Brasiliaanse nasionale rugbyspan

in Wikipedia, die vrye ensiklopedie
Jump to navigation Jump to search
Brasilië
Brasiliaanse Rugbykonfederasie.svg
Unie Brasiliaanse Rugbykonfederasie
Bynaam(e) Tupi’s
Embleem Tupí-hoofman
Stigting 1972
Stadion Pacaembu-stadion, São Paulo
Kapasiteit 40 199
President Eduardo Mufarej
Afrigter(s) Vlag van Argentinië Rodolfo Ambrosio
Kaptein(s) Felipe Sancery
Spankleure


Alt. kleure

Statistiek
Meeste toetse Moisés Duque (38)[1]
Meeste toetspunte Moisés Duque (194)[2]
Meeste drieë Daniel Sancery (13)[3]
Eerste internasionale wedstryd
Vlag van Uruguay Uruguay 8–6 Brasilië Vlag van Brasilië
(Montevideo, Uruguay; 9 September 1950)
Grootste oorwinning
Vlag van Costa Rica Costa Rica 0–95 Brasilië Vlag van Brasilië
(Lima, Peru; 16 Oktober 2006)
Grootste nederlaag
Vlag van Argentinië Argentinië 114–3 Brasilië Vlag van Brasilië
(San Pablo, Brasilië; 2 Oktober 1993)
Vlag van Argentinië Argentinië 111–0 Brasilië Vlag van Brasilië
(Santiago de Chile, Chili; 23 Mei 2012)
Amptelike webwerf
ww2.brasilrugby.com.br

Die Brasiliaanse nasionale rugbyspan met die bynaam Tupi’s[4] word deur die Brasiliaanse Rugbykonfederasie (Portugees: Confederação Brasiliera de Rugby) beheer. Brasilië is een van die stigterslede van CONSUR, nou bekend as Súdamerica Rugby, en het aan die inougurele Suid-Amerikaanse toernooi in 1951 deelgeneem. Brasilië het nog nie vir ’n Rugbywêreldbeker gekwalifiseer nie maar het in 2016 aan die seweskompetisie tydens die Olimpiese Spele deelgeneem. Brasilië is tans die derde beste span in Suid-Amerika (na Argentinië en Uruguay, en vyfde in die Amerikas.

Rugby in Brasilië het ’n lang geskiedenis wat na die laat 19de eeu terugdateer toe Britse immigrante die spel na die stedelike hawens van Brasilië geneem het. Ten spyte van Brasilië se sukses met sokker, was die land nog altyd een van die swakker spanne in die Amerikas met veel minder om op te roem as die spanne van Argentinië, Uruguay en Chili.

In die 21ste eeu is pogings aangewend om die sport in Brasilië te laat opleef. Brasilië is met die toevoeging van sewesrugby tot die Olimpiese kalender genooi om aan die Wêreldrugby Sewesreeks deel te neem met goeie vordering in die mans- en damesreekse. In 2016 het ’n vergadering tussen die unies van Argentinië, Brasilië, Kanada, Chili, Amerika en Uruguay die Amerikas Rugbykampioenskap begin as ’n kompetisie soortgelyk aan die Sesnasies-toernooi en Die Rugbykampioenskap om sodoende gereelde toetsrugby aan die topspanne van die streek te bied. Na drie taai wedstryde waarvan Brasilië twee byna gewen het, het hulle die Amerikaanse Arende met 24–23 gewen vir hulle eerste oorwinning in die toernooi, ’n eerste oorwinning oor die VSA én ’n eerste oorwinning oor ’n Vlak 2-span. Daarna het Brasilië die spanne van België en Portugal geklop vir hulle eerste oorwinning oor Europese spanne; hulle het boonop ook ’n eerste historiese oorwinning oor ’n Argentynse XV behaal. Die oorwinning oor die Argentynse span, saam met oorwinnings oor Chili en Colombia het in 2018 aan Brasilië hulle eerste titel in die Suid-Amerikaanse Rugbykampioenskap besorg.

Gedurende 2015–2017 het die beheerliggaam vir rugby in Brasilië (CBRu) ’n prys ontvang vir die beste bestuur van alle plaaslike sportbestuursliggame.

