Bengaalse nasionale krieketspan

Bangladesj

Kenteken van die Bengaalse nasionale krieketspan
Bynaam	The Tigers („die tiere“)
Konferensie	Bengaalse Krieketraad (BCB)
Personeel
Kaptein	Najmul Hossain Shanto
Afrigter	Chandika Hathurusingha
Geskiedenis
Toetsstatus verkry	2000
Internasionale Krieketraad
IKR-status	Assosiaatlid (1977) Volle lid (2000)
IKR-streek	AKR (Asië)
IKR-ranglys Tans Beste rang tot dusver Toetsrang 9de 8ste (1 Mei 2018) EDI 8ste 6de (25 Mei 2017) T20I 9de 4de (22 Julie 2012)
Toetse
Eerste toets	t Indië op Bangabandhu Nasionale stadion, Dhaka; 10–13 November 2000
Laaste toets	t Sri Lanka op Zahur Ahmed Chowdhury-stadion, Chittagong; 30 Maart–3 April 2024
Toetse Gespeel Gewen/Verloor Algeheel 142 19/105 (13,38%) (0 gelykop, 18 onbeslis) Vanjaar 2 0/2 (0 gelykop, 0 onbeslis)
Wêreldtoets- kampioenskappe	2/2 (eerste in 2019–2021)
Beste uitslag	9de plek (in 2019–2021 en 2021–2023)
Internasionale eendagwedstryde
Eerste EDI	t Pakistan op Tyronne Fernando-stadion, Moratuwa; 31 Maart 1986
Laaste EDI	t Sri Lanka op Zahur Ahmed Chowdhury-stadion, Chittagong; 18 Maart 2024
EDIs Gespeel Gewen/Verloor Algeheel 438 159/269 (36,30%) (0 gelykop, 10 onbeslis) Vanjaar 3 2/1 (0 gelykop, 0 onbeslis)
Krieketwêreldbeker-verskynings	7/13 (eerste in 1999)
Beste uitslag	Kwarteindrondte (in 2015)
Wêreldbeker- kwalifiserings	6 (eerste in 1979)
Beste uitslag	Kampioen (in 1997)
Kampioenetrofee-verskynings	5/8 (eerste in 1998)
Beste uitslag	Halfeindrondte (in 2017)
Twintig20s
Eerste T20I	t Zimbabwe op Sheikh Abu Naser-stadion, Khulna; 28 November 2006
Laaste T20I	t Afghanistan op Arnos Vale-stadion, Kingstown; 24 Junie 2024
T20Is Gespeel Gewen/Verloor Algeheel 176 68/104 (38,63%) (0 gelykop, 4 onbeslis) Vanjaar 18 9/9 (0 gelykop, 0 onbeslis)
T20I-wêreldbeker-verskynings	9/9 (eerste in 2007)
Beste uitslag	Tweede rondte (in 2007, 2014, 2016, 2021, 2022 en 2024)
Toetsklere EDI-klere T20I-klere

Die Bengaalse nasionale krieketspan (Bengaals: বাংলাদেশ জাতীয় ক্রিকেট দল), met die bynaam The Tigers, is die nasionale krieketspan wat Bangladesj in toets- en kitskrieket verteenwoordig. Dit word beheer en geadministreer deur die Bengaalse Krieketraad (BCB, van Engels: Bangladesh Cricket Board) en is ’n volle lid van die Internasionale Krieketraad (IKR) met toets-, EDI- en T20I-status. Bangladesj het sy eerste toetswedstryd in November 2000 teen Indië in Dhaka gespeel en sodoende die tiende land, en die vierde in Asië, met toetsstatus geword.

Bangladesj se eerste vertoning in internasionale krieket was tydens die IKR-trofee 1979 in Engeland. Hulle beëindig dié toernooi met twee oorwinnings en twee nederlae. Sewe jaar later, op 31 Maart 1986 tydens die Asiatiese Beker, speel Bangladesj in sy eerste internasionale eendagwedstryd teen Pakistan. Bangladesj wen die IKR-trofee 1997 in Maleisië. Deur die toernooi te wen het Bangladesj vir die eerste keer ook vir die Krieketwêreldbeker 1999 gekwalifiseer. Tydens dié toernooi het hulle onder andere Pakistan en Skotland verslaan. Oor ’n lang tydperk was sokker die gewildste sport in Bangladesj, maar krieket het geleidelik gewildheid verwerf – veral in stedelike gebiede – en teen die 1990’s sokker verbygesteek. Op 26 Junie 2000 is Bangladesj se vordering in internasionale krieket met toetsstatus beloon.

In 1997 word Bangladesj ’n gereelde lid van die IKR met die reg om internasionale eendagwedstryde te speel. Hulle verwerf op 26 Junie 2000 die status van ’n toetskrieketland. Bangladesj hou die rekord vir die meeste verloorslae agtereenvolgens in toetse (21 tussen 1999 en 2002) en eendagwedstryde (23 tussen 2001 en 2004). Nadat hulle toetsstatus verkry het, moes Bangladesj tot in 2004 vir sy eerste EDI-oorwinning sedert die Krieketwêreldbeker 1999 wag. Die span wat Bangladesj tydens dié geleentheid gewen het, was Zimbabwe, wat Bangladesj ook in hul eerste toetsoorwinning in 2005 verslaan het; nadat hulle die tweede toets geëwenaar het, het Bangladesj sy eerste toetsreeks gewen. In 2009 vertrek Bangladesj vir twee toetse na Wes-Indië en nadat hulle albei gewen het, beklink Bangladesj sy eerste oorsese toetsreeks.

Teen 25 Junie 2024 het Bangladesj in 142 toetswedstryde gespeel, waarvan hulle 19 gewen het. Hul eerste oorwinning was oor Zimbabwe, en die volgende twee teen Wes-Indië. Veral tuis het hulle al goed presteer en onbeslis teen Nieu-Seeland, Pakistan, Indië en Suid-Afrika gespeel, maar ook oorwinnings oor Engeland, Sri Lanka en Australië aangeteken. Tydens hul 2016/17-toer na Sri Lanka het Bangladesj in Maart 2017 sy 100ste toetswedstryd gespeel.

Bangladesj is meer suksesvol wat EDIs betref, hulle het 159 van hul 438 EDI-wedstryde gewen. Bangladesj het ook al 176 Twintig20-wedstryde gespeel, waarvan hulle 68 gewen het. Bangladesj is tans (Junie 2024) negende op die IKR-toetsranglys, agtste op die eendagranglys en negende op die Twintig20-wêreldranglys.

Beheerliggaam

Die hoofartikel vir hierdie afdeling is: Bengaalse Krieketraad.

Ondersteuners van die Bengaalse krieketspan met die Bengaalse vlag tydens ’n krieketwedstryd

Die Bengaalse Krieketraad (Bengaals: বাংলাদেশ ক্রিকেট বোর্ড; Engels: Bangladesh Cricket Board, BCB) is in 1972 as die Bengaalse Krieketbeheerraad (Engels: Bangladesh Cricket Control Board, BCCB) gestig en verantwoordelik vir die reëling van krieket in Bangladesj. Sedert 26 Junie 2000 is Bangladesj ’n volle lid van die Internasionale Krieketraad (IKR) en mag dus toetskrieket speel. Daarbenewens was die Bengaalse beheerliggaam in 1983 ’n stigtingslid van die Asiatiese Krieketkonferensie (Asian Cricket Conference, ACC; nou Asiatiese Krieketraad).

Die Bengaalse Krieketraad bestuur al die Bangladesj-verteenwoordigende nasionale spanne, insluitende die mans, vroue en jeug. Hulle is ook verantwoordelik vir die bestuur en organisasie van toets-, EDI- en T20I-reekse teen ander spanne, en die reëling van internasionale wedstryde tuis. Daarbenewens is die BCB verantwoordelik vir inkomsteverkryging deur die verkoop van kaartjies, borgskappe en uitsaairegte, veral in verband met die Bengaalse span.

Kinders en jongmense word reeds op skool aan krieket bekend gestel en na gelang van hul belangstelling en talent begin hul met hul afrigting. Net soos ander krieketlande beskik Bangladesj oor ’n o/19-nasionale span wat aan die o/19-krieketwêreldbeker deelneem. Bangladesj A is die tweede nasionale span van Bangladesj en van hul wedstryde geniet eersterangse of A-lys-status.

Geskiedenis

Krieket in Bengale

Krieket is in die 18de eeu deur die Britse Oos-Indiese Kompanjie na Bengale gebring en die eerste bekende krieketwedstryde is in 1792 in Calcutta gespeel, maar wedstryde is dalk ’n dekade voorheen gespeel. Die spel het vinnig gewildheid in Wes-Bengale en die aangrensende Bihar verwerf. In Oos-Bengale, die huidige Bangladesj, het krieket stadiger ontwikkel, aangesien dié gebied tot in die tweede helfte van die 19de eeu nie ’n groot aantal Europese settlers gelok het nie. Eers later het Europeërs hulle hulle in Dhaka begin vestig en net soos in die aangrensende Indië het krieket vinnig een van hul gunsteling ontspanningsaktiwiteite geword. In 1876 het ’n Europese XI ’n Inheemse XVIII in Dhaka verslaan (die syfers verwys na die aantal spelers).

Tydens die eerste besoek van ’n Engelse span op die Indiese subkontinent het in 1889/90 ’n verteenwoordigende Bengaalse span teen G. F. Vernon’s XI gespeel. In Januarie 1923 het Bengale tydens die Nagpur Provinsiale Toernooi teen ’n keurspan uit Bombay en ’n Sentrale Provinsies XI te staan gekom. In 1934 het die Raad vir Beheer van Krieket in Indië die Ranji-trofee van stapel gestuur, maar Bengale het nie aan die eerste 1934/35-toernooi deelgeneem nie. In Desember 1934 het Bengale eersterangse status verkry, toe hulle teen die toerende Australië gespeel het, maar met nege paaltjies verslaan is. In Januarie 1936 het Bengale aan die Ranji-trofee deelgeneem en in die Oostelike sone gespeel, maar hulle is deur Madras in die halfeindstryd verslaan. In 1937 het Bengale as naaswenner geëindig en in 1939 het hulle die Ranji-trofee ingepalm. Destyds was Bengale as ’t ware ’n Wes-Bengaalse span. Hulle was in Calcutta gesetel en het al hul tuitswedstryde op Eden Gardens gespeel. In Februarie 1941 is die eerste belangrike wedstryd in Dhaka gespeel, toe ’n Bengaalse Goewerneurs XI teen die Bengaalse Gymkhana op die Bangabandhu Nasionale stadion – destyds die Dacca-stadion genoem – gespeel het.

