Namibiese nasionale krieketspan

in Wikipedia, die vrye ensiklopedie
Jump to navigation Jump to search
Namibië
Kenteken van die Namibiese nasionale krieketspan.svg
Kenteken van die Namibiese nasionale krieketspan
BynaamArende
KonferensieKrieket Namibië (CN)
Personeel
EDI-kapteinGerhard Erasmus
T20I-kapteinGerhard Erasmus
AfrigterVlag van Suid-Afrika Pierre de Bruyn
Internasionale Krieketraad
IKR-statusAssosiaatlid met EDI-status (1992)
IKR-streekAKV (Afrika)
IKR-ranglys Tans[1] Beste rang tot dusver
EDI18de15de (op 9 Januarie 2020)
T20I16de15de (op 10 Oktober 2019)
Internasionale eendagwedstryde
Eerste EDIt Vlag van Zimbabwe Zimbabwe op Harare Sportklub, Harare; 10 Februarie 2003
Laaste EDIt Vlag van Oman Oman op Sharjah-krieketstadion, Sharjah; 14 Maart 2022
EDIs Gespeel Gewen/Verloor
Algeheel[2]218/13 (38,09%)
(0 gelykop, 0 onbeslis)
Vanjaar[3]52/3
(0 gelykop, 0 onbeslis)
Krieketwêreldbeker-verskynings1/12 (eerste in 2003)
Beste uitslagGroepfase (in 2003)
Wêreldbeker-
kwalifiserings
6 (eerste in 1994)
Beste uitslagNaaswenner (in 2001)
Twintig20s
Eerste T20It Vlag van Ghana Ghana op Kyambogo-krieketovaal, Kampala; 20 Mei 2019
Laaste T20It Vlag van Indië Indië op Doebai Internasionale Krieketstadion, Doebai; 8 November 2021
T20Is Gespeel Gewen/Verloor
Algeheel[4]3021/9 (70,00%)
(0 gelykop, 0 onbeslis)
Vanjaar[5]00/0
(0 gelykop, 0 onbeslis)
T20I-wêreldbeker-verskynings1/7 (eerste in 2021)
Beste uitslagSuper 12 (in 2021)
T20I-WB-kwalifiserings3 (eerste in 2012)
Beste uitslagDerde plek (in 2012)
EDI- en T20I-klere

Die Namibiese nasionale krieketspan, met die bynaam “die Arende”,[6] is die nasionale krieketspan van Namibië en verteenwoordig dié land in internasionale krieket. Krieket word in Namibië deur Krieket Namibië (Engels: Cricket Namibia, CN) beheer. Namibië is sedert 1992 ’n assosiaatlid van die Internasionale Krieketraad (IKR),[7] en het in 2007 by die IKR se Hoëprestasieprogram aangesluit.[8] Namibië het aan die Krieketwêreldbeker 2003 in Suid-Afrika deelgeneem, maar al sy wedstryde verloor.[9] Hulle het tot dusver aan elke Interkontinentale Bekertoernooi deelgeneem. Saam met Kenia word Namibië tradisioneel as een van die sterker nasionale Afrika-krieketspanne na die toetsnasies Suid-Afrika en Zimbabwe beskou.

In onlangse jare het Namibiese krieket ’n sterk vordering gesien, veral danksy die groot invloed van die krieketnasie Suid-Afrika. Krieket is deur Suid-Afrika na die destydse mandaatgebied Suidwes-Afrika gebring en het daar gewildheid onder die bevolking verwerf, veral in die suide van dié land en rondom Windhoek, maar ook Namibië se nabyheid aan Suid-Afrika het gehelp om die spel in Namibië te laat ontwikkel. Namibië word tans as tweede beste span in Afrika, na die Suid-Afrikaanse Proteas en nog voor die toetsnasie Zimbabwe, beskou.[10] Vername Namibiese krieketspelers sluit in Neil Rossouw en Pieter Rossouw.

In April 2018 het die IKR besluit om aan al sy lede volle Twintig20-status toe te ken. Vervolgens sal elke T20I-wedstryd wat Namibië ná 1 Januarie 2019 teen ander IKR-lede speel, as volle T20I erken word.[11] Namibië is tans (Maart 2022) 18de op die eendagranglys en 16de op die Twintig20-wêreldranglys.[12][13] In Oktober 2019 het die Namibiese nasionale krieketspan tydens die T20I-wêreldbekerkwalifisering 2019 gekwalifiseer vir die T20I-wêreldbeker 2021, waar hulle in die eerste rondte hul eerste toernooi-oorwinnings teen Nederland en Ierland aangeteken en sodoende tot die Super Twaalf gevorder het, hul beste prestasie nog tydens ’n internasionale toernooi. Daarmee het hulle regstreeks vir die T20I-wêreldbeker 2022 gekwalifiseer.[14]

Beheerliggaam[wysig | wysig bron]

Krieket Namibië (Engels: Cricket Namibia, CN) is in 1989 gestig en verantwoordelik vir die reëling van krieket in Namibië.[15] In 1992 het hulle as ’n assossiaatlid by die Internasionale Krieketraad (IKR) aangesluit.[7]

Krieket Namibië bestuur al die Namibië-verteenwoordigende nasionale spanne, insluitende die mans, vroue en jeug. Hulle is ook verantwoordelik vir die bestuur en organisasie van EDI- en T20I-reekse teen ander spanne, en die reëling van internasionale wedstryde tuis. Daarbenewens is CN verantwoordelik vir inkomsteverkryging deur die verkoop van kaartjies, borgskappe en uitsaairegte, veral in verband met die Namibiese span.

Kinders en jongmense word reeds op skool aan krieket bekend gestel en na gelang van hul belangstelling en talent begin hul met hul afrigting.[16] Nes ander krieketnasies beskik Namibië oor ’n o/19-nasionale span wat aan die o/19-krieketwêreldbeker deelneem.[17]

Geskiedenis[wysig | wysig bron]

Voor onafhanklikheid[wysig | wysig bron]

Die eerste bekende krieketwedstryd is in 1909 in Windhoek gespeel, toe Namibië ’n Duitse kolonie was.[18] Met die Suid-Afrikaanse magsoorname tydens die Suidwes-Afrika-veldtog in die Eerste Wêreldoorlog het dié sport in die huidige Namibië begin versprei. Die eerste amptelike krieketwedstryd is in 1915 tussen Suid-Afrikaanse soldate en ’n plaaslike span uit Otjiwarongo gespeel.[19] Met die Suid-Afrikaanse besetting van Namibië (aanvanklik as ’n Volkebondmandaat) het krieket in ’n professionele sport begin ontwikkel. Teen 1930 is die Suidwes-Afrikaanse Krieketunie (Engels: South West Africa Cricket Union, SWACU) gestig en het wedstryde begin reël. In 1958 is die eerste internasionale wedstryde teen Suid-Afrika gespeel. Van 1961/62 af het Suidwes-Afrika aan die Suid-Afrikaanse toernooie deelgeneem.[20] Tussen 1962 en 1989 het hulle 130 wedstryde teen die Suid-Afrikaanse provinsies gespeel, van wie Suidwes-Afrika 31 gewen het.