Geskiedenis[wysig | wysig bron]

Beginjare (19de eeu tot 1949)[wysig | wysig bron]

Die eerste rugbywedstryd in Brasilië is in die laat-19de eeu gespeel. Britse immigrante wat na Brasilië gekom het, het die spel na verskeie van die hawestede gebring. Hierdie immigrante het verskeie atletiekklubs opgerig wat ook as sokkerklubs gedien het.[5] Die eerste opgetekende rugbywedstryd in Brasilië is in 1891 onder toesig van Charles William Miller deur die São Paulo Atletiekklub (SPAC) gespeel. Hierna het Augusto Shaw pogings aangewend om die sport verder uit te brei nadat Miller hom eksklusief op sokker toegespits het.[6]

Gedurende die 1920’s en ’30’s het rugby in Brasilië begin floreer, maar dit het nie dieselfde blootstelling as sokker geniet nie. Rugby was grotendeels beperk tot diegene wat van Britse afkoms was of wat een of ander ander verbintenis met Brittanje gehad het. In 1926 is ’n plaaslike toernooi begin.[7] Teen 1932 is ’n nasionale span gekies en Brasilië het sy eerste internasionale wedstryd teen ’n Suid-Afrikaanse XV gespeel; die telling is nie bekend nie. Die sport het ’n terugslag ervaar die ’n poging om die as ’n nasionale sport erken te kry geweier is omdat rugby tot vier deelstate beperk is, waar die vereiste deelname in vyf deelstate was.[6] Die Tweede Wêreldoorlog het tussen 1941 en 1946, soos in talle ander lande, die sport bedwing.

1950’s tot 1990’s[wysig | wysig bron]

Brasilië het aan die heel eerste Suid-Amerikaanse Rugbykampioenskap in 1951 deelgeneem, maar al drie hul wedstryde verloor met onderskeidelik 68–0 teen Chili en 72–0 teen Argentinië en ’n 10–17 verlies teen Uruguay. Rugby is gedurende die 1950’s sporadies in Brasilië georganiseer; daar was geen amptelike bestuursliggaam nie en die nasionale span is slegs deur Jimme Macintyre, wat die SPAC bestuur het, saamgeroep. Brasilië sou eers weer in 1961 ’n toets speel. Die hedendaagse CBRu is in 1963 gestig om die spel in Brasilië meer effektief te bestuur. Die eerste president van die CBRu was Harry Donovan.[8] In 1964 het Brasilië tweede geëindig in die Suid-Amerikaanse Rugbykampioenskap met ’n gelykopuitslag teen Chili (16–16) en ’n sege teen Uruguay (15–8).

In die 1970’s het die verbeterde struktuur die spel aan Brasiliane buite die Brits-afgestamde gemeenskap begin bekendstel. Brasilië het ’n effense oplewing in rugby beleef; die spel is by universiteit regdeur die land begin speel en Brasilië het ’n bestemming vir rugbytoere geword. In 1974 het Brasilië in ’n toets teen Frankryk gespeel en met 7–99 verloor.[8] Vir die res van die dekade het Brasilië teen sy Suid-Amerikaanse bure gespeel en dikwels teen Paraguay gewen.

In 1985 het Frankryk weer deur Brasilië getoer maar teen ’n meer gedugte Brasiliaanse span te staan gekom. Die wedstryd het met ’n telling van 6–41 in die guns van Frankryk geëindig. Brasilië is ’n stigtingslid van CONSUR (nou Súdamerica Rugby) wat in 1989 gestig is. Ten spyte hiervan het Brasilië eers in 1995 amptelik by die Internasionale Rugbyraad aangesluit en gevolglik tot op daardie punt aan geen kwalifiserende toernooie deelgeneem nie. Hulle eerste kragmeting in ’n kwalifiserende wedstryd het egter rampspoedig afgeloop deurdat die span met 41–0 teen Trinidad en Tobago verloor het. Die het hulle veldtog tot ’n abrupte einde gebring.