Krieket in Oos-Pakistan

Tussen die 1954/55- en 1970/71-seisoene het 13 Oos-Pakistanse eersterangse spanne aan Pakistan se plaaslike kriekettoernooie – die Quaid-i-Azam- en die Ayub-trofee – deelgeneem, baie van die spanne egter net in ’n enkele seisoen of twee. Van die mees aktiewe spanne was Oos-Pakistan (nege seisoene), Dhaka-universiteit, Oos-Pakistan Greens en Oos-Pakistan Whites (drie seisoene elk). Chittagong is ’n goeie voorbeeld van die sporadiese manier waarvolgens spanne van Oos-Pakistan in die nasionale kompetisies betrokke was. Dié plaaslike span sou tussen 1959/60 en 1965/66 in drie wedstryde gespeel het, maar al drie wedstryde moes afgelas word. Van die Oos-Pakistanse spanne het eersterangse wedstryde teen die toerende Indië (in 1954/55) en Marylebone-krieketklub (in 1955/56) gespeel. Vanaf Januarie 1955 het Oos-Pakistan toetskrieket begin huisves, toe ’n wedstryd tussen Pakistan en Indië op die Bangabandhu Nasionale stadion in Dhaka aangebied is. Dié stadion is regdeur die 1960’s vir verskeie belangrike wedstryde, insluitende toetse, gebruik. Die M. A. Aziz-stadion in Chittagong word sedert 1954 ook vir eersterangse wedstryde gebruik, maar die eerste toets is eers in 2001 in dié stadion aangebied, toe Bangladesj teen Zimbabwe gespeel het.

Die laaste voltooide eersterangse wedstryd in Oos-Pakistan was vanaf 26 Februarie tot 1 Maart 1971 tussen ’n Pakistanse Krieketraad XI en die toerende Internasionale XI in Dhaka gespeel. Dié wedstryd het onbeslis geëindig en sy laaste dag het met die ontbinding van die nasionale vergadering deur Yahya Khan saamgeval, wat tot die uitbreek van die Bengaalse Oorlog gelei het. Die Internasionale XI het Dhaka die volgende dag op pad na Lahore toe verlaat en ’n verdere wedstryd gespeel, voordat hul toer geëindig het. Twee wedstryde wat vir Maart tydens die Quaid-i-Azam-trofee in Dhaka beplan was, is weens die nasionale noodtoestand geskrap.

Geassosieerde lid van die IKR

Bangladesj het sy volle debuut in internasionale krieket tydens die Asiatiese Beker in 1986 gemaak

Tot in 1947 was Bangladesj ’n deel van Brits-Indië en vanaf 1971 ’n deel van Pakistan, en het as deel van hierdie lande oor toetsstatus beskik. Ná sy onafhanklikheid moes die span op nuut herbou. In 1972 het die regering die Bengaalse Krieketraad (Bangladesh Cricket Board, BCB), destyds die Bengaalse Krieketbeheerraad (Bangladesh Cricket Control Board, BCCB) genoem, gestig. Dié beheerliggaam het die taak gehad om krieket in die nuwe land te reël. In die nadraai van die Derde Indies-Pakistanse Oorlog was dit egter nie maklik nie. Volgens Barclays World of Cricket was die nasionale stadion in Dhaka in ’n vervalle toestand in die lente van 1975. Nadat die probleme van die naoorlogse fase opgelos is, het krieket in Dhaka toenemend gewildheid verwerf en in Februarie en Maart 1973 is die eerste belangrike kompetisie op klubvlak, die Dhaka Metropolis Uitspeeltoernooi, aangebied. ’n Nasionale klubtoernooi is in 1974/75 geloods en tot in 2015 gedurende die meeste seisoene aangebied. Dit is in 1983/84 deur die tabakmaatskappy W.D. & H.O. Wills en toe in 1993/94 deur Pepsi geborg, maar dit was nooit ’n eersterangse kompetisie nie. Dit het oor ’n soortgelyke status as dié van ligakrieket in Engeland of graadkrieket in Australië beskik.

Die beheerliggaam het die ergste van hierdie probleme aan die begin van die 1976/77-seisoen aangepak. In Januarie 1977 is die eerste Bengaalse nasionale krieketspan vir ’n wedstryd teen die toerende Marylebone-krieketklub (MKK of MCC in Engels) op die Bangabandhu Nasionale stadion saamgestel. Die MKK het ook teen die Noordsone, Oossone en Suidsone gespeel, waarvolgens dié deelnemers aan die Bengaalse Krieketliga vir die eerste keer in internasionale wedstryde gespeel het. Hoewel die MKK-span bekende county-krieketspelers ingesluit het, het hul wedstryde tydens die 1976/77-toer nie oor eersterangse status beskik nie. Bangladesj het die MKK nogtans beïndruk en in 1977 het die land ’n assosiaatlid van die Internasionale Krieketraad geword. Die eerste nasionale span wat Bangladesj besoek het, was Sri Lanka in Januarie 1978. Sri Lanka was op die punt om ’n toetsland te word (wat in 1982 gebeur het) en het sy hoër vlak met verskeie beurtoorwinnings in die drie wedstryde oor Bangladesj onderstreep. Die wedstryd in Dhaka, wat op 13 Januarie 1978 begin het en deur Sri Lanka met ’n beurt en nege lopies gewen is, was Bangladesj se internasionale krieketverskyning, maar as gevolg van die laer vlak van krieket in Bangladesj het dit nie eersterangse status geniet nie.

Bangladesj was een van vyftien spanne wat aan die eerste IKR-trofee in 1979 deelgeneem het. Dié toernooi het aan nietoetslande die moontlikheid gegee om vir daardie jaar se Krieketwêreldbeker in Engeland te kwalifiseer. Bangladesj, aangevoer deur kaptein Raqibul Hasan, het elk twee wedstryde gewen en verloor, maar hulle het versuim om vanaf die eerste rondte te vorder. Met sy seëviering tydens die Suidoos-Asiatiese Krieketkonferensietoernooi in Februarie 1984 het Bangladesj vir die Asiatiese Beker 1986 gekwalifiseer. Op 31 Maart 1986 het Bangladesj sy eerste EDI-wedstryd teen ’n volle lid van die IKR gespeel. Bangladesj, aangevoer deur Gazi Ashraf, is op 94 uitgeboul en Pakistan het dié wedstryd met sewe paaltjies gewen. Bangladesj het sy tweede EDI-wedstryd teen Sri Lanka verloor en laaste tydens die driehoekige toernooi geëindig.

Bangladesj het as gasheer aan die Asiatiese Beker 1988 deelgeneem; tydens dié toernooi is die eerste EDI-wedstryde (met terugwerkende status) in die land aangebied, hulle het egter al hul wedstryde verloor. Tydens die IKR-trofee 1986 het Bangladesj net twee oorwinnings aangeteken, en sy volgende internasionale verskynings was tydens die Austral-Asiatiese Beker 1990, die Asiatiese Beker in 1990/91, 1995, 1997, en verskeie ander driehoekige toernooie, maar hulle het eers in 1998 hul eerste EDI-wedstryd gewen. Hul reeks van 22 agtereenvolgende verlore wedstryde sedert hul eerste EDI-wedstryd was ’n destydse rekord. Bangladesj het sy eerste EDI-oorwinning in Indië oor Kenia, veral te danke aan Mohammad Rafique, wat ’n uitstekende 77 lopies aangeteken en drie paaltjies geneem het, behaal. Hy het tydens die vennootskap met Athar Ali Khan om die eerste paaltjie 137 lopies aangeteken. Athar se eie bydrae was 47 lopies. In Oktober 1998 het Bangladesj die eerste IKR-uitkloptrofee (die latere Kampioenetrofee), ’n uitkloptoernooi met al die destydse toetslande, aangebied, maar self nie daaraan deelgeneem nie. Bangladesj het aan die IKR-trofee in 1979, 1982, 1986, 1990 asook 1994 deelgeneem, en die 1997-toernooi in Maleisië gewen. Daarmee het hulle vir die eerste keer vir die Krieketwêreldbeker 1999 gekwalifiseer, nadat hulle al die vorige krieketwêreldbekertoernooie misgeloop het. Die destydse sekretaris-generaal van die Bengaalse Krieketraad, Aminul Huq Moni, het die Astro Turf in die Abahani-krieketveld en die Bangabandhu Nasionale stadion laat oprig, sodat die plaaslike spelers oor twee volle seisoene heen vir die kolfblaaie van die IKR-trofee 1997 kon voorberei. Bangladesj het in 1999 aan sy eerste krieketwêreldbekertoernooi in Engeland deelgeneem en sy eerste oorwinning in ’n krieketwêreldbekerwedstryd oor die assosiaatlid Skotland aangeteken. In die groepwedstryd in Northampton het Bangladesj ’n verrassende oorwinning oor die toetsland Pakistan met 62 lopies aangeteken. Bangladesj het 223/9 in sy 50 boulbeurte aangeteken en Pakistan kon met net 161 lopies antwoord, nadat die paaltjiewagter Khaled Mashud ’n aantal Pakistanse spelers uitgeskakel het en Khaled Mahmud met sy boulwerk 3/31 in tien boulbeurte geneem het. Mahmud is as „speler van die wedstryd“ aangewys. Bangladesj het ná drie nederlae in sy vyf wedstryde nie tot die Super Ses gevorder nie. Hul oorwinning oor Pakistan, wat later as naaswenner na Australië geëindig het, het aan Bangladesj ’n hupstoot gegee om die volgende jaar toetsstatus te verkry.

In voorbereiding op sy toetsstatus het Bangladesj in 1999/2000 sy eie eersterangse toernooi gehuisves, hoewel die toernooi se wedstryde eers vanaf die 2000/01-seisoen dié status geniet het. Die gebrek aan ’n gevestigde eersterangse struktuur in die land kort voor Bangladesj se eerste toetswedstryd, is as een van die redes aangevoer waarom die span gesukkel het om by die langer formaat van die spel aan te pas. Wes-Indië het in Oktober na Bangladesj getoer en albei wedstryde van die EDI-reeks gewen. In Mei en Junie 2000 het Bangladesj die Asiatiese Beker aangebied; Bangladesj het al drie sy wedstryde verloor en Pakistan het Bangladesj die destyds hoogste EDI-nederlaag met 233 lopies toegedien. In Oktober het Bangladesj aan die IKR-uitkloptoernooi deelgeneem en hul enigste wedstryd het in ’n nederlaag teen Engeland geëindig.

Eerste jare as ’n toetsspan

Naimur Rahman het Bangladesj in die eerste toets aangevoer

Khaled Mahmud was tussen 2003 en 2003/4 Bangladesj se kaptein

Op 13 November 2000 het Bangladesj in sy eerste toetswedstryd teen Indië in Dhaka gespeel. Bangladesj, aangevoer deur Naimur Rahman, het egter met nege paaltjies verloor. Aminul Islam Bulbul het 145 lopies in die eerste beurt aangeteken en die eerste krieketspeler geword om ’n honderdtal in die eerste toets vir sy span aan te teken; Rahman het ses paaltjies vir 132 lopies geneem, die naasbeste boulsyfers tydens ’n span se eerste toets. In April 2001 het Bangladesj Zimbabwe vir twee toetse en drie EDI-wedstryde besoek, maar hulle is in al hul vyf wedstryde verslaan. Bangladesj het aan die Asiatiese toetskampioenskap deelgeneem, die tweede en laaste toernooi van sy soort. Bangladesj het albei wedstryde met ’n beurt verloor. Die debutant Mohammad Ashraful het die jongste speler geword om ’n toetshonderdtal in sy eerste wedstryd aan te teken. In November het Bangladesj Zimbabwe vir twee toetse en drie EDI-wedstryde gehuisves. Die eerste toets moes weens slegte weer ingekort word en het onbeslis geëindig. Nadat hulle hul vyf eerste toetse verloor het, was dit die eerste keer wat Bangladesj ’n nederlaag vermy het. Zimbabwe het egter al die oorblywende wedstryde gewen. Ná die toetsreeks het die paaltjiewagter Khaled Mashud Rahman as kaptein vervang. Die volgende maand het Bangladesj vir twee toetswedstryde na Nieu-Seeland vertrek. Bangladesj se kolwers het in onbekende omstandighede gesukkel en die span het twee nederlae elk met ’n beurt gely.