Ná Suid-Afrika se Republiekwording in 1961 het dit die destydse Suidwes-Afrika as ’n integrale deel van sy staatsgebied begin beskou, waarvolgens die Verenigde Nasies Suid-Afrika van sy mandaat ontneem het, wat dit egter geïgnoreer het. Met die de facto-anneksasie is die rassistiese Apartheidswette, waarvolgens die Suid-Afrikaanse bevolkingsgroepe in “blanke” en “nieblanke” (onder die wetgewing gedefinieer as “swart”, “bruin” of “Indiërs”) geskei is, ook in Suidwes-Afrika geïmplementeer, waardeur “nieblankes” van alle sport uitgesluit is.[21] In dieselfde jaar het die Volksbevrydingsleër van Namibië (PLAN), ’n gewapende tak van die SWAPO, die Namibiese Onafhanklikheidsoorlog begin. Suidwes-Afrikaanse rebelle het die boikot van die Suid-Afrikaanse Apartheidsregime verwelkom en die Stop the seventy tour-veldtog ondersteun. Die ondertekening van die Gleneagles-ooreenkoms deur 33 lidlande van die Britse Statebond op 15 Junie 1977 het Suid-Afrika se sportiewe isolasie verder verskerp. As gevolg van die ooreenkoms is die land ten einde van stappe teen die apartheidspolitiek stelselmatig van die Britse Statebond se sportwêreld ontkoppel. In die ooreenkoms is ook voorsiening gemaak vir sanksies teen lidlande wat die ooreenkoms sou oortree, en instellings wat bewysbaar die Suid-Afrikaanse rasseskeiding ondersteun het, is uit alle internasionale sportgeleenthede uitgesluit.[22][23] Aangesien Namibië destyds as ’t ware as vyfde Suid-Afrikaanse provinsie bestuur is, is die plaaslike krieket ook geraak. In Januarie 1989 het Suidwes-Afrika sy laaste seisoen binne die Suid-Afrikaanse krieket gespeel. In April het die PLAN sy laaste gewapende opstand geloods en die Suidwes-Afrikaanse Krieketunie het sy bande met die Suid-Afrikaanse Krieketraad (Engels: South African Cricket Board, SACB) verbreek.

In 1989 is die Namibiese Krieketraad amptelik gestig.[24] In November 1989 het ’n Namibiese span Botswana besoek en in sy eerste internasionale wedstryde gespeel,[25] hoewel die beheerliggaam eers in 1992 by die Internasionale Krieketraad (IKR) aangesluit het.[7]

Ná onafhanklikheid[wysig | wysig bron]

Op die Namibiese Onafhanklikheidsdag, 21 Maart 1990, en die daaropvolgende dae het Gloucestershire teen die eerste saamgestelde Namibiese nasionale krieketspan gespeel, en die gasheer het alle drie sy wedstryde gewen.[26] Namibië het ook die volgende wedstryde teen Nederland in April gewen.[27] Voor die stigting van die vastelandse beheerliggaam, die Afrikakrieketvereniging (AKV), is ná twee skooltoere tussen Namibië en Botswana in 1989 en 1990 die SCSA Zone VI Cricket Federation gestig. In September 1991 is in in Windhoek die eerste AKV-toernooi aangebied, waaraan die gasheer, Botswana, Lesotho, Malawi, Zambië en die Universiteit van Oxford se krieketspan deelgeneem het.[28]

Die nasionale span kon nie vir die Krieketwêreldbeker 1992 kwalifiseer nie, aangesien hulle net voor die IKR-trofee 1990 onafhanklikheid verkry het. In 1994 het Namibië sy eerste deur die IKR erkende wedstryde tydens internasionale toernooie gespeel. Tydens sy eerste deelname aan ’n toernooi, die IKR-trofee 1994 in Kenia, het Namibië met die Philip Snow Plate sy eerste trofee gewen. Met hul derde plek in hul groep het hulle egter die Krieketwêreldbeker 1996 misgeloop. Drie jaar later het die IKR-trofee 1997 in Maleisië vir die Namibiese span teleurstellend verloop, waarvolgens hulle die Krieketwêreldbeker 1999 misgeloop het.

Eerste deelname aan ’n krieketwêreldbekertoernooi[wysig | wysig bron]

Namibië se pad na die Krieketwêreldbeker 2003 in Suid-Afrika het met die IKR-trofee 2001 in Kanada begin. Namibië het die eindstryd in Toronto gehaal, maar hulle het teen Nederland verloor; dit was egter genoeg om vir hul eerste krieketwêreldbekertoernooi te kwalifiseer.[29] Namibië het in April 2002 die IKR Sesnasies-uitdaging aangebied en in die vierde plek geëindig.[30] In September het die Afrikabeker vir Namibië teleurstellend verloop, nadat hulle in hul groep net Tanzanië geklop en in die vierde plek geëindig het,[31] enkele weke later het hulle vier wedstryde teen ’n tweede Zimbabwiese span verloor.[32] Tydens die toer na Kenia direk op die Zimbabwiese toer het hulle beter gevaar, toe Namibië Kenia in ’n EDI-reeks van vier wedstryde verslaan het.[33] Aansluitend het Namibië deelgeneem aan die Suid-Afrikaanse plaaslike EDI-krieket se hoogste vlak, die Standard Bank-beker, maar al sy vyf wedstryde verloor.[34] Bangladesj het in Januarie 2003 na Namibië getoer en die wedstrydreeks van vyf EDIs met 4–1 gewen.[35]

