Lyndhurst

in Wikipedia, die vrye ensiklopedie
Jump to navigation Jump to search
Lyndhurst
Ligging van Lyndhurst op 'n kaart (Gauteng)
Lyndhurst
Lyndhurst
 Lyndhurst se ligging in Gauteng
Koördinate: 26°08′30″S 28°06′50″O / 26.14167°S 28.11389°O / -26.14167; 28.11389Koördinate: 26°08′30″S 28°06′50″O / 26.14167°S 28.11389°O / -26.14167; 28.11389
Land Vlag van Suid-Afrika Suid-Afrika
Provinsie Gauteng
Munisipaliteit Stad Johannesburg
Hoofplek Johannesburg
Oppervlak[1]
 - Voorstad 1,26 km²  (0,5 vk m)
Bevolking (2011)[1]
 - Voorstad 3 813
 - Digtheid 3 026/km² (7 837,3/myl2)
Rasverdeling (2011)[1]
 • Blank 29,6%
 • Indiër/Asiër 9,5%
 • Kleurling 3,8%
 • Swart 56,4%
 • Ander 0,7%
Taal (2011)[1]
 • Engels 54,3%
 • Zoeloe 13,3%
 • Noord-Sotho 4,8%
 • Tswana 4,6%
 • Ander 23,0%

Lyndhurst is ’n voorstad van Johannesburg, sowat 11 km noordoos van die stadsaal geleë.

Lyndhurst word in die weste en noordweste deur Kew begrens, in die noorde deur Witney Gardens, in die noordooste deur Corlett Gardens en Dunsevern, in die ooste deur Edenvale, in die suidooste deur Sunningdale, in die suide deur Sunningdale Ridge en in die suidweste deur Glenhazel. Lyndhurst, wat uitgelê is in ’n langwerpige vorm van die suidweste na die noordooste, beslaan sowat 1 km² en strek oor 2,4 km van die weste na die ooste, maar net sowat 700 m op die verste punte in die noorde en suide.

Die New Dictionary of South African Place Names meld nie wanneer Lyndhurst aangelê is nie, maar wel dat dit moontlik na Lyndhurst naby Southampton in Engeland genoem is.

Afrikaanse gemeenskap[wysig | wysig bron]

Nes die res van Johannesburg se noordoostelike voorstede, was Lyndhurst tradisioneel oorwegend Engelssprekend met 'n taamlik sterk Joodse teenwoordigheid. Tog is hier in 1919 ’n klein Afrikaansmediumskool gestig wat later die Laerskool Lyndhurst sou word en tot omstreeks 1990 bestaan het, toe die dalende leerlingtal die skool gedwing het om na Engelsmediumonderrig oor te skakel. Dit staan sedertdien bekend as Lyndhurst Primary School en onderrig hoofsaaklik swart leerders, nes die nabygeleë Glenhazel Primary School, Northview High School en Sandringham High School; trouens, die meeste voormalige Model C-skole in die omgewing.

In 1959 is in die nabygeleë Kew die NG gemeente Noordoos-Rand gestig, wat lidmate in Lyndhurst ingesluit het, maar laat in die 1970's is dit saam met Johannesburg-Sterrewag (Observatory) by Johannesburg-Noord ingelyf. Dié gemeente, wat tweetalig geword en sy naam na Andrew Murray verander het, se kerkgebou is in Orchards, sowat 4,3 km soos die kraai vlieg suidwes van Lyndhurst af en naby aan waar die enigste ander Afrikaanse skool in die noordooste, die Laerskool Dirkie Uys, in 1997 parallelmedium en in 2000 slegs Engels geword, toe die naam na Orchards Primary School verander is. Die naaste staatskool wat primêre onderrig deur medium Afrikaans aanbied, is nou die Laerskool M.W. de Wet in Edenvale, eens ’n Afrikaanse skool, maar in 2018 sowat twee derdes Engels.

Die naaste gemeente van die Nederduitsch Hervormde Kerk was Johannesburg-Noord, gestig in 1931 en met sy kerkgebou in Highlands-Noord. Omstreeks 2000 is dié kerkgebou verkoop en het die gemeente kort daarna sy naam verander en na Midrand verskuif, waar hy 'n kerkgebou saam met die Gereformeerde kerk Midrand opgerig het. Die naaste Gereformeerde gemeente is die Gereformeerde kerk Edenvale, sowat 3 km soos die kraai vlieg van hier af.

Bronne[wysig | wysig bron]

  • (en) Raper, Peter Edmund. 2004. New Dictionary of South African Place Names. Johannesburg & Cape Town: Jonathan Ball Publishers
  • (af) Stals, prof. dr. E.L.P (red.). 1978. Afrikaners in die Goudstad. Deel 1. 1886 - 1924. Kaapstad en Pretoria: HAUM.

Verwysings[wysig | wysig bron]

  1. 1,0 1,1 1,2 1,3 "Subplek Lyndhurst". Sensus 2011.