In Januarie 2002 het Bangladesj tuis twee toetse en drie EDI-wedstryde teen Pakistan verloor. Op hierdie punt het hulle tien van hul elf eerste toetswedstryde verloor; net Suid-Afrika het op ’n soortgelyke manier in hul eerste toetswedstryde gesukkel en ook tien van hul elf eerste toetswedstryde verloor. Toe Bangladesj in Julie en Augustus na Sri Lanka getoer het, het hulle Sri Lanka se beste oorwinning in toetskrieket beleef: met ’n beurt en 196 lopies. Bangladesj het albei toetse en al drie EDI-wedstryde verloor, en hul 50ste nederlaag in hul 53ste EDI-wedstryd gely. Voortgesette swak vertonings deur Bangladesj het hul toetsstatus bevraagteken. Twee nederlae teen Australië en Nieu-Seeland in hul poelwedstryde het Bangladesj tydens die Kampioenetrofee 2002 uitgeskakel. In Oktober het toets- en EDI-reeksnederlae in Suid-Afrika gevolg. Die laaste nederlaag het ’n nuwe rekord vir die meeste EDI-nederlae opgestel (23), die vorige rekord was ook Bangladesj s’n. Toe Wes-Indië in November en Desember na Bangladesj getoer het, het Bangladesj albei toetse en twee van die drie EDI-wedstryde verloor. Bangladesj het verskeie laagtepunte op die derde dag van die eerste toets beleef: hul laagste beurttelling (87 lopies), hul laagste wedstrydgemiddelde (226) en die hoogste nederlaag in hul 16 toetswedstryde (met ’n beurt en 310 lopies).

Tydens die Krieketwêreldbeker 2003 in Februarie en Maart in Suid-Afrika, Kenia en Zimbabwe het Bangladesj vyf van sy ses wedstryde verloor, insluitende die wedstryde teen Kanada (wat sedert die Krieketwêreldbeker 1979 geen internasionale krieket gespeel het nie) en Kenia (wat later tot die halfeindstryd sou vorder). In die nadraai van dié toernooi het Habibul Bashar Khaled Mashud as kaptein vervang. Tydens Suid-Afrika se toer na Bangladesj in April en Mei het Bangladesj al sy vier EDI-wedstryde swak en twee toetswedstryde met beurte verloor.

Maer jare

Dav Whatmore was tussen 2003 en 2007 Bangladesj se afrigter

Habibul Bashar het vanaf 2004/05 tot 2007 Bangladesj aangevoer

Toetswedstryd tussen Bangladesj en Engeland op Lord’s in 2005

In 2003 het Bangladesj sewe verdere toetse en elf EDI-wedstryde teen Australië, Pakistan en Engeland gespeel, maar hulle het elke wedstryd verloor. In September was Bangladesj op die punt om sy eerste toetsoorwinning aan te teken, nadat hulle deur Pakistan met net een paaltjie verslaan is. Dit was net die tiende keer wat ’n span ’n toets met net een paaltjie verloor het. In die reeks teen Pakistan het Alok Kapali die eerste Bengaalse speler geword wat ’n driekuns in toetskrieket behaal het, nadat hy Shabbir Ahmed, Danish Kaneria en Umar Gul uitgeskakel het. Voor Bangladesj se toer na Zimbabwe in Februarie en Maart die volgende jaar is Mahmud uit die span verwyder en die kolwer Habibul Bashar is as nuwe kaptein aangewys. Bangladesj het die toetsreeks met 0–1 en die EDI-reeks met 1–2 verloor. Die tweede toets het na drie dae se reën en sonder enige speel onbeslis geëindig en het hul reeks van 21 agtereenvolgende nederlae sedert November 2001 beëindig, ’n wêreldrekord in toetskrieket. Die eenmalige EDI-oorwinning was Bangladesj se eerste internasionale oorwinning sedert hul seëviering oor Pakistan tydens die Krieketwêreldbeker 1999.

Bangladesj se volgende wedstryde was in Mei en Junie teen Wes-Indië. Bangladesj het die EDI-reeks met 0–3 en die toetsreeks met 0–1 verloor; met ’n onbeslis in die eerste wedstryd het Bangladesj net vir die derde keer in hul 29 toetswedstryde ’n nederlaag vermy. Bangladesj het in 2004 aan beide die Asiatiese Beker en die Kampioenetrofee deelgeneem, maar hulle het net die wedstryd teen Hongkong gewen. In die volgende maande het Bangladesj swak nederlae in toets- en EDI-wedstryde teen die toerende spanne uit Nieu-Seeland en Indië gely. In Desember het Bangladesj in sy 100ste EDI-wedstryd Indië verslaan, dit was net die derde keer wat hulle teen ’n toetsland gewen het. In Januarie 2005 het Zimbabwe vir twee toetse en vyf EDI-wedstryde na Bangladesj getoer. Die besoekende Zimbabwiese span het onder geskille tussen die beheerliggaam en spelers gely wat tot dié land se voorlopige skorsing uit toetskrieket gelei het. Van Zimbabwe se 16 spelers het net die kaptein in meer as nege toetswedstryde verskyn, gevolglik was Bangladesj die meer ervare span. In die eerste wedstryd het Bangladesj sy eerste oorwinning in toetskrieket aangeteken. Bangladesj se kolwers het in die tweede toets ’n onbeslis verseël deur in die vyf laaste sessies deur te kolf. In die wedstryd – wat aan Bangladesj ’n geskiedkundige eerste reeksoorwinning besorg het – het Enamul Haque jr. sy eie boulrekord vir die beste boulsyfer in ’n beurt verbeter, nadat hy sewe paaltjies vir 95 lopies geneem het, en die beste syfers in ’n wedstryd aangeteken het: twaalf paaltjies vir 200 lopies en die kaptein Habibul Bashar het vyftigtalle in albei beurte aangeteken. In die volgende EDI-reeks het Zimbabwe die eerste twee wedstryde gewen en Bangladesj die laaste drie, waarmee hulle die EDI-reeks beklink het.

Ná hul eerste toetsoorwinning het Bangladesj in Mei en Junie 2005 vir sy eerste toer na Engeland vertrek. Bangladesj het albei toetswedstryde met ’n beurt verloor; die tweede toets was die 22ste nederlaag in 38 toetse. Daarop het die NatWest-reeks in Engeland gevolg, waaraan naas die gasheer ook Australië en Bangladesj gevolg het. Bangladesj het net een van sy ses wedstryde gewen, maar hul eenmalige oorwinning was oor ’n Australiese span wat destyds die wêreldkampioen was en Wisden het dit as „die grootste ontsteltenis in die eendaagse krieketgeskiedenis“ beskryf. Mohammad Ashraful het tydens dié wedstryd sy eerste honderdtal met ’n presiese telling van 100 lopies aangeteken en hy het in die volgende wedstryd teen Engeland ’n beslissende 94 lopies van 53 aflewerings aangeteken. Bangladesj het in September vir twee toetse en drie EDI-wedstryde na Sri Lanka getoer. Ná die eenmalige oorwinning oor Australië in Engeland was Bangladesj ’n meer gevestigde span, Sri Lanka het egter al vyf wedstryde gewen.

Bangladesj het die 2006-tuisseisoen met optimisme aangepak, nadat hulle hul eerste oorwinning oor Sri Lanka in die tweede wedstryd van die EDI-reeks aangeteken het. Bangladesj het egter beide die EDI- en toetsreeks met onderskeidelik 1–2 en 0–2 verloor. In April was Bangladesj op die punt om Australië in ’n toetswedstryd te verslaan, nadat hulle in die eerste beurt met 158 lopies voorgeloop het en met drie paaltjies verslaan is. Bangladesj het die tweede toets met ’n beurt en die drie EDI-wedstryde swak verloor. Tydens die Kampioenetrofee in Indië het Bangladesj versuim om vanaf die groepfase te vorder, nadat hulle twee van hul drie wedstryde verloor het. Hul enigste oorwinning was oor Zimbabwe. Bangladesj het sy eerste T20I-wedstryd teen Zimbabwe voor ’n tuisskare gewen en dieselfde teenstander in ’n EDI-reeks van vyf wedstryde platgeloop. In dieselfde jaar het Shahriar Nafees die eerste Bengaalse speler geword om meer as eenduisend lopies (insluitende drie honderdtalle) in ’n kalenderjaar aan te teken, terwyl Mashrafe Mortaza die leidende EDI-paaltjienemer met 49 paaltjies geword het.

Op 17 Maart het Bangladesj in sy eerste wedstryd tydens die Krieketwêreldbeker 2007 ’n oorwinning met vyf paaltjies oor Indië aangeteken. In hul oorblywende groepwedstryde het Bangladesj teen Sri Lanka verloor en Bermuda verslaan, genoeg om vir die tweede rondte te kwalifiseer. Bangladesj se enigste oorwinning tydens die Super Agt was oor Suid-Afrika, terwyl hulle in al die ander wedstryde verslaan is. Tydens die Indiese besoek vir twee toetswedstryde en drie EDI-wedstryde het hulle die EDI-reeks met 2–0 gewen. Die eerste toetswedstryd het ná reën onbeslis geëindig, maar Indië het tydens die tweede toets hul hoogste oorwinning nog aangeteken (met ’n beurt en 239 lopies). In die nadraai is die toetskaptein Habibul Bashar, wat voorheen as EDI-kaptein bedank het, deur die 22-jarige Mohammad Ashraful in al die vorms van krieket vervang.

Ashraful se eerste reeks was ’n toer na Sri Lanka in Junie en Julie. Bangladesj het swak nederlae in elkeen van die drie toetse (elk met ’n beurt) gely en ook al die drie EDI-wedstryde verloor. In die eerste beurt van die tweede toets is Bangladesj op sy laagste telling uitgeboul (62 lopies). Voor die T20I-wêreldbeker 2007 het Bangladesj twee T20I-wedstryde in Kenia gespeel. Hulle het die gasheer verslaan, maar teen Pakistan verloor. Bangladesj het tydens die T20I-wêreldbeker se groepfase Wes-Indië verslaan en tot die Super Agt gevorder, maar hulle het die volgende vier wedstryde verloor.

Stadige opkoms

Jamie Siddons was tussen 2007 en 2011 Bangladesj se afrigter

Shakib Al Hasan het Bangladesj tydens hul geskiedkundige toetsreeksoorwinning oor Wes-Indië in 2009 aangevoer

Die Bengaalse nasionale krieketspan vier die neem van ’n paaltjie teen Zimbabwe

Mohammad Ashraful stap tydens ’n toetswedstryd teen Engeland in om te kolf op Lord’s in 2010. Hy het 50 lopies tydens die twee-toetsreeks aangeteken.