In sy eerste wedstryd tydens die Krieketwêreldbeker op 10 Februarie 2003 in Harare is Namibië deur Zimbabwe met 86 lopies verslaan; dit was die eerste EDI-wedstryd vir Namibië.[36] Namibië is ook in sy wedstryde, wat in Suid-Afrika aangebied is, deur Pakistan (met 171 lopies)[37] en deur Engeland (met 55 lopies) verslaan. Namibië kon in dié wedstryd egter goed tred hou, danksy Jan-Berrie Burger wat vir sy beurt van 85 lopies as “speler van die wedstryd” benoem is en aan Namibië amper ’n verrassende oorwinning besorg het.[38] Daarna is hulle deur Indië (met 181 lopies)[39] en die latere wêreldkampioen Australië (met 256 lopies) geklop,[40] destyds die hoogste EDI-telling, wat later tydens die Krieketwêreldbeker 2007 deur Indië met 257 lopies teen Bermuda oortref is.[41] Die toernooi is afgesluit met ’n nederlaag van 64 lopies teen die medekwalifiseerders Nederland.[42] In die wedstryd teen Engeland het Rudie van Vuuren die eerste Namibiese krieketspeler geword, wat vyf paaltjies in ’n EDI-wedstryd geneem het.[43] Toe hy met die Namibiese nasionale rugbyspan ook aan die Rugbywêreldbeker 2003 in Australië deelgeneem het, het hy die eerste sportlui geword wat in dieselfde jaar in twee verskillende sportkodes aan wêreldbekertoernooie deelgeneem het.[44] Ná die Krieketwêreldbeker het die belangstelling aan krieket in Namibië egter aansienlik afgeneem en dit is vir die daaropvolgende 18 jaar as ’n “sterwende sport” beskou.[45]

Ná die Krieketwêreldbeker[wysig | wysig bron]

In Augustus 2003 het die tweede Zimbabwiese span Namibië besoek. Die gasheer het die EDI-reeks met 2–1 gewen, maar hulle het albei driedaagse wedstryde verloor.[46] Tydens die teenbesoek in die daaropvolgende Januarie het Namibië die EDI-reeks van vyf wedstryde met 4–1 gewen; hulle het ook ’n wedstryd teen ’n Zimbabwiese o/19-span gewen.[47] In Februarie het Bangladesj Namibië besoek en die EDI-reeks van drie wedstryde beklink, terwyl die driedaagse wedstryd onbeslis geëindig het.[48] Daarna het Namibië vir die IKR Sesnasies-uitdaging 2004 die Verenigde Arabiese Emirate besoek. Namibië het volgens lopietempo in die derde plek geëindig, nadat hulle Kanada, Nederland en die Verenigde Arabiese Emirate verslaan, maar teen Skotland en die Verenigde State verloor het.[49] Tydens die Internasionale Beker 2004 het Namibië in twee wedstryde teen Kenia en Uganda gespeel, maar hulle het albei verloor.[50] Tussen dié twee wedstryde het hulle ’n Afrikanasiestoernooi in Zambië gewen.[51] In dieselfde jaar het hulle aan die Zimbabwiese nasionale EDI-toernooi deelgeneem en as naaswenner geëindig.[52] Tydens hul besoek aan Zimbabwe het hulle ook twee wedstryde teen die nasionale span gewen.[53] Daarop het die Engelse besoek aan Namibië vir twee wedstryde gevolg en die besoekers het albei wedstryde gewen.[54]

Aan die begin van 2005 het die tweede Zimbabwiese span Namibië besoek, maar hulle is in albei EDI-wedstryde geklop.[55] In April het die tweede Pakistanse span Namibië besoek en alle drie EDI-wedstryde gewen, voordat die driedaagse wedstryd onbeslis geëindig het.[56] Daarop het twee tuiswedstryde tydens die Interkontinentale Beker 2005 gevolg. Hoewel hulle, ná ’n oorwinning teen Uganda en ’n onbesliste wedstryd teen Kenia, in die groepfase onoorwonne gebly het, het hulle nie die halfeindstryd gehaal nie.[57] Vervolgens het Namibië Ierland vir die IKR-trofee 2005 besoek. Nadat hulle Denemarke in die uitspeelwedstryd geklop het, het Namibië dié toernooi in die sewende plek afgesluit.[58] Terug in Namibië het hulle einde Julie Nieu-Seeland gehuisves, maar hulle het albei wedstryde verloor,[59] van wie een wedstryd met net 29 lopies, nadat hulle ’n telling van 330/6 afgestaan het.[60] In Oktober dieselfde jaar het hulle die Interkontinentale Bekerhalfeindstryd aangebied, hoewel hulleself nie gekwalifiseer het nie. Tydens die aanbieding van die eindstryd het hulle ná hul uitskakeling vir twee EDI-wedstryde Bermuda besoek en albei wedstryde gewen. Dié reeks is egter deur omstrede voorvalle oorskadu, nadat die Bermudaanse span Namibië van rassistiese beledigings beskuldig en tydens die tweede wedstryd die veld verlaat het, nadat ’n stormloop aan uitsmyters teen die Bermudaanse laerordekolwers ontketen is.[61] Die Namibiese Krieketraad het die rassisme-aantygings ontken.[62]

Verdere ontwikkeling[wysig | wysig bron]

In Maart 2006 het Namibië Nepal gehuisves vir ’n uitdagingswedstryd om die agste en laaste kol in die Internasionale Beker 2006 se groepfase. Dié wedstryd het onbeslis geëindig, maar Namibië het nogtans vir die hooftoernooi gekwalifiseer, nadat hulle ’n voorsprong in die eerste beurt aangeteken het. In die groepfase in Mei het hulle egter teen Skotland in Aberdeen ’n beurtnederlaag gely, voordat hulle in Dublin deur Ierland met vyf paaltjies verslaan is.[63] Gedurende die Suid-Afrikaanse krieketseisoen 2006/07 het Namibië aan beide eersterangse en A-lys-krieket se tweede vlak, die Suid-Afrikaanse Lugdiens-uitdaging, deelgeneem. Namibië het in die driedaagse toernooigroep in die tweede plek[64] en in die EDI-toernooigroep in die derde plek geëindig, waarvolgens hulle die halfeindstryd met net een oorwinning te min misgeloop het.[65] Tussen hul wedstryde in dié toernooie het hulle in hul derde en laaste 2006-Interkontinentale Bekerwedstryd teen die Verenigde Arabiese Emirate gespeel en met ’n beurt gewen.[63] Op 1 April 2007 het hulle by die IKR se Hoëprestasieprogram aangesluit.[8] Namibië het nie vir die Krieketwêreldbeker 2007 gekwalifiseer nie.