2000’s – Die Nuwe Eeu[wysig | wysig bron]

Die Brasiliaanse en Peruaanse nasionale rugbyspanne in 2005

Brasilië het die 2000’s met meer sukses afgeskop. In 2000 het Brasilië die Suid-Amerikaanse Rugbykampioenskap met gemak gewen, en die sukses in 2001 herhaal in die toernooi teen Colombia, Peru en Venezuela. Brasilië het na die volgende kwalifiseringsronde deurgedring en Trinidad en Tobago maklik afgeskud; hoewel Brasilië hulle laaste wedstryde verloor het, het hulle eindelik begin om die gaping te begin verklein. Regdeur die 2000’s het Brasilië meer van sy wedstryde begin wen en in 2008 het die span eindelik deurgebreek; Brasilië het Paraguay geklop om vir die eerste maal sedert 1989 na die boonste vlak van die Suid-Amerikaanse Rugbykampioenskap te vorder. Brasilië het dieselfde in 2009 vermag.

In 2012 het die New York Times berig dat rugby die tweede vinnigste groeiende sportsoort in Brasilië was, na gemengde vegkuns. Dit is deels te danke aan Wêreldrugby wat weer in Brasilië belê het as gevolg van die herinstelling van (sewes)rugby by die Olimpiese spele in 2016.[9] Sedertdien is Brasilië genooi om aan die Wêreldrugby Sewesreeks deel te neem, waar die span teen sterker kompetisie kon meeding.

In 2014 het Brasilië sy heel eerste oorwinning oor Chili behaal en die Condores met 24–16 geklop. Sedert inisiatiewe in 2009 verskerp is, het die aard van rugby in Brasilië verander; heelwat meer spelers het begin registreer en die sport het suksesvolle borgskappe met maatskappye soos Bradesco, wat meen dat Brasiliaanse rugby in die toekoms winsgewend kan wees, aangegaan.[10]

In 2015 het Brasilië in twee toetse teen Duitsland gespeel, waarvan een wedstryd in die Pacaembu-stadion gespeel is. 10 000 toeskouers het hierdie wedstryde gekyk wat van die hoogste toeskouertal vir rugby in Brasilië is. Brasilië se verbetering het in 2016 getoon tydens die eerste weergawe van die Amerikas Rugbykampioenskap waar Brasilië op die randjie van historiese oorwinnings oor Chili en Uruguay gekom het, maar die nie kon deurvoer nie. Nadat Brasilië 25 punte in hul eerste ontmoeting teen Kanada aangeteken het, het die span met 24–23 teen die Verenigde State in Pacaembu gewen; Brasilië het egter in die eindstryd met 7–41 teen Argentinië verloor maar in die proses hul eerste drie in dekades teen Argentinië gedruk.

Vir die 2016-seisoen van die Suid-Amerikaanse Rugbykamipoenskap “A” het RedeTV!, een van Brasilië se groot televisienetwerke Brasilië se wedstryde regstreeks uitgesaai. Brasilië het op Allianz Parque in São Paulo, een van die grootste stadions om ’n rugbywedstryd in Brasilië aan te bied, teen Uruguay gespeel. Brasilië het ook met 20–20 teen Chili gelykop gespeel wat op hul verbetering in Suid-Amerikaanse rugby gedui het. Om die toernooi af te sluit het hulle met 32–21 teen Paraguay gewen en in die derde plek agter Chili geëindig op ’n punteverskil.

In 2017 het Brasilië nogmaals verbeter deur Chili oortuigend met 17–3 in die Amerikas Rugbykampioenskap te klop voor hulle hul eerste oorwinning oor Kanada in Pacaembu behaal het met ’n telling van 24–23. Na hierdie oorwinnings het Brasilië die 30ste plek op die Wêreldrugbyranglys behaal; die eerste maal sedert 2009 toe die lys ingestel is. Op 18 November 2017 het Brasilië vir die eerste maal oorwinning op Europese grondgebied gesmaak toe hulle België en Portugal geklop het, wat duit op die span se vordering in die 2010’s. Brasilië het later ook vir die eerste maal teen Chili in Chili gewen, en in 2018 se omskepte Suid-Amerikaanse Rugbykampioenskap het hulle teen Argentinië XV geseëvier, wat hulle eerste oorwinning oor ’n Argentynse span was. Brasilië het daarna ook teen Colombia gewen en het vir die eerste maal die titel van Suid-Amerikaanse kampioen gedra.