Wedstryd tussen Bangladesj en Ierland tydens die Krieketwêreldbeker 2011

Aan die einde van 2007 het Bangladesj ’n Nieu-Seelandse toer onderneem en tydens dié toer se EDI-reeks is hulle met 0–3 platgeloop. Bangladesj het die nuwe jaar met die toetsbeen van dié toer begin, waarin hulle met 0–2 verslaan is. ’n Besoekende Suid-Afrikaanse span het Bangladesj in Februarie–Maart 2008 in al die krieket platgeloop. Dié toer het twee toetse en drie EDI-wedstryde ingesluit. In die eerste toetswedstryd het Bangladesj in die eerste beurt met 22 lopies voorgeloop, nadat hulle Suid-Afrika op 170 lopies uitgeboul het. Bangladesj het in dieselfde maand die nietoetsland Ierland in ’n EDI-reeks met 3–0 tuis verslaan en ’n reeks van twaalf agtereenvolgende EDI-nederlae sedert die vorige Krieketwêreldbeker beëindig. Pakistan het Bangladesj in April vir vyf EDI-wedstryde en een T20I-wedstryd gehuisves. Dié toer het teleurstellend verloop, nadat hulle al hul wedstryde verloor het. Tydens die Driereeks in Junie tuis het Bangladesj albei groepwedstryde teen Pakistan en Indië verloor. Tydens die Asiatiese Beker 2008 in Pakistan het Bangladesj sy eerste groepwedstryd teen die assosiaatlid Verenigde Arabiese Emirate gewen. Ten spyte van sy nederlaag in die volgende groepwedstryd teen Sri Lanka het Bangladesj die Super Vier gehaal, maar die volgende drie wedstryde teen Indië, Sri Lanka en Pakistan verloor.

Tydens sy Australiese toer in August–September is Bangladesj in die EDI-reeks met 0–3 platgeloop. In Oktober het Nieu-Seeland vir drie EDI-wedstryde en twee toetswedstryde Bangladesj besoek. Kort voor dié toer het 14 Bengaalse spelers Bangladesj verlaat om aan die Indiese Premierliga deel te neem en hulle is vervolgens deur die Bengaalse beheerliggaam vir tien jaar geskors. Ses van dié spelers, waaronder die voormalige kaptein Habibul Bashar, het sentrale kontrakte onderteken. Volgens verwagtinge sou Bangladesj deur Nieu-Seeland oorheers geword het. Nadat hulle die eerste EDI-wedstryd gewen het (hul eerste EDI-oorwinning oor Nieu-Seeland nog), is Bangladesj in die reeks met 2–1 verslaan. Nieu-Seeland het die eerste toetswedstryd met drie paaltjies gewen. Die tweede toetswedstryd het ná reën onbeslis geëindig, waarvolgens Nieu-Seeland die reeks met 1–0 beklink het.

In November 2008 het Bangladesj na Suid-Afrika getoer en hulle is deur die Proteas in al die wedstryde verslaan, insluitende die eenmalige T20I-wedstryd, twee van die drie EDI-wedstryde en albei toetswedstryde elk met ’n beurt. In Desember het Bangladesj egter van die teleurstellende vertonings herstel en was op die punt om die eerste toetswedstryd teen Sri Lanka tuis te wen, nadat hulle die hoogste teiken (513 lopies) in die vierte beurt gejaag, maar 107 lopies te min aangeteken het. In die tweede toets is Bangladesj egter met 465 lopies verslaan, waardeur hulle die toetsreeks met 0–2 verloor het. Daarna het Zimbabwe vir die Driereeks aangesluit. In die eerste wedstryd het Zimbabwe Bangladesj ná ’n uitstekende vertoning verslaan, maar is toe maklik deur Sri Lanka geklop, waarvolgens Bangladesj met ’n bonuspunt teen Sri Lanka in die laaste groepwedstryd moes wen om teen dieselfde span in die eindstryd te staan te kom. In ’n weens reën verkorte wedstryd het Bangladesj sy tweede EDI-oorwinning oor Sri Lanka aangeteken en sodoende die eindstryd gehaal, waar hulle egter verslaan is.

Tydens die T20I-wêreldbeker 2009 in Engeland is Bangladesj in die groepfase uitgeskakel, nadat hulle in hul wedstryde teen Indië en die assosiaatlid Ierland verslaan is. In die nadraai van hul nederlae tydens dié toernooi het die keurderbeamptes Mashrafe Mortaza vir die toer na Wes-Indië as nuwe kaptein benoem, sodat Ashraful op sy kolfwerk kon fokus. Die tweetoetsreeks is te midde van ’n geskil tussen die Wes-Indiese spelers en die Wes-Indiese Krieketraad gespeel: ’n aantal Wes-Indiese spelers het dié toetsreeks geboikot, wat die Wes-Indiese Krieketraad gedwing het om ’n aantal onervare spelers as plaasvervangers te benoem. Bangladesj het albei toetswedstryde gewen, die eerste met 95 lopies en die tweede met vier paaltjies. Hiermee het Bangladesj sy eerste oorsese toetsreeksoorwinning behaal. Tydens die daaropvolgende EDI-reeks het Bangladesj sy eerste EDI-oorwinning in die 14de probeerslag oor Wes-Indië aangeteken. Bangladesj het die reeks met 3–0 gewen, maar hulle is in die eenmalige T20I-wedstryd verslaan. Bangladesj het seëvierend na vore gekom met elk 4–1 in opeenvolgende EDI-reekse van vyf wedstryde elk teen Zimbabwe weg (in Augustus) en tuis (in Oktober–November).

In Januarie 2010 het Bangladesj die Driereeks met Indië en Sri Lanka aangebied. Hulle het egter versuim om ’n wedstryd ten wen (van hul vier wedstryde) en is uit die toernooi geskakel. Dit is opgevolg deur ’n tweetoetsreeks tuis teen Indië, waarin Bangladesj met 2–0 verslaan is. Tydens ’n volledige toer na Nieu-Seeland in Februarie 2010 het Bangladesj al sy wedstryde verloor (een T20I-, drie EDI- en een toetswedstryd). In Februarie–Maart 2010 het Engeland Bangladesj vir drie EDI- en twee toetswedstryde besoek. Bangladesj is in al die vyf wedstryde verslaan.

In Mei het Bangladesj aan die T20I-wêreldbeker 2010 in Wes-Indië deelgeneem. Hulle het albei groepwedstryde (teen Pakistan en Australië) verloor en versuim om tot die Super Agt te vorder. Ná dié toernooi het Bangladesj Engeland vir twee toetswedstryde besoek, maar hulle het albei verloor, ondanks Tamim Iqbal se twee honderdtalle. Tussen die toets- en EDI-wedstryde het Bangladesj in Junie aan die Asiatiese Beker 2010 deelgeneem, maar al sy wedstryde teen Indië, Sri Lanka en Pakistan verloor. In die EDI-reeks het Engeland die eerste wedstryd maklik gewen. In die tweede wedstryd in Bristol het Bangladesj Engeland vir die eerste keer in ’n internasionale wedstryd verslaan (Engeland was die enigste toetsland wat Bangladesj tot dusver nog nie geklop het nie), nadat hulle Engeland in die laaste boulbeurt uitgeboul en met vyf lopies gewen het. Engeland het egter die derde EDI-wedstryd in Birmingham gewen en die reeks met 2–1 beklink. Bangladesj het sy toer in Europa verleng en twee bykomende EDI-wedstryde teen Ierland gespeel. Dié reeks het met 1–1 gelykop geëindig. Later het Nederland die laaste EDI-wedstryd van die toer gewen. In Oktober dieselfde jaar het Nieu-Seeland Bangladesj vir vyf EDI-wedstryde besoek. Mortaza is in die eerste wedstryd beseer en Shakib het as kaptein by hom oorgeneem. Onder sy leierskap het Bangladesj die reeks met 4–0 gewen en hul eerste reeksoorwinning oor ’n volle IKR-lid beklink.

Wisselvallige vertonings

In Februarie en Maart 2011 het Bangladesj saam met Indië en Sri Lanka die Krieketwêreldbeker 2011 aangebied. Bangladesj het die openigswedstryd teen Indië verloor en daarna Ierland verslaan. Die volgende wedstryd is deur Wes-Indië gewen, nadat hulle Bangladesj op net 58 lopies uitgeboul het, Bangladesj se laagste EDI-telling en ’n negatiewe rekord vir ’n volle lid tydens ’n krieketwêreldbekertoernooi. Bangladesj het later Engeland en Nederland verslaan, waarvolgens hulle hul laaste wedstryd tydens die groepfase moes wen. Teen Suid-Afrika het Bangladesj sy tweede hoogste EDI-nederlaag gely en die eerste volle lid geword wat twee keer op minder as 100 lopies tydens ’n krieketwêreldbekerwedstryd uitgeboul is. Bangladesj is as gevolg van sy swakker lopietempo teenoor Wes-Indië in die groepfase uitgeskakel. Die daaropvolgende EDI-reeks teen die besoekende Australië in April het met ’n 3–0 platloop ook teleurstellend verloop.

Bangladesj het in Augustus 2011 vir ’n eenmalige toets en vyf EDI-wedstryde na Zimbabwe getoer. Die toets was, ná ’n selfopgelegde onttrekking in Januarie 2006 aangesien die sport in dié land in ’n toestand van wanorde verkeer het, Zimbabwe se terugkoms na die spel se langste formaat. Bangladesj is in die toetswedstryd met 130 lopies verslaan. Bangladesj het ook die EDI-reeks met 2–3 verloor. In die nadraai van dié reeks is beide kaptein Shakib Al Hasan en onderkaptein Tamim Iqbal met verwysing na hul swak leierskap van hul posisies verwyder. Later daardie maand is die paaltjiewagter Mushfiqur Rahim as kaptein en die veelsydige Mahmudullah as onderkaptein benoem.

Bangladesj se struweling op internasionale vlak is deur die ondoeltreffendheid van hul snelboulers onderstreep. Tussen Januarie 2010 en Augustus 2011 het hulle 37 paaltjies in agt toetswedstryde op ’n gemiddelde van 67.67 geneem, die ergste van die destydse nege gereeld toetsspelende lande. Hoewel Bangladesj die eerste wedstryd onder Rahim gewen het, die enigste T20I-wedstryd teen Wes-Indië tuis in Oktober, het die span die daaropvolgende EDI-reeks met 1–2 en die tweetoetsreeks met 0–1 verloor. Pakistan het in Desember na Bangladesj getoer en tydens die eerste van drie EDI-wedstryde is Bangladesj vir die 13de keer op ’n EDI-telling van minder as 100 lopies uitgeboul; hulle het sodoende Zimbabwe se rekord van 12 keer oorgesteek. Bangladesj is in al die krieket heeltemal platgeloop: 0–1 (T20I), 0–3 (EDIs) en 0–2 (toetse).