In November en Desember 2007 het Namibië die Wêreldkrieketliga se afdeling twee gehuisves, waartydens hulle teen Argentinië, Denemarke, Oman, die Verenigde Arabiese Emirate en Uganda te staan gekom het. Hoewel Namibië drie van sy vyf groepwedstryde gewen het, het hulle nie die eindstryd gehaal nie. Namibië het eindelik Denemarke in die klein finale om die derde plek verslaan.[66] As een van die beste vier spanne tydens dié toernooi het Namibië tot die wêreldbekerkwalifisering 2009 gevorder, die laaste kwalifiseringstoernooi vir die Krieketwêreldbeker 2011, maar hulle het nie vir die hooftoernooi gekwalifiseer nie. Tussen Oktober 2007 en Februarie 2008 het Namibië weer aan die Suid-Afrikaanse plaaslike EDI-krieket se tweede vlak deelgeneem.[67] Namibië het in Oktober 2007 tydens die Interkontinentale Beker 2007/08 in ’n wedstryd teen Kanada gespeel; die oorblywende wedstryde teen Bermuda, Ierland, Kenia, Nederland, Skotland en die Verenigde Arabiese Emirate het in 2008 plaasgevind.[68]

Namibië het die Interkontinentale Skild 2009/10 gewen, nadat hulle die Verenigde Arabiese Emirate in Doebai met ses paaltjies verslaan het.[69] In 2011 het Namibië aan die Wêreldkrieketliga se afdeling twee deelgeneem en na die Verenigde Arabiese Emirate as naaswenner geëindig.[70] In Julie 2011 het Namibië aan die T20I-Wêreldkrieketliga se Afrika-afdeling een in Uganda deelgeneem en al sy agt groepwedstryde gewen, voordat hulle in die eindstryd deur die gasheer met ses paaltjies verslaan is.[71] Tydens dié toernooi het die veelsydige Louis van der Westhuizen 16 grenshoue in ’n onoorwonne beurt van 159 lopies aangeteken; Namibië het eindelik ’n spantotaal van 262/1 teen Kenia aangeteken. Tydens die Krieketwêreldbekerkwalifisering 2014 het Namibië nie vir die Krieketwêreldbeker 2015 gekwalifiseer nie.[72] In Januarie 2015 het hulle die Wêreldkrieketliga se afdeling twee aangebied en die eindstryd gehaal, waar hulle deur Nederland met agt paaltjies geklop is.[73] Vervolgens het hulle die Wêreldkrieketligakampioenskap 2015/17 gehaal, waar hulle in die laaste plek geëindig het en na afdeling twee afgegradeer is.

“Goue generasie”[wysig | wysig bron]

Die veelsydige David Wiese het van 2013 tot 2016 vir Suid-Afrika gespeel en sedert 2021 vir Namibië. Tydens die T20I-wêreldbeker 2021 het hy sy span na die Super Twaalf geneem[74]

In Desember 2017 het Namibië vir die eerste keer die Suid-Afrikaanse provinsiale EDI-uitdaging se eindstryd gehaal.[75] In Februarie 2018 het Namibië die Wêreldkrieketliga se tweede afdeling aangebied, waaraan ook Kenia, die Verenigde Arabiese Emirate, Nepal, Kanada en Oman deelgeneem het.[75] Namibië het die klein finale om die derde plek gehaal, waar hulle deur Kanada verslaan is en sodoende die Krieketwêreldbeker 2019 misgeloop het.[76] Tydens die Wêreldkrieketliga se afdeling twee in 2019 het die Namibiese krieketspan vir die T20I-wêreldbeker 2021 en die Wêreldkrieketliga 2 2019/23, die Krieketwêreldbeker 2023 se voorkwalifisering gekwalifiseer, waarmee hulle EDI-status ontvang het.[77] Nadat hulle EDI-status ontvang het, het die Namibiese nasionale krieketspan tydens die IKR se “jaarlikse ontwikkelingstoekennings” in Julie 2020 die “medelid se prestasie van die jaar”-toekenning vir opkomende krieketnasies ontvang.[78] Met hul herwinning van EDI-status en daarmee gepaardgaande suksesse het die Namibiërs weer in krieket begin belangstel.[45] Namibië word intussen as die tweede beste Afrikaspan na Suid-Afrika en nog voor die toetsnasie Zimbabwe beskou.[10]

Tydens die T20I-wêreldbeker 2021 in Oman en die Verenigde Arabiese Emirate het Namibië vir die eerste keer aan dié toernooi deelgeneem. In hul openingswedstryd het hulle Nederland verslaan en aansluitend ’n verrassende oorwinning teen die volle lid Ierland aangeteken, waarmee hulle die tweede rondte, die Super Twaalf, gehaal het.[79] Dit was Namibië se eerste oorwinnings tydens ’n wêreldbeker en hul oorwinning teen Ierland was hul eerste teen ’n toetsnasie.[80] In die Super Twaalf het hulle net daarin geslaag om Skotland te klop (hul eerste oorwinning in die tweede rondte van ’n wêreldbeker), terwyl hulle in al die ander vier wedstryde deur Afghanistan, Pakistan, Nieu-Seeland en Indië geklop en sodoende uit dié toernooi geskakel is.[81] Hul troosprys was hul regstreekse kwalifisering vir die T20I-wêreldbeker 2022 in Australië.[14] In November 2021 is Namibië saam met Suid-Afrika en Zimbabwe as medegasheer vir die Krieketwêreldbeker 2027 benoem. Tydens dié toernooi sal vir die eerste keer krieketwêreldbekerwedstryde in Namibië aangebied word.[82]

Kleure, kenteken en bynaam[wysig | wysig bron]

Kenteken van Krieket Namibië

In EDI- en T20I-krieket dra Namibiese spelers helderblou truie met donkerblou moue en ’n rooi V-halslyn en donkerblou broeke. Veldspelers dra ’n donkerblou bofbalpet met rooi kleuraksente of ’n donkerblou sonhoed. Die kolwers se helms is op ’n soortgelyke manier geverf. Gedurende IKR-toernooie verskyn die borg se embleem op die regtermou en die belettering NAMIBIA verskyn op die middel van die trui.

