Nelspruit

vanuit Wikipedia, die vrye ensiklopedie.

Nelspruit
Panoramiese uitsig oor Nelspruit vanuit die bergtoppe
Land:	Suid-Afrika
Provinsie:	Mpumalanga
Distriksmunisipaliteit:	Ehlanzeni
Koördinate:	25°28′S 30°59′O Koördinate: 25°28′S 30°59′O
Stigting:	1905
Bevolking:	221 474 (2000)

Nelspruit is die hoofstad en een van die grootste stede van Mpumalanga, Suid-Afrika. Die stad is die sentrum van 'n landbougebied wat onder meer op subtropiese en sitrusvrugte steun. Nelspruit self het sowat 24 000 inwoners, terwyl die voorstede en die Swart woonbuurte KaNyamazane, Msogwaba, Mpakeni en Matsulu 'n gesamentlike inwonertal van meer as 200 000 het.

Nelspruit is 'n pragtige dorp, omring deur heuwels, en sy strate word deur flamboyant-bome gesoom. Benewens die hitte staan Nelspruit bekend vir sy dodekaeder, 'n twaalfkantige watertoring op 'n hoë koppie in die Steiltes-woonbuurt. Die botaniese tuin van Nelspruit beskik oor 'n groot versameling plante, wat die grootste deel van die Laeveld se flora verteenwoordig.

Die dorp is gestig in 1905, en is vernoem na drie broers Nel wat vroeë inwoners van die dorp was. Nelspruit het vir lank in die skadu van Barberton gestaan, maar is vandag 'n lewendige, vooruitstrewende stad, heelwat groter as Barberton.