In Maart het Bangladesj die Asiatiese Beker 2012 aangebied. Ná oorwinnings oor Indië en Sri Lanka het Bangladesj die eindstryd gehaal, waar hulle teen Pakistan te staan gekom het; dit was slegs die tweede keer wat Bangladesj ’n eindstryd van ’n multinasionale toernooi bereik het. Hoewel Pakistan die wedstryd met twee lopies gewen het, het Bangladesj die verwagtinge oortref. Tydens dié toernooi het Tamim Iqbal die eerste Bengaalse speler geword wat vier agtereenvolgende EDI-honderdtalle aangeteken het. Shakib Al Hasan is as speler van die reeks benoem, nadat hy 237 lopies aangeteken en ses paaltjies geneem het. Tydens Bangladesj se Europese toer in Julie het hulle die T20I-reeks teen Ierland skoonskip met 3–0 gewen, Skotland in ’n T20I-wedstryd verslaan en die T20I-reeks teen Nederland met 1–1 gedeel. Bangladesj is tydens die T20I-wêreldbeker 2012 in Sri Lanka reeds in die eerste rondte uitgeskakel, nadat hulle deur beide Nieu-Seeland en Pakistan verslaan is. Tydens die tuisreeks teen Wes-Indië in November–Desember 2012 het die Bengaalse span die twee toetswedstryde verloor, maar die EDI-reeks met 3–2 gewen, voordat hulle in die enigste T20I-wedstryd verslaan is.

Bangladesj het in Maart 2013 vir ’n volle reeks na Sri Lanka getoer. In die eerste toetswedstryd in Galle het Mushfiqur Rahim die eerste tweehonderdtal vir die Bengaalse span in toetskrieket aangeteken, en Mohammad Ashraful het 190 lopies bygevoeg. Die eerste toets teen Sri Lanka het onbeslis geëindig, die eerste keer nog teen dié eilandstaat. Sri Lanka het die tweede toetswedstryd met sewe paaltjies gewen en die toetsreeks met 1–0 beklink. Die EDI-reeks is met 1–1 gedeel en Bangladesj het die enigste T20I-wedstryd verloor. Aansluitend het Bangladesj in April en Mei Zimbabwe besoek. Hulle is in in die eerste toetswedstryd met 335 lopies verslaan, dit was Zimbabwe se hoogste toetsoorwinning. Die tweede toetswedstryd het hulle met 173 lopies gewen en die toetsreeks met Zimbabwe gedeel (met 1–1). Bangladesj het die EDI-reeks verloor (met 1–2), voordat hulle die T20I-reeks gedeel het (met 1–1). In Oktober–November 2013 het Bangladesj ’n nuwe prestasie behaal en die tweetoetsreeks tuis teen Nieu-Seeland gedeel (met 0–0), die eerste keer teen dié eilandstaat. Dit is opgevolg deur ’n skoonskip oorwinning met 3–0 in die EDI-reeks, voordat hulle in die enigste T20I verslaan is. Sri Lanka het in Januarie–Februarie 2014 vir ’n volle reeks na Bangladesj getoer. Bangladesj het sy vierde-ergste nederlaag in sy toetsgeskiedenis gely, nadat hulle die eerste toets met ’n beurt en 248 lopies verloor het. Die tweede toetswedstryd het met ’n hoë telling onbeslis geëindig en Bangladesj het die toetsreeks met 0–1 verloor. Aansluitend is hulle in die T20I- (met 0–2) en die EDI-reeks (met 0–3) verslaan.

Daarop het ’n reeks van nederlae (met 0–4) teen ander Asiatiese krieketlande (Indië, Afghanistan, Pakistan en Sri Lanka) tydens die groepfase van die Asiatiese Beker 2014 op eie bodem gevolg, waardeur Bangladesj op die laaste plek van hul groep geëindig het. Die destydse assosiaatlid Afghanistan se oorwinning oor Bangladesj was hul eerste EDI-oorwinning oor ’n toetsland. Bangladesj het sy wenlose reeks van elf wedstryde in 2014 met oorwinnings oor twee assosiaatlede (Afghanistan en Nepal) in agtereenvolgende T20I-wedstryde tydens die T20I-wêreldbeker 2014 se groepfase beëindig. Hul nederlaag teen ’n verdere assosiaatlid, Hongkong, het hulle nie van hul vordering tot die Super 10 ontneem nie. Tydens die Super 10-fase is Bangladesj egter in al sy vier wedstryde deur Wes-Indië, Indië, Pakistan en Australië verslaan. Daarop het die Indiese besoek gevolg. Bangladesj is in die eerste en tweede EDI maklik verslaan, waardeur hulle die reeks met 0–2 verloor het. In Augustus het Bangladesj vir ’n volle reeks na Wes-Indië getoer. Die gasheer het Bangladesj in die EDI-reeks met 3–0 verslaan en Bangladesj se wenlose EDI-reeks na 13 wedstryde verleng. In die tweede EDI-wedstryd is Bangladesj op 70 uitgeboul, die derde laagste EDI-telling vir Bangladesj. Bangladesj is in dié wedstryd met 177 lopies verslaan. Daarna het Wes-Indië Bangladesj in die toetsreeks met 2–0 platgeloop, nadat hulle Bangladesj in die eerste toets met tien paaltjies en in die tweede toets met 296 lopies verslaan het. Bangladesj was uiteindelik tydens die Zimbabwiese besoek seëvierend en hulle het die toeriste in die toetsreeks met 3–0 platgeloop. In die EDI-reeks het Bangladesj Zimbabwe met 5–0 ook platgeloop.

Suksesse in toetskrieket

Mushfiqur Rahim het Bangladesj in sy geskiedkundige oorwinning in die 100ste toetswedstryd oor Sri Lanka en hul eerste toetsoorwinnings oor beide Engeland en Australië aangevoer

Die kwarteindstryd tussen Bangladesj en Indië tydens die Krieketwêreldbeker 2015

Met die koms van die nuwe jaar het die Bengaalse veelsydige Shakib Al Hasan as beste veelsydige in al die krieket verskyn. Dit was die eerste keer wat ’n speler hierdie prestasie behaal het, nadat die IKR die nuwe spelerranglys ingevoer het. Tydens die groepfase van die Krieketwêreldbeker 2015 in Australië en Nieu-Seeland het Bangladesj Afghanistan in hul eerste wedstryd verslaan, en hul volgende wedstryd teen Australië is uitgereën. Hulle is toe deur Sri Lanka met 92 lopies geklop. Daarna het Bangladesj sy hoogste suksesvolle EDI-lopiejaag aangeteken, nadat hulle Skotland se teiken van 318 suksesvol ingehaal het. Ná hul oorwinning oor Engeland het Bangladesj vir die eerste keer die kwarteindrondte gehaal. In die kwarteindstryd het Indië Bangladesj maklik met 109 lopies verslaan en hulle uit die toernooi geskakel.

In April–Mei 2015 het Pakistan vir ’n volle reeks na Bangladesj getoer. Bangladesj het die EDI-reeks met 3–0 gewen en sy eerste reeksoorwinning oor Pakistan aangeteken. Die enigste T20I-wedstryd is ook deur Bangladesj gewen. Pakistan het egter die toetsreeks beklink (met 1–0), nadat hulle in die eerste toetswedstryd onbeslis gespeel en die tweede toetswedstryd met 328 lopies gewen het. In Junie 2015 het ’n Indiese volstoomspan vir ’n eenmalige toetswedstryd en drie EDI-wedstryde na Bangladesj getoer. Tydens die toetswedstryd was die Indiese span te sterk, maar swaar reënonderbrekings het ’n beslissende uitslag verhoed (net 184.2 boulbeurte is gespeel). Uitstekende prestasies deur die kolwer en EDI-nuwelingbouler Mustafizur Rahman het die tafeldoek omgedraai en Bangladesj die eerste twee EDI-wedstryde maklik laat wen en hulle het sodoende vir die eerste keer ’n bilaterale reeks teen Indië gewen (met 2–1). In Julie 2015 het Suid-Afrika Bangladesj vir twee T20Is, drie ODIs en twee toetswedstryde besoek. Suid-Afrika het Bangladesj in die T20I-reeks platgeloop (met 2–0) en in die EDI-reeks voorgeloop, nadat hulle die eerste wedstryd gewen het. Bangladesj het egter volstoom teruggekom en Suid-Afrika in die twee volgende wedstryde heeltemal oorheers – geen van albei spanne kon in die hele EDI-reeks meer as 200 lopies in ’n beurt aanteken nie – en sodoende die EDI-reeks met 2–1 gewen, hul eerste reeksoorwinning oor Suid-Afrika nog. Nadat swaar moesonreën albei wedstryde ingekort het (onderskeidelik 221 en 88.1 boulbeurte is gespeel), is die tweetoetsreeks gedeel (met 0–0).

Bangladesj se sterk EDI-vertonings sedert die Krieketwêreldbeker 2015 en hul oorwinnings tydens EDI-reekse oor Pakistan, Indië en Suid-Afrika, het hulle van die negende tot die sewende plek in die EDI-ranglys geneem. Nadat hulle op 30 September 2015 (die sperdatum) op die sewende plek was, het hulle bo Wes-Indië vir die Kampioenetrofee 2017 gekwalifiseer. In November 2015 het Zimbabwe vir drie EDIs en twee T20Is na Bangladesj getoer; Bangladesj het die EDI-reeks met 3–0 gewen en die T20I-reeks met 1–1 gedeel. Dié toer is in Januarie 2016 met ’n verdere T20I-reeks van vier wedstryde voortgesit en dié reeks is weer met 2–2 gedeel.

Bangladesj het sy goeie prestasies voortgesit en tydens die Asiatiese Beker 2016 tuis as naaswenner geëindig. Hulle het die eerste wedstryd van die groepfase teen Indië verloor, maar hulle het agtereenvolgens teen die Verenigde Arabiese Emirate, Sri Lanka (die destydse verdedigende T20I-wêreld- en Asiatiese kampioen) en Pakistan gewen en vir die tweede keer die eindstryd gehaal. Hulle is egter weer maklik deur Indië verslaan. Bangladesj het egter nie ’n noemenswaardige deurbraak tydens die T20I-wêreldbeker 2016 in Indië gemaak nie. Oorwinnings oor twee assosiaatlede (Nederland en Oman) en die uitgereëne wedstryd teen ’n verdere assosiaatlid (Ierland) tydens die groepfase het hulle tot die Super 10 laat vorder. Bangladesj het tuis toe getrek nadat hulle tydens die Super 10-fase in al die vier wedstryde deur die volle lede Pakistan, Australië, Indië en Nieu-Seeland verslaan is.

In EDI het Bangladesj aanhou suksesvol bly en hulle het in September–Oktober 2016 die tuisreeks teen Afghanistan beklink (met 2–1). Dit is opgevolg met die Engelse toer na Bangladesj, waartydens Bangladesj die EDI-reeks met 1–2 verloor het. Hulle het egter ’n geskiedkundige toetsoorwinning (met 108 lopies) oor Engeland aangeteken, hul eerste oorwinning in tien probeerslae, en die toetsreeks met 1–1 gedeel, nadat hulle in die eerste toetswedstryd naelskraap met 22 lopies verslaan is. Bangladesj het in Desember 2016 vir ’n volle reeks na Nieu-Seeland getoer. Bangladesj het dié toer met ’n 3–0-platloop in die EDI-reeks begin en die koms van die nuwe jaar 2017 het ’n soortgelyke 3–0-platloop in die T20I-reeks gesien. Aansluitend is Bangladesj in die toetsreeks met 2–0 verslaan. Hulle het egter in die eerste toetswedstryd die 123-jaar oue rekord vir die hoogste beurttotaal in toetse gebreek, nadat hulle in die eerste toets teen Nieu-Seeland 595/8 (ná verklaring) aangeteken het. Hulle het tydens die toer al hul wedstryde verloor (met 0–8). In Februarie 2017 het Bangladesj vir die eerste toetswedstryd tussen albei spanne op Indiese bodem na dié buurland getoer. Indië het dié wedstryd maklik met 208 lopies gewen, nadat hulle albei beurte verklaar het. Die volgende taak vir Bangladesj was in Maart–April 2017 ’n verdere toer na Sri Lanka. Bangladesj is in die eerste toetswedstryd maklik met 259 lopies verslaan. Hulle was egter in staat om die toetsreeks met 1–1 gelykop te laat eindig, nadat hulle die tweede toetswedstryd met vier paaltjies gewen het. Dit was Bangladesj se eerste toetsoorwinning oor Sri Lanka. Beide die EDI- en die T20I-reeks is met 1–1 gedeel. In Mei 2017 het Bangladesj tydens die Drienasiesreeks in Ierland ná twee oorwinnings tweede geëindig.

