Denver, Johannesburg

in Wikipedia, die vrye ensiklopedie
Jump to navigation Jump to search
Denver
Ligging van Denver op 'n kaart (Gauteng)
Denver
Denver
 Denver se ligging in Gauteng
Koördinate: 26°12′25″S 28°06′05″O / 26.20694°S 28.10139°O / -26.20694; 28.10139Koördinate: 26°12′25″S 28°06′05″O / 26.20694°S 28.10139°O / -26.20694; 28.10139
Land Vlag van Suid-Afrika Suid-Afrika
Provinsie Gauteng
Munisipaliteit Stad Johannesburg
Hoofplek Johannesburg
Oppervlak[1]
 - Voorstad 1,81 km²  (0,7 vk m)
Bevolking (2011)[1]
 - Voorstad 7 257
 - Digtheid 4 009/km² (10 383,3/myl2)
Rasverdeling (2011)[1]
 • Blank 0,3%
 • Indiër/Asiër 0,3%
 • Kleurling 0,3%
 • Swart 97,9%
 • Ander 1,2%
Taal (2011)[1]
 • Zoeloe 80,0%
 • Suid-Ndebele 3,4%
 • Xhosa 2,5%
 • Engels 2,3%
 • Ander 12,0%
Vanaf die Scottish Horse-gedenkteken in Kensington gesien, is Belgravia regs op die voorgrond en Denver die nywerheidsgebied links op die agtergrond. Regs daarvan is Benrose.

Denver is 'n nywerheidsvoorstad in die ooste van Johannesburg, aan die spoorlyn na Germiston en Hoofrifweg, sowat 6 km oos van die stadsaal. In die weste word dit begrens deur Benrose, in die noorde deur Jeppestown en Malvern, en in die ooste deur Cleveland. Die Frans Oberholzer-snelweg vorm die suidelike grens. Net 'n baie klein gedeelte van die voorstad in die noordwestelik uithoek, noord van die voorstad, bestaan uit formele woonhuise; origens bestaan dit uit nywerheidspersele en 'n plakkerskamp in die weste sowel as ooste, albei aan Hoofrifweg.

Denver is aangelê op 25 ha van die plaas Doornfontein, waarop al die oostelike voorstede van Johannesburg mettertyd aangelê is. Die eienaar van die grond, F.J. Bezuidenhout, na wie Bezuidenhoutsvallei genoem is, het die grond in 1893 aan J.H. Strutton verhuur vir die daarstelling van plantasies en tuine. Dit is later aan 'n maatskappy verkoop en in Oktober 1898 is verlof toegestaan om 'n dorpsgebied aan te lê. Voor en kort ná die Tweede Vryheidsoorlog het sekere mynboumasjieneriefirmas uit die VSA hul werwe hier opgerig en is die voorstad na die hoofstad van die Amerikaanse deelstaat Colorado, Denver, genoem.

Op 31 Mei 1900 het dr. F.E.T. Krause, wat in beheer was van die Goudstad namens die Zuid-Afrikaansche Republiek, uitgery na Denver om lord Roberts te ontmoet ten einde die dorp oor te gee, waarna die twee saam Johannesburg binnegery het.

Vroeër jare was in die omgewing van Denver so 'n groot wit bevolking dat dit van 1910 tot 1933 die naam van 'n kiesafdeling vir die Volksraad was (sien Denver). Volgens die sensus van 2011 was Denver se totale bevolking destyds 7 257, van wie 7 104 swart was, 85 "ander", 25 bruin, 24 wit en 19 Asies of Indiërs.[2] In die sensus van 2001, toe die voorstad kleiner was as vir 2011 se sensusdoeleindes en nie die plakkerskamp in die weste ingesluit het nie, was die totale bevolking 5 092, van wie 4 818 swart was, 160 wit, 78 bruin en 36 Asies of Indiërs.[3]

Verwysings[wysig | wysig bron]

  1. 1,0 1,1 1,2 1,3 "Subplek Denver". Sensus 2011. 
  2. (en) Die sensussyfers soos weergegee deur Adrian Frith. URL besoek op 6 November 2017.
  3. (en) Die sensussyfers soos weergegee deur Adrian Frith. URL besoek op 6 November 2017.

Bronne[wysig | wysig bron]