Krieket Namibië se kenteken toon ’n rooi krieketbal voor twee geboë blou lyne, terwyl die Namibiese nasionale krieketspan se kenteken ’n in blou gestiliseerde visarend met die belettering NAMIBIA daarbo toon. Die Namibiese nasionale krieketspan se bynaam is “die Arende”, ontleen aan die Namibiese wapendier, die visarend.[6]

Tuisstadions[wysig | wysig bron]

Ligging van Namibiese krieketstadions

Namibië beskik oor geen amptelike tuisstadion vir sy nasionale span nie. Die Namibiese nasionale krieketspan span vir hul krieketwedstryde eerder ’n verskeidenheid stadions dwarsdeur Namibië in:

No. Stadion Plek Eerste wedstryd
1 Sparta-krieketklubveld Walvisbaai 5 Januarie 2019
2 Wanderers-krieketveld Windhoek 27 April 2019
3 Affiespark Windhoek 27 April 2019
4 United Ground Windhoek 19 Augustus 2019

Krieketwêreldbekerstadions[wysig | wysig bron]

Saam met Suid-Afrika en Zimbabwe sal Namibië die Krieketwêreldbeker 2027 aanbied.[82]

Spelers[wysig | wysig bron]

Spelerstatistieke[wysig | wysig bron]

Altesaam 36 spelers EDI- en 21 spelers T20I-krieket vir Namibië gespeel. Vervolgens die spelers, wat vir die Namibiese span die meeste lopies aangeteken en die meeste paaltjies geneem het.

Lopies[wysig | wysig bron]

EDI T20I
Speler Tydperk EDIs Lopies Speler Tydperk T20Is Lopies
Gerhard Erasmus 2019–hede 13 497 Gerhard Erasmus 2019–hede 30 673
Craig Williams 2019–hede 15 461 Craig Williams 2019–hede 27 627
JJ Smit 2019–hede 15 432 Stephan Baard 2019–hede 22 593
JP Kotze 2019–hede 08 299 JJ Smit 2019–hede 26 441
Zane Green 2019–hede 10 282 Niko Davin 2019–hede 16 335
Korrek teen: 22 Maart 2022[83] Korrek teen: 22 Maart 2022[84]

Paaltjies[wysig | wysig bron]

EDI T20I
Speler Tydperk EDIs Paaltjies Speler Tydperk T20Is Paaltjies
JJ Smit 2019–hede 15 26 Jan Frylinck 2019–hede 27 44
Jan Frylinck 2019–hede 15 21 Bernard Scholtz 2019–hede 27 31
Bernard Scholtz 2019–hede 14 14 JJ Smit 2019–hede 26 23
Zhivago Groenewald 2019–2019 04 11 Christi Viljoen 2019–2019 12 20
Ruben Trumpelmann 2021–hede 07 10 Gerhard Erasmus 2019–hede 30 13
Korrek teen: 22 Maart 2022[85] Korrek teen: 22 Maart 2022[86]

Spankapteins[wysig | wysig bron]

Tot op hede het drie spelers as kaptein vir Namibië tydens ’n EDI-wedstryd fungeer en twee tydens ’n T20I.[87]

EDI[88] T20I[89]
No. Naam Tydperk Naam Tydperk
1 Deon Kotzé 2003 Stephan Baard 2019
2 Gerhard Erasmus 2019–2022 Gerhard Erasmus 2019–hede
3 JJ Smit 2021

Rekords[wysig | wysig bron]

EDI-rekord teen ander lande[wysig | wysig bron]

Teenstander Wedstryde Gewen Verloor Gelykop Onbeslis % Gewen Eerste oorwinning
t. Toetsnasies
Vlag van Australië Australië 1 0 1 0 0 0,00
Vlag van Engeland Engeland 1 0 1 0 0 0,00
Vlag van Indië Indië 1 0 1 0 0 0,00
Vlag van Pakistan Pakistan 1 0 1 0 0 0,00
Vlag van Zimbabwe Zimbabwe 1 0 1 0 0 0,00
t. Assosiaatlede
Vlag van Nederland Nederland 1 0 1 0 0 0,00
Vlag van Oman Oman 7 5 2 0 0 71,42 27 April 2019
Vlag van Papoea-Nieu-Guinee Papoea-Nieu-Guinee 2 2 0 0 0 100,00 22 September 2019
Vlag van Verenigde Arabiese Emirate Verenigde Arabiese Emirate 4 0 4 0 0 0,00
Vlag van Verenigde State van Amerika Verenigde State 2 1 1 0 0 50,00 20 September 2019
Algeheel 21 8 13 0 0 38,09 27 April 2019
Rekords volledig tot en met EDI #4374 op 22 Maart 2022. Laaste keer hersien op 22 Maart 2022. Wenpersentasies sluit geen uitslae uit en tel gelykop as ’n halwe oorwinning.[90]

Wêreldbekerrekord[wysig | wysig bron]

Jaar Uitslag
1975 Nie in aanmerking nie – nie ’n IKR-lid nie
1979 Nie in aanmerking nie – nie ’n IKR-lid nie
1983 Nie in aanmerking nie – nie ’n IKR-lid nie
1987 Nie in aanmerking nie – nie ’n IKR-lid nie
1992 Nie in aanmerking nie – nie ’n IKR-lid nie
1996 Nie gekwalifiseer nie
1999 Nie gekwalifiseer nie
2003 Groepfase: 14/14
2007 Nie gekwalifiseer nie
2011 Nie gekwalifiseer nie
2015 Nie gekwalifiseer nie
2019 Nie gekwalifiseer nie
2023 N.v.t.