Bangladesj het die Kampioenetrofee 2017 met ’n nederlaag in die openingswedstryd teen die gasheer Engeland begin. Ná ’n uitgereëne wedstryd teen Australië het hulle vir die eerste keer die halfeindstryd gehaal, maar hulle is deur Indië maklik met nege paaltjies verslaan. In Augustus–September 2017 het Australië vir ’n tweetoetsreeks na Bangladesj getoer. Die gasheer Bangladesj het sy eerste toetsoorwinning oor Australië aangeteken, nadat hulle die toeriste in die eerste wedstryd met 20 lopies verslaan het. Bangladesj was egter nie in staat om dié toetsreeks te beklink nie, nadat Australië die tweede toets met nege paaltjies gewen en die toetsreeks met 1–1 onbeslis geëindig het. In September–Oktober 2017 het Bangladesj vir twee toets-, drie EDI- en twee T20I-wedstryde na Suid-Afrika getoer en hulle is met 0–7 platgeloop. Die Proteas was te sterk vir Bangladesj en hierdie wedstryde was ’n baie eensydige aangeleentheid, waartydens verskeie nuwe span- en spelerrekorde opgestel is. Bangladesj het in die toetswedstryde met 333 lopies en ’n beurt en 254 lopies onderskeidelik verloor. Laasgenoemde was die hoogste toetsoorwinning vir Suid-Afrika. Suid-Afrika het die eerste EDI met tien paaltjies gewen, nadat hulle die hoogste EDI-teiken (279) gejaag het sonder om ’n paaltjie af te staan. In die laaste twee EDIs het Bangladesj swak met 104 en 200 lopies verloor. Later het Bangladesj die twee T20Is met 20 lopies en 83 lopies verloor. Gedurende die tweede T20I het David Miller die vinnigste T20I-honderdtal nog aangeteken. Nietemin het Bangladesj tydens die toer vir die Krieketwêreldbeker 2019 gekwalifiseer, aangesien hulle op die sperdatum (30 September 2017) die sewende plek van die EDI-ranglys beklee het.

Shakib Al Hasan het Mushfiqur Rahim as Bangladesj se toetskaptein vervang en dié taak in Januarie 2018 met die volgende Sri Lanka-toer begin beklee. Mahmudullah is as onderkaptein benoem en hy het by Tamim Iqbal oorgeneem. Oortuigende oorwinnings tydens die Driereeks tuis oor die laergeplaaste teenstanders Sri Lanka en Zimbabwe in die eerste drie groepwedstryde het Bangladesj na die eindstryd geneem. Bangladesj het tydens dié toernooi sy hoogste EDI-oorwinning (163 lopies) oor Sri Lanka aangeteken, hulle is egter in die laaste groepwedstryde teen Sri Lanka op 82 lopies uitgeboul (hul negende minste EDI-telling) en is met tien paaltjies verslaan. Hulle het in die eindstryd teen Sri Lanka te staan gekom en met 79 lopies verloor wat hul wenlose reeks van toernooi-eindstryde verleng het. Die eerste toetswedstryd teen Sri Lanka het in ’n onbeslis met ’n hoë telling geëindig. In die tweede toets is Bangladesj met 215 lopies binne-in drie dae verslaan en hulle het die toetsreeks met 0–1 verloor. Bangladesj het ook die T20I-reeks met 0–2 verloor.

Deurbraak in internasionale toernooie

Die Bengaalse span tydens ’n oefensessie op Sher-e-Bangla Nasionale Krieketstadion

Steve Rhodes tydens sy ampstermyn as Bengaalse hoofafrigter

Bangladesj is in die eindstryd van die Nidhas-trofee, ’n driehoekige T20I-toernooi in Sri Lanka in Maart, deur Indië verslaan, nadat hulle tydens die groepfase die gasheer twee keer geklop en sodoende die eindstryd gehaal het. Bangladesj is tydens die T20I-reeks teen Afghanistan in Indië met 3–0 platgeloop, nadat hulle onderskeidelik met 45 lopies, ses paaltjies en een lopie verslaan is. Dit was Bangladesj se eerste T20I-nederlaag en hul eerste verlore T20I-reeks teen Afghanistan. Bangladesj het ’n laagtepunt bereik toe hulle in die eerste toetswedstryd teen Wes-Indië in North Sound op 43 uitgeboul is (hul laagste telling in toetswedstryde) en dié toetswedstryd met ’n beurt en 219 lopies verloor het. Later het Bangladesj die tweede toetswedstryd met 166 lopies en sodoende die toetsreeks met 0–2 verloor. Hulle het egter in die kleiner formate goed presteer en beide die EDI- en die T20I-reeks met 2–1 beklink.

Bangladesj het sy Asiatiese Beker 2018-veldtog met ’n oorwinning oor Sri Lanka met 137 lopies begin, hul hoogste EDI-telling weg. Hoewel hulle in die volgende wedstryd deur Afghanistan verslaan is (met 136 lopies – Bangladesj se ergste EDI-nederlaag teen Afghanistan), het hulle tot die Super 4 gevorder. Bangladesj het tydens die Super 4-fase met sewe paaltjies teen Indië verloor, naelskraap met drie lopies teen Afghanistan gewen en Pakistan met 37 lopies verslaan en sodoende die eindstryd gehaal. Tydens dié eindstryd is hulle met drie paaltjies deur Indië verslaan wat hul wenlose reeks van toernooi-eindstryde voortgesit het. In Oktober–November het Bangladesj Zimbabwe vir drie EDI- en twee toetswedstryde gehuisves. Bangladesj het die EDI-reeks met 3–0 gewen, terwyl die toetsreeks onbeslis met 1–1 geëindig het, nadat hulle in die eerste toetswedstryd in Sylhet verslaan is. In November–Desember het Wes-Indië vir ’n volle reeks na Bangladesj getoer. Bangladesj het die toetsreeks met 2–0 gewen. Nadat hulle Wes-Indië in die tweede toetswedstryd met ’n beurt en 184 lopies verslaan het, het Bangladesj sy eerste toetsoorwinning met ’n beurt aangeteken. Bangladesj het die EDI-reeks met 2–1 gewen, maar hulle is in die T20I-reeks met 2–1 verslaan. In Februarie–Maart 2019 het Bangladesj vir drie toets- en drie EDI-wedstryde na Nieu-Seeland getoer. Bangladesj is in die EDI-reeks met 3–0 platgeloop. Bangladesj het die eerste toetswedstryd in Hamilton met ’n beurt en 52 lopies verloor. Later het hulle die tweede toetswedstryd in Wellington met ’n beurt en 12 lopies verloor, nadat die eerste twee dae se spel uitgereën is. Die derde toetswedstryd is ná die Christchurch-aanval van 2019, wat die span naelskraap vrygespring het, afgelas.

Bangladesj het sy eerste EDI-toernooi-eindstryd op 17 Mei 2019 in Dublin gewen, nadat hulle Wes-Indië tydens die Drienasiesreeks 2019 se eindstryd met vyf paaltjies verslaan het (volgens die DLS-metode). Bangladesj het die eindstryd gemaak nadat hulle tydens die ligafase Wes-Indië tweekeer en Ierland eenkeer verslaan het. Hoewel hulle die Krieketwêreldbeker 2019 in Engeland met hoë verwagtinge betree het, het Bangladesj ná drie oorwinnings (teen Suid-Afrika, Wes-Indië en Afghanistan) net die agtste plek gehaal en sodoende versuim om tot die halfeindstryd te vorder.

Vestiging in internasionale krieket

Bangladesj het in November sy eerste dag/nagtoets teen Indië op Eden Gardens gespeel

Die Suid-Afrikaner Russell Domingo was van 2019 tot 2022 Bangladesj se hoofafrigter

T20I-wedstryd tussen Bangladesj en Afghanistan in Dhaka, 2022

Bangladesj is in September 2019 in ’n eenmalige toets teen Afghanistan in Chittagong verslaan, maar in die Driereeks met Afghanistan en Zimbabwe het Bangladesj die eindstryd bereik nadat hulle drie van hul vier groepwedstryde gewen het. Die eindstryd teen Afghanistan is egter uitgereën. Bangladesj het in Oktober–November vir drie T20I-wedstryde en twee toetswedstryde na Indië getoer. Bangladesj het sy Wêreldtoetskampioenskap met dié toetsreeks begin. Net enkele dae voor die toer is Bangladesj se toets- en T20I-kaptein Shakib Al Hasan deur die IKR vir twee jaar geskors, nadat hy die IKR se gedragskode rakende ongemelde kontak met beroepswedders gebreek het. Vervolgens is Mominul Haque as toets- en Mahmudullah as T20I-kaptein benoem. Bangladesj het die eerste T20I in Delhi met sewe paaltjies gewen, maar hulle het die twee oorblywende wedstryde onderskeidelik met agt paaltjies en 30 lopies verloor. Bangladesj het albei toetswedstryde met beurte verloor, nadat die kolwers versuim het om munt te slaan. Die tweede toetswedstryd was die eerste dag/aandtoetswedstryd tussen albei spanne. In Februarie 2020 het Zimbabwe na Bangladesj getoer en die gasheer het die eenmalige toetswedstryd met ’n beurt en 106 lopies gewen; dit is Bangladesj se tweede toetsoorwinning met ’n beurt. Bangladesj het die EDI-reeks met 3–0 beklink en Mortaza het in die derde wedstryd van dié reeks sy 50ste EDI-oorwinning as kaptein aangeteken.

In Januarie 2021 het Bangladesj teen Wes-Indië in sy eerste internasionale reeks sedert die wêreldwyd Covid-19-pandemie gespeel. Die EDIs was deel van die eerste Krieketwêreldbekersuperliga 2020–2023. Bangladesj het die EDI-reeks met 3–0 beklink. Die twee toetswedstryde was deel van die eerste Wêreldtoetskampioenskap 2019–2021. Wes-Indië het die eerste toetswedstryd met drie paaltjies gewen, nadat hulle 395 lopies suksesvol gejaag het, tot dusver die hoogste suksesvolle lopiejag in Asië en die vyfhoogste in toetskrieket. Die gaste het ook die tweede toetswedstryd met 17 lopies gewen, Bangladesj se eerste tuisplatloop in toetskrieket sedert 2012/13. In Maart 2021 het Bangladesj vir drie EDIs en T20Is elk na Nieu-Seeland getoer; hulle is in albei reekse egter met 3–0 verslaan. In die daaropvolgende maand het Bangladesj Sri Lanka vir twee toetswedstryde besoek. Die eerste toetswedstryd het met ’n hoë telling onbeslis geëindig, waardeur Bangladesj sy eerste punte in die Wêreldtoetskampioenskap se tabel ingepalm het. Bangladesj is egter in die tweede toetswedstryd met 209 lopies verslaan en hulle het die toetsreeks met 0–1 verloor. ’n Maand later het Bangladesj Sri Lanka vir drie EDIs ontvang. Bangladesj het die eerste wedstryd met 33 lopies en die tweede met 103 lopies gewen, waardeur hulle vir die eerste keer ’n EDI-reeks teen Sri Lanka beklink het. Hulle is in die derde EDI egter met 97 lopies verslaan.