Uniforms[wysig | wysig bron]

Die span van Brasilië het tradisioneel ’n geel bostuk en groen broek gedra met ’n groen bostuk en wit broek vir wegwestryde. Die huidige verskaffer van die span se klere is Topper. In 2015 is die span se broekkleur na blou verander om ooreen te stem met die land se sokkerspan. Dit het ’n aanbieding waarby die Tupistam betrek is, ingesluit (waar die span se bynaam vandaan kom).[11] Die huidige truiborg van Brasilië is Banco Bradesco.

Bynaam[wysig | wysig bron]

Die Brasiliaanse nasionale rugbyspan is vir ’n geruime tyd lank nie-amptelik verbind met Walt Disney se karakter José Carioca. Die CBRu, toe dit nog as Associação Brasileira de Rugby oftewel ABR bekend was, het later die Amasonereusewaterlelie as amptelike embleem en bynaam aanvaar. Hierdie bynaam het egter nie aanklank by ondersteuners gevind nie.

In Maart 2012 het CBRu Os Tupis as Brasilië se nasionale rugbyspan se amptelike bynaam aangekondig.[4] Dit is ’n verwysing na die Tupistam, die grootste etniese groep van inheemse Brasiliane. Die keuse vir die embleem het in 2010 begin toe die CBRu e-posse met voorstelle begin ontvang het. Die drie finaliste was Tupi’s, Sucuri’s (anakondas) en Araras (aras). Ondersteuners het op die internet gestem met 47% van die stemme (4 387 stemme) wat aan Tupi’s gegaan het. Volgens Sami Arap, president van die CBRu tussen 2012 en 2016 het “die keuse die wortels van die Brasiliaanse nasie bekragtig. Tupi verteenwoordig die wese van ons land en verwys na ons krag, deursettingsvermoë, lojaliteit en spangees.”

Toernooirekords[wysig | wysig bron]

Rugbywêreldbeker[wysig | wysig bron]

Wêreldbekerrekord Wêreldbekerkwalifiseringrekord
Jaar Ronde S W G V Pte V Pte T S W G V PV PT
Vlag van AustraliëVlag van Nieu-Seeland 1987 Nie genooi
Vlag van Verenigde KoninkrykVlag van IerlandVlag van Frankryk 1991 Nie ingeskryf Nie ingeskryf
Vlag van Suid-Afrika 1995
Vlag van Wallis 1999 Nie gekwalifiseer 1 0 0 1 0 41
Vlag van Australië 2003 6 4 0 2 140 84
Vlag van Frankryk 2007 5 3 0 2 179 108
Vlag van Nieu-Seeland 2011 8 6 0 2 230 190
Vlag van Engeland 2015 5 1 0 4 85 164
Vlag van Japan 2019 6 2 1 3 160 139
Totaal 0/9 31 16 1 14 794 726

Amerikas Rugbykampioenskap[wysig | wysig bron]

Die Amerikas Rugbykampioenskap is in vyf van die sewe jaar tussen 2009 en 2015 gehou maar Brasilië het nie hieraan deelgeneem nie. Saam met Chili het Brasilië sedert 2016 aan ’n uitgebreide toernooi tussen ses lande deelgeneem. In Brasilië se eerste jaar van deelname het hulle, as 42ste gekeur die 16de gekeurde Amerika met 24–23 geklop in hulle eerste oorwinning oor dié land.

Toernooi Rekord Pte Versk Posisie Seges
2016 1–4 −68 5de Amerika (24–23)
2017 2–3 −116 4de Chili (17–3); Kanada (24–23)
2018 1–4 −96 5de Chili (16–14)
2019 2–3 −65 4de Chili (15–10); Kanada (18–10)

Suid-Amerikaanse Kampioenskap[wysig | wysig bron]