T20I-rekord teen ander lande[wysig | wysig bron]

Teenstander Wedstryde Gewen Verloor Gelykop Onbeslis % Gewen Eerste T20I-oorwinning
t. Toetsnasies
Vlag van Afghanistan Afghanistan 1 0 1 0 0 0,00
Vlag van Ierland Ierland 2 1 1 0 0 50,00 22 Oktober 2021
Vlag van Indië Indië 1 0 1 0 0 0,00
Vlag van Nieu-Seeland Nieu-Seeland 1 0 1 0 0 0,00
Vlag van Pakistan Pakistan 1 0 1 0 0 0,00
Vlag van Sri Lanka Sri Lanka 1 0 1 0 0 0,00
t. Assosiaatlede
Vlag van Bermuda Bermuda 1 1 0 0 0 100,00 23 Oktober 2019
Vlag van Botswana Botswana 5 5 0 0 0 100,00 22 Mei 2019
Vlag van Ghana Ghana 1 1 0 0 0 100,00 20 Mei 2019
Vlag van Kenia Kenia 1 1 0 0 0 100,00 25 Oktober 2019
Vlag van Nederland Nederland 2 1 1 0 0 50,00 20 Oktober 2021
Vlag van Oman Oman 1 1 0 0 0 100,00 29 Oktober 2019
Vlag van Papoea-Nieu-Guinee Papoea-Nieu-Guinee 3 1 2 0 0 33,33 10 Oktober 2021
Vlag van Singapoer Singapoer 1 1 0 0 0 100,00 20 Mei 2019
Vlag van Skotland Skotland 3 3 0 0 0 100,00 27 Oktober 2021
Vlag van Uganda Uganda 4 4 0 0 0 100,00 21 Mei 2019
Vlag van Verenigde Arabiese Emirate Verenigde Arabiese Emirate 1 1 0 0 0 100,00 5 Oktober 2021
Algeheel 30 21 9 0 0 70,00 20 Mei 2019
Rekords volledig tot en met T20I #1496 op 5 Maart 2022. Gelykop verwys na wedstryde wat deur ’n valbyl (soos ’n Superboulbeurt) beslis is. Wenpersentasies sluit geen uitslae uit en gelykop as ’n halwe oorwinning (ongeag die valby).[91]

Twintig20-rekord[wysig | wysig bron]

Jaar Uitslag
2007 Nie gekwalifiseer nie
2009 Nie gekwalifiseer nie
2010 Nie gekwalifiseer nie
2012 Nie gekwalifiseer nie
2014 Nie gekwalifiseer nie
2016 Nie gekwalifiseer nie
2021 Super 12
2022 gekwalifiseer

Jeug[wysig | wysig bron]

Die Namibiese o/19-nasionale krieketspan is van die suksesvolstes op die vasteland van Afrika. Hulle het onder andere aan die o/19-krieketwêreldbeker 2006 deelgeneem en die ICC Africa U19 CWCQ in September 2010 in Windhoek gewen. Hulle het vir die o/19-krieketwêreldbeker 2012 gekwalifiseer en tydens die 2016-toernooi die kwarteindrondte gehaal, nadat hulle onder andere die verdedigende wêreldkampioen Suid-Afrika geklop het. Hulle het dié toernooi in ’n baie goeie sewende plek afgesluit.

Toekennings[wysig | wysig bron]

Die nasionale span het talle toekennings deur die Internasionale Krieketraad ontvang, onder andere:

  • 2009: PEPSI-ICC Africa Development Regional Award
    • Best Spirit of Cricket Initiative
    • Best Overall Cricket Development Programme
  • 2010: PEPSI-ICC Africa Development Regional Award
    • Best Spirit of Cricket Initiative
    • Best Overall Cricket Development Programme
    • Best Overall Cricket Promotion & Marketing Award
  • 2020: ICC’s Annual Development Awards
    • ICC Associate Member Men’s Performance of the Year Award

Rekorde[wysig | wysig bron]

Op 13 Julie 2011 het die Namibiese nasionale Krieketspan teen die Keniaanse nasionale krieketspan talle nieamptelike T20I-wêreldrekords opgestel,[92] waaronder met 262 lopies die meeste vir ’n paaltjie. Louis van der Westhuizen het met 159 lopies die hoogste individuelle telling aangeteken en met 16 grenshoue die meeste in ’n beurt gemoker, maar ook saam met Sarel Burger met 168 onoorwonne lopies die hoogste gesamentlike telling om die tweede paaltjie.[93] Hoewel dié wedstryd tydens ’n amptelike toernooi aangebied is (ICC Africa Region Division One Twenty20), is dié rekords nieamptelik, aangesien dit nie oor amptelike T20I-status beskik het nie.[94]

Sien ook[wysig | wysig bron]

Verwysings[wysig | wysig bron]