In Julie 2021 het Bangladesj Zimbabwe vir ’n eenmalige toets, drie EDIs en vyf T20Is besoek. Bangladesj het die toetswedstryd met 220 lopies maklik gewen, nadat Mehidy Hasan Miraz in die eerste beurt vyf paaltjies en in die tweede beurt vier paaltjies geneem het. In dié wedstryd het drie kolwers honderdtalle aangeteken: Mahmudullah, Shadman Islam en Najmul Hossain Shanto; Mahmudullah was die beste kolwer met 150 onoorwonne lopies. Bangladesj het die EDI-reeks met 3–0 gewen, waardeur hulle vir die eerste keer sedert 2009 ’n oorsese reeks skoonskip gewen het. In die eerste EDI het hulle Zimbabwe met 155 lopies verslaan, terwyl Shakib Al Hasan met sy 270ste paaltjie Bangladesj se beste paaltjienemer in EDIs geword het. Hulle het die ander twee EDIs onderskeidelik met drie en vyf paaltjies gewen. Die eerste T20I van die T20I-reeks was Bangladesj se 100ste wedstryd in dié formaat wat hulle met agt paaltjies gewen het, waardeur hulle ná Australië en Pakistan die derde span geword het wat hul 100ste wedstryd in al die krieket gewen het. Nadat hulle die tweede wedstryd verloor en die derde gewen het, het hulle die reeks met 2–1 beklink. Daarmee het Bangladesj vir die eerste keer ’n toer in al die krieket gewen (toets, EDI en T20I).

In Augustus 2021 het Australië Bangladesj vir vyf T20Is besoek. In die eerste wedstryd het Bangladesj sy eerste oorwinning teen Australië met 23 lopies in dié formaat aangeteken. Eweneens het Bangladesj die twee aansluitende wedstryde onderskeidelik met vyf paaltjies en tien lopies gewen, waarmee hulle dié reeks reeds beklink het. Dit was die eerste keer wat Bangladesj Australië in agtereenvolgende wedstryde kon verslaan en sy eerste T20I-reeks teen dié teenstander gewen het. Hulle is egter in die vierde T20I met drie paaltjies verslaan. Hulle het die vyfde en laaste T20I met 60 lopies gewen, nadat hulle die teenstander op 62 lopies uitgeboul het, die laagste telling nog teen Bangladesj. Aansluitend het Nieu-Seeland Bangladesj vir dieselfde aantal T20Is besoek. In die eerste wedstryd het Bangladesj Nieu-Seeland op net 60 lopies uitgeboul, waardeur die rekord vir die laagste telling teen Bangladesj ingehaal is; dit was ook Bangladesj se eerste T20I-oorwining oor dié teenstander. Hulle het ook dié reeks met 3–2 beklink, waardeur hulle hul eerste T20I-reeks teen Nieu-Seeland gewen het.

Die T20I-wêreldbeker 2021 in Oman en die Verenigde Arabiese Emirate het vir Bangladesj met ’n verrassende nederlaag in die eerste rondte teen die assosiaatlid Skotland met ses lopies begin. Hulle het herstel en die ander twee assosiaatlede in hul groep – Oman en Papoea-Nieu-Guinee – verslaan en sodoende tot die Super 12 gevorder. In dié rondte het die Bengale egter al hul wedstryde teen Sri Lanka, Engeland, Wes-Indië, Suid-Afrika en Australië verloor en sodoende laaste in hul groep geëindig. Tydens die T20I-wêreldbeker 2022 se Super 12 in Australië het Bangladesj teen Nederland en Zimbabwe gewen, terwyl hulle deur Suid-Afrika, Indië en Pakistan verslaan is, waarmee die span uit dié toernooi geskakel is. Tydens die Asiatiese Beker 2023 in Pakistan en Sri Lanka het die span die Super 4 gehaal, maar hulle is deur die twee gashere verslaan, waarop hulle ’n troosoorwinning teen die latere kampioen Indië kon behaal. Die Krieketwêreldbeker 2023 se groepfase in Indië het ook teleurstellend verloop en die Bengale kon slegs Afghanistan en Sri Lanka klop, terwyl hulle teen Engeland, Nieu-Seeland, Indië, Suid-Afrika, Nederland, Pakistan en Australië verloor het. As ’n troosprys kon hulle vir die Kampioenetrofee 2025 in Pakistan kwalifiseer. Tydens die T20I-wêreldbeker 2024 in die Verenigde State en Wes-Indië kon die span in die eerste rondte sy eerste T20I-wêreldbekeroorwinning oor Sri Lanka aanteken, waarna hulle deur Suid-Afrika geklop is en beide Nederland en Nepal kon verslaan, waarmee hulle die Super Agt gehaal het. In die Super Agt het Bangladesj egter teen Australië, Indië en – vir die eerste keer ooit – Afghanistan vasgeval.

Kleure

Die Bengaalse krieketspan op pad kleedkamers toe op die Sher-e-Bangla-krieketstadion in Dhaka

Die tier (Panthera tigris tigris), Bangladesj se nasionale tier en naamgewer van die Bengaalse nasionale krieketspan

In toetswedstryde dra Bangladesj wit krieketkleurte met die BKR se kenteken op die linkerbors en die borg se kenteken op die regterbors. Veldwerkers dra ’n donkergroen pet of ’n wit breedgerande sonhoed. Die helms is ook donkergroen. In die kleiner formate dra Bangladesj ’n groen trui met rooi as tweede kleur en die BKR se kenteken op die bors en die borg se kenteken in die middel en BANGLADESH onder in rooi letters geskryf, die veldwerkers dra ’n groen bofbalpet met rooi aksente of ’n groen breedgerande sonhoed. Gedurende IKR-toernooie verskyn die borg se kenteken op die linkermou. Tydens die Krieketwêreldbeker 1999 het Bangladesj ’n olyfgroentrui met geel aksente en ’n horisontale streep met ’n tierstreepmotief op die bors gedra. Op 6 September 2018 het Unilever Bangladesj vir die tydperk tussen 2018 en 2020 die span se borg geword.

Die Bengaalse nasionale krieketspan se bynaam is The Tigers, genoem na die nasionale dier van Bangladesj, die tier. Die Bengaalse Krieketraad se kenteken toon derhalwe ’n tier.

Tydperk	Truiverskaffer	Truiborg
1971–1999	–
Krieketwêreldbeker 1999	Asics	Veetee
2000–2004	AJ Sports	Beximco
Krieketwêreldbeker 2003		Mobil 1
2005–2008	Ihsan Sports	Grameenphone
2009–2011	Bata
2012–2015	–	Sahara
2015		PRAN Frooto
2016–2017	BRAC Bank	Robi
2018–2020		Lifebuoy
2020		Akash DTH
2021–2022	Akash DTH	Beximco
	e-food	Evaly
	Hungrynaki	Daraz

Tuisstadions

Bangabandhu

Osmani

MA Aziz

Shaheed Chandu

Sheikh Abu Naser

Sher-e-Bangla

SIC

ZAC

Bengaalse krieketstadions wat reeds toetswedstryde gehuisves het

Net soos ander vername krieketlande soos Australië, Engeland, Ierland, Indië, Nieu-Seeland, Pakistan, Sri Lanka, Suid-Afrika, Wes-Indië en Zimbabwe beskik Bangladesj oor geen amptelike tuisstadion vir sy nasionale span nie. Die Bengaalse nasionale krieketspan gebruik vir hul krieketwedstryde eerder ’n verskeidenheid stadions dwarsdeur Bangladesj.

Die Bengaalse nasionale krieketspan het tot dusver agt tuisstadions tydens toetswedstryde gebruik:

No.	Stadion	Plek	Eerste toets
1	Bangabandhu Nasionale Stadion	Dhaka	1 Januarie 1955 (as Pakistan) 10 November 2000 (as Bangladesj)
2	M. A. Aziz-stadion	Chittagong	15 November 2001
3	Zahur Ahmed Chowdhury-stadion	Chittagong	28 Februarie 2006
4	Shaheed Chandu-stadion	Bogra	8 Maart 2006
5	Narayanganj Osmani-stadion	Fatullah	9 April 2006
6	Sher-e-Bangla Nasionale Krieketstadion	Dhaka	25 Mei 2007
7	Khulna Afdelingsstadion	Khulna	21 November 2012
8	Sylhet Internasionale Krieketstadion	Sylhet	3 November 2018

Krieketwêreldbekerstadions

Die hoofartikels vir hierdie afdeling is: Kampioenetrofee 1998, Krieketwêreldbeker 2011, T20I-wêreldbeker 2014 en Krieketwêreldbeker 2031.

Die Sher-e-Bangla Nasionale Krieketstadion in Mirpur, Dhaka

Die Krieketwêreldbeker 2011 is deur Indië, Sri Lanka en Bangladesj saam aangebied. Oorspronklik is ook wedstryde in Pakistan beplan, maar dié land is ná die 2009-aanval op die Sri Lankaanse nasionale krieketspan van sy gasheerregte ontneem. Indië het 29 wedstryde op ag verskeie plekke gehuisves, terwyl Sri Lanka twaalf wedstryde op drie plekke en Bangladesj ag wedstryde op twee plekke aangebied het. Die meeste van die drie gashere se wedstryde is tuis gespeel. Bangladesj het al sy wedstryde op óf die Zohur Ahmed Chowdhury-stadion in Chittagong óf die Sher-e-Bangla Nasionale Krieketstadion in Dhaka gespeel. Daarbenewens is laasgenoemde vir twee kwarteindstryde gebruik. Daarbenewens het Bangladesj al vername internasionale kriekettoernooie soos die Kampioenetrofee 1998 en die T20I-wêreldbeker 2014 aangebied.

Saam met Indië sal Bangladesj die Krieketwêreldbeker 2031 aanbied.

Internasionale toere

Soos gebruiklik sedert die begin van internasionale krieket, onderneem die Bengaalse nasionale krieketspan deels maandelange oorsese toere, waartydens hulle teen ander nasionale spanne, plaasliksaamgestelde spanne en klubspanne speel. Eweneens huisves hulle ander nasionale spanne wat na Bangladesj toer. Gedurende die plaaslike somer tree hulle as gasheer op of onderneem op hul beurt toere deur die ander krieketlande van die Noordelike Halfrond en gedurende die plaaslike winter onderneem hulle toere deur krieketlande van die Suidelike Halfrond. As deel hiervan ding Bangladesj in toetskrieket sedert 2017 teen Indië om die Ganguly-Durjoy-trofee mee.

Spelers

Spelerstatistieke

Altesaam het vir Bangladesj 104 spelers toets-, 148 spelers EDI- en 90 spelers T20I-wedstryde gespeel. Vervolgens die spelers, wat vir die Bengaalse span die meeste lopies aangeteken en die meeste paaltjies geneem het.

