Rossmore

in Wikipedia, die vrye ensiklopedie
Rossmore
Rossmore is in Gauteng
Rossmore
Rossmore
 Rossmore se ligging in Gauteng
Koördinate: 26°11′0″S 27°59′40″O / 26.18333°S 27.99444°O / -26.18333; 27.99444Koördinate: 26°11′0″S 27°59′40″O / 26.18333°S 27.99444°O / -26.18333; 27.99444
LandVlag van Suid-Afrika Suid-Afrika
ProvinsieGauteng
MunisipaliteitStad Johannesburg
HoofplekJohannesburg
Stigting9 September 1925
Oppervlak
 • Totaal1,16 km2 (0,45 vk. myl)
Bevolking
 (2011)[1]
 • Totaal1 539
 • Digtheid1 327/km2 (3 440/vk. myl)
Rasverdeling (2011)
 • Wit mense9,2%
 • Indiërs/Asiërs3,8%
 • Bruin mense7,7%
 • Swart mense77,1%
 • Ander2,2%
Taal (2011)
 • Engels 21,1%
 • Zoeloe 20,2%
 • Tswana 11,6%
 • Afrikaans 10,1%
 • Ander 37,0%

Rossmore is ’n voorstad van Johannesburg, sowat 5 km noordwes van die stadsaal geleë.

Rossmore is verdonker op dié straatkaart van Johannesburg van 1929. High Street suid van Brixton het die grens gevorm tussen die plase Braamfontein, waarop Rossmore uitgelê is, en Middelfontein, 'n wigvormige plaas noord van Langlaagte.

Rossmore beslaan sowat 1 km² en word begrens deur Westdene in die noordweste, Melville in die noorde, Auckland Park in die ooste, Brixton in die suide en Hurst Hill in die suidweste. Die grootste deel van die voorstad word in beslag geneem deur die Kingsway-kampus van die Universiteit van Johannesburg, die Helen Joseph-hospitaal en die skoolterrein van die Hoërskool Vorentoe. Net in die ooste weerskante van Chiselhurstrylaan en in die noorde aan die suidwestelike punte van St. Swinthins- en Aucklandlaan is enkele woonhuise, in laasgenoemde geval besonder oud.

Rossmore is uitgelê op die plaas Braamfontein en op 9 September 1925 geproklameer. Die naam is gegee ter ere van lord Rossmore se enigste dogter, Mary Westenra, die tweede vrou van die mynmagnaat sir Abe Bailey.

Die voorstad het vroeër jare ’n goeie balans tussen Afrikaans- en Engelssprekende inwoners gehad. Volgens die munisipale kieserslys van 1934 was hier toe 108 Afrikaanse en 117 Engelse kiesers. In 1949 was dit 193 en 270 en in 1961 235 en 264.

Die verandering van die Randse Afrikaanse Universiteit na die Universiteit van Johannesburg, het nie net die aard van dié instelling se studentekorps van wit en Afrikaans na swart en Engels of Zoeloe en ander swart tale verander nie, maar ook die profiel van Rossmore se bewoners: In 2001 was 502 (69,9%) van hulle wit en 413 (57,4%) Afrikaans. Vir die 2011-sensus is die Helen Joseph-hospitaal by Rossmore ingereken. Toe was 77,1% (1 187) van die inwoners swart en net 141 (9,2%) wit. Afrikaans het teruggesak na die vierde plek met 117 (10,1%) moedertaalsprekers, vergeleke met 245 (21,1%) Engels, 235 (20,2%) Zoeloe en 135 (11,6%) Tswana.

Bronne[wysig | wysig bron]

  • (en) Raper, Peter Edmund. 2004. New Dictionary of South African Place Names. Johannesburg & Cape Town: Jonathan Ball Publishers
  • (af) Stals, prof. dr. E.L.P (red.). 1978. Afrikaners in die Goudstad. Deel 1. 1886 - 1924. Kaapstad en Pretoria: HAUM.

Verwysings[wysig | wysig bron]

  1. 1,0 1,1 1,2 1,3 "Subplek Rossmore". Sensus 2011.