  1. (en) "ICC Rankings". Internasionale Krieketraad.
  2. (en) "ODI matches – Team records". ESPNcricinfo.
  3. (en) "ODI matches – 2022 Team records". ESPNcricinfo.
  4. (en) "T20I matches – Team records". ESPNcricinfo.
  5. (en) "T20I matches – 2022 Team records". ESPNcricinfo.
  6. 6,0 6,1 (en) "ICC T20 World Cup Africa Final – Unique Trophy Shoot Leaves Captains In Awe". Krieket Uganda. Geargiveer vanaf die oorspronklike op 16 Julie 2019. Besoek op 25 Februarie 2020.
  7. 7,0 7,1 7,2 (en) "Namibia". Cricket Archive. Geargiveer vanaf die oorspronklike op 30 April 2019.
  8. 8,0 8,1 (en) "Denmark added to ICC High Performance Program". ICC Europe Media Release. Cricket Europe. 20 Desember 2006. Geargiveer vanaf die oorspronklike op 27 September 2007.
  9. (en) "Australia rout India to retain World Cup". ESPNcricinfo. Besoek op 22 Maart 2022.
  10. 10,0 10,1 (en) "England's gold, Australia's fall, Pakistan's homecoming". ESPNcricinfo. 27 Desember 2019. Besoek op 22 Maart 2022.
  11. (en) "All T20 matches between ICC members to get international status". Internasionale Krieketraad. 26 April 2018. Geargiveer vanaf die oorspronklike op 3 November 2019. Besoek op 25 Februarie 2020.
  12. (en) "Men's ODI Team Rankings". Internasionale Krieketraad. 28 Februarie 2022. Besoek op 22 Maart 2022.
  13. (en) "Men's T20I Team Rankings". Internasionale Krieketraad. 28 Februarie 2022. Besoek op 22 Maart 2022.
  14. 14,0 14,1 (en) Firdose Moonda (22 Oktober 2021). "Namibia live out their desert dream". ESPNcricinfo. Besoek op 22 Maart 2022.
  15. (en) "About Us". Krieket Namibië. Besoek op 22 Maart 2022.
  16. (en) "Committee, Trials & Info". Krieket Namibië. Besoek op 22 Maart 2022.
  17. (en) Martin Williamson (11 Januarie 2006). "The Under-19 World Cup". ESPNcricinfo. Besoek op 22 Maart 2022.
  18. (en) "Associate Member – Cricket Namibia". Internasionale Krieketraad. Besoek op 22 Maart 2022.
  19. (en) Koos Van Zyl (2002). Namibian Cricket: A Tale of Guts and Glory. Gamsberg Macmillan. ISBN 978-99916-0-416-9.
  20. (en) "Miscellaneous Matches played by South West Africa". Cricket Archive. Geargiveer vanaf die oorspronklike op 18 Januarie 2022. Besoek op 19 Desember 2020.
  21. (en) Abdul Minty (April 1971). "International Boycott of Apartheid Sport". United Nations Unit on Apartheid.
  22. (en) "From Montreal to Gleneagles". New Zealand History. Minister van Kultuur en Erfenis. 11 April 2014. Besoek op 22 Maart 2022.
  23. (en) SAIRV: A Survey of Race Relations in South Africa 1977. Johannesburg 1978, bl. 563–564.
  24. (en) "History of Cricket Namibia". Krieket Namibië. Geargiveer vanaf die oorspronklike op 14 November 2012.
  25. (en) "The Namibian ― archives" (PDF). The Namibian. 14 Junie 2021. Besoek op 22 Maart 2022.
  26. (en) "Gloucestershire in Namibia 1989/90". Cricket Archive. Geargiveer vanaf die oorspronklike op 3 Oktober 2015. Besoek op 14 Junie 2021.
  27. (en) "Netherlands in Namibia 1989/90". Cricket Archive. Geargiveer vanaf die oorspronklike op 14 Oktober 2013. Besoek op 14 Junie 2021.
  28. (en) "History of African cricket association". ESPNcricinfo. Geargiveer vanaf die oorspronklike op 14 Junie 2021. Besoek op 14 Junie 2021.
  29. (en) "Scorecard of 2001 ICC Trophy Final". Cricket Archive. 15 Julie 2001. Geargiveer vanaf die oorspronklike op 1 Desember 2016. Besoek op 25 Februarie 2020.
  30. (en) "2002 ICC 6 Nations Challenge Points Table". Cricket Archive. Geargiveer vanaf die oorspronklike op 3 Maart 2016.
  31. (en) "2002 Africa Cup". Cricket Europe. Geargiveer vanaf die oorspronklike op 12 Junie 2012.
  32. (en) "Namibia in Zimbabwe 2002/03". Cricket Archive. Geargiveer vanaf die oorspronklike op 5 September 2013.
  33. (en) "Namibia in Kenya 2002/03". Cricket Archive. Geargiveer vanaf die oorspronklike op 5 November 2013.
  34. (en) "Standard Bank Cup 2002/03 Points Table". Cricket Archive. Geargiveer vanaf die oorspronklike op 4 Maart 2016.
  35. (en) "Bangladesh in Namibia 2002/03". Cricket Archive. Geargiveer vanaf die oorspronklike op 5 November 2013.
  36. (en) John Ward (10 Februarie 2003). "Zimbabwe beat Namibia and the weather". ESPNcricinfo. Besoek op 22 Maart 2022.
  37. (en) Agha Akbar (16 Februarie 2003). "Akram, Akhtar decimate Namibia in trial by fire". ESPNcricinfo. Besoek op 22 Maart 2022.
  38. (en) Stephen Lamb (19 Februarie 2003). "England still in contention after 55-run win". ESPNcricinfo. Besoek op 22 Maart 2022.
  39. (en) Anand Vasu (23 Februarie 2003). "Well-oiled Indian machine steamrolls Namibia". ESPNcricinfo. Besoek op 22 Maart 2022.
  40. (en) Keith Lane (27 Februarie 2003). "Records fall as Australia break the Namibian dream". ESPNcricinfo. Besoek op 22 Maart 2022.
  41. (en) "ODIs – Highest winning margins". ESPNcricinfo. Besoek op 22 Maart 2022.
  42. (en) Ralph Dellor (3 Maart 2003). "Dutch prove to be too strong for brave Namibia". ESPNcricinfo. Besoek op 22 Maart 2022.
  43. (en) "Records / Namibia / One-Day Internationals / Best bowling figures in an innings". ESPNcricinfo. Besoek op 22 Maart 2022.
  44. (en) Alex Gibbons (9 Januarie 2005). "The ten greatest sporting all-rounders". The Guardian. Besoek op 22 Maart 2022.
  45. 45,0 45,1 (en) Deivarayan Muthu (30 Oktober 2021). "Albie Morkel: 'Cricket was a dying sport in Namibia, but people have started watching again'". ESPNcricinfo. Besoek op 22 Maart 2022.
  46. (en) "Zimbabwe A in Namibia 2003/04". Cricket Archive. Geargiveer vanaf die oorspronklike op 5 November 2013.
  47. (en) "Namibia in Zimbabwe 2003/04". Cricket Archive. Geargiveer vanaf die oorspronklike op 5 November 2013.
  48. (en) "Bangladesh in Namibia 2003/04". Cricket Archive. Geargiveer vanaf die oorspronklike op 5 November 2013.
  49. (en) "2004 ICC 6 Nations Challenge". Cricket Europe. Geargiveer vanaf die oorspronklike op 30 Maart 2012.
  50. (en) "2004 Intercontinental Cup". Cricket Europe. Geargiveer vanaf die oorspronklike op 25 Februarie 2013. Besoek op 21 Januarie 2020.