Lopies

Toets				EDI				T20I
Speler	Tydperk	Toetse	Lopies	Speler	Tydperk	EDIs	Lopies	Speler	Tydperk	T20Is	Lopies
Mushfiqur Rahim	2005–2023	88	5 676	Tamim Iqbal	2007–hede	243	8 357	Shakib Al Hasan	2006–hede	129	2 551
Tamim Iqbal	2008–2023	70	5 134	Mushfiqur Rahim	2006–hede	271	7 792	Mahmudullah	2007–hede	138	2 394
Shakib Al Hasan	2007–hede	67	4 505	Shakib Al Hasan	2006–2023	247	7 570	Litton Das	2015–hede	089	1 943
Mominul Haque	2013–hede	61	4 058	Mahmudullah	2007–hede	232	5 386	Tamim Iqbal	2007–2020	074	1 701
Habibul Bashar	2000–2008	50	3 026	Mohammad Ashraful	2001–2013	175	3 468	Mushfiqur Rahim	2006–2022	102	1 500
Korrek teen: 25 Junie 2024				Korrek teen: 25 Junie 2024				Korrek teen: 25 Junie 2024

Paaltjies

Toets				EDI				T20I
Speler	Tydperk	Toetse	Paaltjies	Speler	Tydperk	EDIs	Paaltjies	Speler	Tydperk	T20Is	Paaltjies
Shakib Al Hasan	2007–hede	67	237	Shakib Al Hasan	2006–2023	247	317	Shakib Al Hasan	2006–hede	129	149
Taijul Islam	2014–hede	46	195	Mashrafe Mortaza	2001–2020	218	269	Mustafizur Rahman	2015–hede	103	128
Mehidy Hasan Miraz	2016–hede	43	164	Abdur Razzak	2004–2014	153	207	Taskin Ahmed	2014–hede	067	072
Mohammad Rafique	2000–2008	33	100	Mustafizur Rahman	2015–hede	104	164	Shoriful Islam	2021–hede	041	046
Mashrafe Mortaza	2001–2009	36	078	Rubel Hossain	2009–2021	104	129	Abdur Razzak	2006–2014	034	044
Korrek teen: 25 Junie 2024				Korrek teen: 25 Junie 2024				Korrek teen: 25 Junie 2024

Spankapteins

Tot op hede was 13 spelers reeds die kaptein vir Bangladesj tydens ’n toetswedstryd, 16 tydens ’n EDI en elf tydens ’n T20I.

Toets			EDI		T20I
No.	Naam	Tydperk	Naam	Tydperk	Naam	Tydperk
1	Naimur Rahman	2000–2001	Gazi Ashraf	1986–1990	Shahriar Nafees	2006
2	Khaled Mashud	2001–2004	Minhajul Abedin	1990	Mohammad Ashraful	2007–2009
3	Khaled Mahmud	2003	Akram Khan	1995–1998	Shakib Al Hasan	2009–2023
4	Habibul Bashar	2004–2007	Aminul Islam	1998–2000	Mushfiqur Rahim	2011–2014
5	Mohammad Ashraful	2007–2009	Naimur Rahman	2000–2001	Mashrafe Mortaza	2014–2017
6	Mashrafe Mortaza	2009	Khaled Mashud	2001–2006	Mahmudullah	2018–2022
7	Shakib Al Hasan	2009–2023	Khaled Mahmud	2003	Litton Das	2021
8	Mushfiqur Rahim	2011–2017	Habibul Bashar	2004–2007	Nurul Hasan	2022
9	Tamim Iqbal	2017	Rajin Saleh	2004	Mosaddek Hossain	2022
10	Mahmudullah	2018–2019	Mohammad Ashraful	2007–2009	Saif Hassan	2023
11	Mominul Haque	2019–2022	Shakib Al Hasan	2009–2023	Najmul Hossain Shanto	2023–hede
12	Litton Das	2023	Mashrafe Mortaza	2010–2020
13	Najmul Hossain Shanto	2023–hede	Mushfiqur Rahim	2011–2014
14			Tamim Iqbal	2019–2023
15			Litton Das	2022–2023
16			Najmul Hossain Shanto	2023–hede

Rekords

Toetsrekord teen ander lande

Teenstander	Gespeel	Gewen	Verloor	Gelykop	Onbeslis	% Gewen	Eerste oorwinning
Afghanistan	2	1	1	0	0	50,00	18 Junie 2023
Australië	6	1	5	0	0	16,67	30 Augustus 2017
Engeland	10	1	9	0	0	10,00	30 Oktober 2016
Ierland	1	1	0	0	0	100,00	8 April 2023
Indië	13	0	11	0	2	0,00	–
Nieu-Seeland	19	2	14	0	3	10,52	5 Januarie 2022
Pakistan	13	0	12	0	1	0,00	–
Sri Lanka	26	1	20	0	5	3,84	19 Maart 2017
Suid-Afrika	14	0	12	0	2	0,00	–
Wes-Indië	20	4	14	0	2	20,00	13 Julie 2009
Zimbabwe	18	8	7	0	3	44,44	10 Januarie 2005
Algeheel	142	19	105	0	18	13,38	10 Januarie 2005
Rekords volledig tot en met toets #2515 op 30 Maart–3 April 2024. Laaste keer hersien op 25 Junie 2024.

Wêreldtoetskampioenskaprekord

Jaar	Uitslag
2019–2021	Negende plek
2021–2023	Negende plek
2023–2025	gekwalifiseer

EDI-rekord teen ander lande

Teenstander	Wedstryde	Gewen	Verloor	Gelykop	Onbeslis	% Gewen	Eerste oorwinning
t. Toetslande
Afghanistan	16	10	6	0	0	62,50	18 Februarie 2015
Australië	22	1	20	0	1	4,54	18 Junie 2005
Engeland	25	5	20	0	0	20,00	10 Julie 2010
Ierland	16	11	2	0	3	68,75	18 Maart 2008
Indië	41	8	32	0	1	19,51	26 Desember 2004
Nieu-Seeland	45	11	33	0	1	24,44	9 Oktober 2008
Pakistan	39	5	34	0	0	12,82	31 Mei 1999
Sri Lanka	57	12	43	0	2	21,05	22 Februarie 2006
Suid-Afrika	25	6	19	0	0	24,00	7 April 2007
Wes-Indië	44	21	21	0	2	47,72	26 Julie 2009
Zimbabwe	81	51	30	0	0	62,96	10 Maart 2004
t. Assosiaatlede
Bermuda	2	2	0	0	0	100,00	25 Februarie 2007
Kanada	2	1	1	0	0	50,00	28 Februarie 2007
Hongkong	1	1	0	0	0	100,00	16 Julie 2004
Kenia	14	8	6	0	0	57,14	17 Mei 1998
Nederland	3	1	2	0	0	33,33	14 Maart 2011
Skotland	4	4	0	0	0	100,00	24 Mei 1999
Verenigde Arabiese Emirate	1	1	0	0	0	100,00	24 Junie 2008
Algeheel	438	159	269	0	10	36,30	17 Mei 1998
Rekords volledig tot en met EDI #4745 op 18 Maart 2024. Laaste keer hersien op 25 Junie 2025. Wenpersentasies sluit geen uitslae uit en tel gelykop as ’n halwe oorwinning.

Krieketwêreldbekerrekord

Jaar	Uitslag
1975	Geen deelname
1979	Geen deelname
1983	Geen deelname
1987	Nie gekwalifiseer nie
1992	Nie gekwalifiseer nie
1996	Nie gekwalifiseer nie
1999	Groepfase
2003	Groepfase
2007	Super 8
2011	Groepfase
2015	Kwarteindrondte
2019	Groepfase
2023	Groepfase
2027	N.v.t.
2031	N.v.t.

Kampioenetrofeerekord

Jaar	Uitslag
1998	Geen deelname
2000	Uitspeelrondte
2002	Groepfase
2004	Groepfase
2006	Kwalifikasierondte
2009	Nie gekwalifiseer nie
2013	Nie gekwalifiseer nie
2017	Halfeindrondte
2025	gekwalifiseer
2029	N.v.t.

T20I-rekord teen ander lande

Teenstander	Wedstryde	Gewen	Verloor	Gelykop	Onbeslis	% Gewen	Eerste T20I-oorwinning
t. Toetslande
Afghanistan	12	5	7	0	0	41,66	16 Maart 2014
Australië	11	4	7	0	0	36,36	3 Augustus 2021
Engeland	4	3	1	0	0	75,00	9 Maart 2023
Ierland	8	5	2	0	1	62,50	18 Julie 2012
Indië	14	1	13	0	0	7,14	3 November 2019
Nieu-Seeland	20	4	15	0	1	20,00	1 September 2021
Pakistan	19	3	16	0	0	15,78	24 April 2015
Sri Lanka	17	6	11	0	0	35,29	28 Februarie 2016
Suid-Afrika	9	0	9	0	0	0,00	–
Wes-Indië	16	5	9	0	2	31,25	13 September 2007
Zimbabwe	25	17	8	0	0	68,00	28 November 2006
t. Assosiaatlede
Hongkong	1	0	1	0	0	0,00	–
Kenia	1	1	0	0	0	100,00	1 September 2007
Maleisië	1	1	0	0	0	100,00	4 Oktober 2023
Nederland	5	4	1	0	0	80,00	25 Julie 2012
Nepal	2	2	0	0	0	100,00	18 Maart 2014
Oman	2	2	0	0	0	100,00	13 Maart 2016
Papoea-Nieu-Guinee	1	1	0	0	0	100,00	21 Oktober 2021
Skotland	2	0	2	0	0	0,00	–
Verenigde Arabiese Emirate	3	3	0	0	0	100,00	26 Februarie 2016
Verenigde State	3	1	2	0	0	33,33	25 Mei 2024
Algeheel	176	68	104	0	4	38,63	28 November 2006
Rekords volledig tot en met T20I #2721 op 24 Junie 2024. Gelykop verwys na wedstryde wat deur ’n valbyl (soos ’n Superboulbeurt) beslis is. Wenpersentasies sluit geen uitslae uit en gelykop as ’n halwe oorwinning (ongeag die valbyl).

T20I-wêreldbekerrekord

Jaar	Uitslag
2007	Super 8
2009	Groepfase
2010	Groepfase
2012	Groepfase
2014	Super 10
2016	Super 10
2021	Super 12
2022	Super 12
2024	Super 8
2026	gekwalifiseer
2028	N.v.t.
2030	N.v.t.

Asiatiese Bekerrekord

Jaar	Uitslag
1984	Geel deelname
1986	Eerste rondte
1988	Eerste rondte
1990–91	Eerste rondte
1993	Toernooi afgelas
1995	Eerste rondte
1997	Eerste rondte
2000	Eerste rondte
2004	Super 4
2008	Super 4
2010	Eerste rondte
2012	Naaswenner
2014	Eerste rondte
2016	Naaswenner
2018	Naaswenner
2022	Eerste rondte
2023	Super 4

Eksterne skakels

• (bn) (en) Amptelike webwerf van die Bengaalse Krieketraad
• (en) BanglaCricket
• (en) Bangladesj op ESPNcricinfo
• (en) Bangladesj by die IKR