drews, Robert (1998), "Canaanites and Philistines", Journal for the Study of the Old Testament 81: 39–61
  3. Tubb, Jonathan N. (1998), "Canaanites" (British Museum People of the Past)
  4. Woodard, Roger (2008), The Ancient Languages of Syria-Palestine and Arabia .
  5. Naveh, Joseph (1987), "Proto-Canaanite, Archaic Greek, and the Script of the Aramaic Text on the Tell Fakhariyah Statue", in Miller; et al, Ancient Israelite Religion .
  6. Coulmas, Florian (1996). The Blackwell Encyclopedia of Writing Systems. Oxford: Blackwell. ISBN 0-631-21481-X.