  51. (en) "Points Table for 2004 African tournament". ESPNcricinfo. Besoek op 22 Maart 2022.
  52. (en) "Faithwear Clothing Inter-Provincial One-Day Competition 2004/05 Points Table". Cricket Archive. Geargiveer vanaf die oorspronklike op 9 April 2016.
  53. (en) "Namibia in Zimbabwe 2004/05". Cricket Archive. Geargiveer vanaf die oorspronklike op 5 November 2013.
  54. (en) "England in Namibia 2004/05". Cricket Archive. Geargiveer vanaf die oorspronklike op 5 November 2013.
  55. (en) "Zimbabwe A in Namibia 2004/05". Cricket Archive. Geargiveer vanaf die oorspronklike op 5 November 2013.
  56. (en) "Pakistan A in Namibia 2004/05". Cricket Archive. Geargiveer vanaf die oorspronklike op 5 November 2013.
  57. (en) "2005 ICC Intercontinental Cup". Cricket Europe. Geargiveer vanaf die oorspronklike op 2 Februarie 2014.
  58. (en) "Scorecard of Denmark v Namibia". Cricket Archive. 11 Julie 2005. Geargiveer vanaf die oorspronklike op 3 Junie 2019. Besoek op 25 Februarie 2020.
  59. (en) "New Zealand in Namibia 2005/06". Cricket Archive. Geargiveer vanaf die oorspronklike op 5 November 2013.
  60. (en) "Scorecard of Namibia v New Zealand". Cricket Archive. 30 Julie 2005. Geargiveer vanaf die oorspronklike op 23 November 2016. Besoek op 25 Februarie 2020.
  61. (en) "Racism, rows and a walk-off tarnish 'friendly' one-dayers". ESPNcricinfo. 30 Oktober 2005. Besoek op 22 Maart 2022.
  62. (en) "Bermuda's allegations 'rejected with contempt'". ESPNcricinfo. 4 November 2005. Besoek op 22 Maart 2022.
  63. 63,0 63,1 (en) "2006 ICC Intercontinental Cup". Cricket Europe. Geargiveer vanaf die oorspronklike op 24 Februarie 2013. Besoek op 21 Februarie 2020.
  64. (en) "2006/07 South African Airways Provincial Three-Day Challenge points table". Cricket Archive. Geargiveer vanaf die oorspronklike op 4 Maart 2016.
  65. (en) "2006/07 South African Airways Provincial One-Day Challenge points table". Cricket Archive. Geargiveer vanaf die oorspronklike op 4 Maart 2016.
  66. (en) "UAE finish top of the pile". ESPNcricinfo. 2 Desember 2007. Besoek op 22 Maart 2022.
  67. (en) Andrew Nixon (29 Junie 2007). "Namibia to continue in South African provincial cricket". Cricket Europe. Geargiveer vanaf die oorspronklike op 4 Maart 2016.
  68. (en) "ICC Intercontinental Cup 2007–2008". Geargiveer vanaf die oorspronklike op 14 Februarie 2014. Besoek op 21 Julie 2007.
  69. (en) "ICC Intercontinental Shield 2009–10". Geargiveer vanaf die oorspronklike op 29 September 2012. Besoek op 10 Mei 2011.
  70. (en) "World Cricket League Division 2: Dubai, April 2011". Geargiveer vanaf die oorspronklike op 1 April 2014. Besoek op 10 Mei 2011.
  71. (en) "ICC World Twenty20 Qualifier". Geargiveer vanaf die oorspronklike op 7 Januarie 2010. Besoek op 14 Maart 2012.
  72. (en) "UAE and Scotland one win from World Cup". ESPNcricinfo. 28 Januarie 2014. Besoek op 22 Maart 2022.
  73. (en) "Rippon stars as Netherlands take title". ESPNcricinfo. 24 Januarie 2015. Besoek op 22 Maart 2022.
  74. (en) "David Wiese". ESPNcricinfo. Besoek op 22 Maart 2022.
  75. 75,0 75,1 (en) Helge Schütz (19 Desember 2017). "Namibia Cricket Year Review". The Namibian. Geargiveer vanaf die oorspronklike op 9 Oktober 2019. Besoek op 25 Februarie 2020.
  76. (en) "Canada defend 247 to claim third place". ESPNcricinfo. 15 Februarie 2018. Besoek op 22 Maart 2022.
  77. (en) "Hard work, courage pays off as Namibia claim ODI status". Internasionale Krieketraad. 27 Julie 2020. Besoek op 22 Maart 2022.
  78. (en) Isaac Lockett (28 Julie 2020). "ICC recognises the work of Associates in annual Development Awards announcements". Emerging Cricket. Besoek op 22 Maart 2022.
  79. (en) Hemant Brar (22 Oktober 2021). "Wiese, Erasmus the heroes as Namibia qualify for the Super 12s". ESPNcricinfo. Besoek op 22 Maart 2022.
  80. (en) Nick Friend (20 Oktober 2021). "Namibia's moment, with a sprinkling of David Wiese's stardust". The Cricketer. Besoek op 22 Maart 2022.
  81. (en) Andrew Voerman (6 November 2021). "Late batting surge sets Black Caps up to beat Namibia at Twenty20 World Cup". Stuff. Besoek op 22 Maart 2022.
  82. 82,0 82,1 (en) Nagraj Gollapudi (16 November 2021). "USA co-hosts for 2024 T20 WC, Pakistan gets 2025 Champions Trophy, India and Bangladesh 2031 World Cup". ESPNcricinfo. Besoek op 22 Maart 2022.
  83. (en) "Records / Namibia / One-Day Internationals / Most Runs". ESPNcricinfo. Besoek op 22 Maart 2022.
  84. (en) "Records / Namibia / Twenty20 Internationals / Most Runs". ESPNcricinfo. Besoek op 22 Maart 2022.
  85. (en) "Records / Namibia / One-Day Internationals / Most Wickets". ESPNcricinfo. Besoek op 22 Maart 2022.
  86. (en) "Records / Namibia / Twenty20 Internationals / Most Wickets". ESPNcricinfo. Besoek op 22 Maart 2022.
  87. Die tydperk verwys na die ooreenstemmende krieketseisoen waarin die eerste of laaste wedstryd van die tyd as kaptein plaasgevind het
  88. (en) "Namibia / Records / One-Day Internationals / List of Captains". ESPNcricinfo. Besoek op 22 Maart 2022.
  89. (en) "Namibia / Records / Twenty20 Internationals / List of Captains". ESPNcricinfo. Besoek op 22 Maart 2022.
  90. (en) "Records / Namibia / ODI matches / Result summary". ESPNcricinfo. 22 Maart 2022. Besoek op 22 Maart 2022.
  91. (en) "Records / Namibia / Twenty20 Internationals / Result summary". ESPNcricinfo. 5 Maart 2022. Besoek op 22 Maart 2022.
  92. (en) "Kenya continue to disappoint". ESPNcricinfo. 13 Julie 2011. Besoek op 22 Maart 2022.
  93. (en) "Namibia set world records against Kenya". Namibia Sport. 29 Januarie 2013. Geargiveer vanaf die oorspronklike op 28 November 2011. Besoek op 27 Januarie 2017.
  94. (en) "ICC Classification of Official Cricket" (PDF). Internasionale Krieketraad. Geargiveer vanaf die oorspronklike (PDF) op 6 November 2012.

Verdere leesstof[wysig | wysig bron]

  • (en) Koos van Zyl (2002). Namibian Cricket: A Tale of Guts and Glory. Gamsberg Macmillan. ISBN 978-99916-0-416-9.

Eksterne skakels[wysig | wysig bron]