Toernooi Gasheer Rekord Pte Versk Posisie Seges Gelykop Verliese
2009 Vlag van Uruguay Uruguay 1–2 −129 4de Paraguay (36–21) Uruguay (3–71), Chili (3–79)
2010 Flag of Chile.svg Chili 1–2 −34 4de Paraguay (23–18) Uruguay (10–26), Chili (8–31)
2011 Vlag van Argentinië Argentinië 1–2 −3 4de Paraguay (51–14) Uruguay (18–39), Chili (6–25)
2012 Flag of Chile.svg Chili 0–3 −136 4de Uruguay (15–27), Chili (6–19), Argentinië (0–111)
2013 Vlag van Uruguay Uruguay 0–3 −150 4de Chili (22–38), Uruguay (7–58), Argentinië (0–83)
2014 (vier lande) 1–2 −24 3de Chili (24–16) Paraguay (24–31), Uruguay (9–34)
2015 (vier lande) 0–3 −77 4de Uruguay (9–48), Chili (3–32), Paraguay (11–17)
2016 (vier lande) 1–1–1 −11 3de Paraguay (32–21) Chili (20–20) Uruguay (14–36)
2017 (vier lande) 1–2 +32 3rd Paraguay (57–6) Uruguay (27–41), Chili (10–15)
2018 (Sesnasies) 3–0 +81 1ste Chili (28–12), Argentynse XV (36-33), Colombia (67-5)

Algehele rekord[wysig | wysig bron]

Brasilië het teen 3 Desember 2019 59 van hulle 156 toetswedstryde gewen, ’n wenrekord van 37,82%.[12]

Brasilië se toetsrekord teen alle lande: (Korrek op 3 Desember 2019)[12]

Opponent Gespeel Gewen Verloor Gelykop % Gewen Punte vir Punte teen Punteverskil
Vlag van Argentinië Argentinië 14 0 14 0 0 54 1096 –1042
Vlag van Argentinië Argentynse XV 3 1 2 0 33,33 51 140 –89
Vlag van België België 1 1 0 0 100 23 19 +4
Vlag van Chili Chili 27 4 21 2 14,81 324 870 –546
Vlag van Colombia Colombia 9 9 0 9 100 439 34 +405
Vlag van Costa Rica Costa Rica 1 1 0 0 100 95 0 +95
Vlag van Duitsland Duitsland 5 0 5 0 0 51 157 –106
Vlag van Frankryk Frankryk A 2 0 2 0 0 13 140 –127
Vlag van Georgië Georgiese XV 1 1 0 0 100 20 18 +2
Vlag van Hongkong Hongkong 1 0 1 0 0 3 37 –34
Vlag van Kanada Kanada 4 2 2 0 50 72 130 –58
Vlag van Kenia Kenia 2 0 2 0 0 42 45 –3
Vlag van Nieu-Seeland Māori All Blacks 1 0 1 0 0 3 35 –32
Vlag van Meksiko Meksiko 2 2 0 0 100 126 19 +107
Vlag van Engeland Oxford en Cambridge 2 0 2 0 0 13 102 –89
Vlag van Paraguay Paraguay 24 13 11 0 54,17 509 467 +42
Vlag van Peru Peru 9 9 0 0 100 404 58 +346
Vlag van Portugal Portugal 3 1 2 0 33,33 42 110 –68
Vlag van Roemenië Roemenië 2 0 2 0 0 26 78 –52
Vlag van Spanje Spanje 2 0 2 0 0 24 89 –65
Vlag van Trinidad en Tobago Trinidad en Tobago 5 4 1 0 80 75 71 +4
Vlag van Uruguay Uruguay 27 3 24 0 11,11 276 933 –657
Vlag van Verenigde Arabiese Emirate Verenigde Arabiese Emirate 1 1 0 0 100 66 3 +63
Vlag van Verenigde State van Amerika Verenigde State 4 1 3 0 25 71 150 –79
Vlag van Venezuela Venezuela 9 8 1 0 88,89 258 95 +163
Totaal 156 59 95 2 37,82 2997 4791 -1794

Mediadekking[wysig | wysig bron]

Voor 2016 is die meeste van Brasilië se wedstryde op SporTV, ’n betaalnetwerk, uitgesaai. In 2016 is veranderinge aan Brasilië se uitsaaiwese aangebring wat daartoe gelei het dat RedeTV wedstryde van die Suid-Amerikaanse Rugbykampioenskap uitsaai terwyl ESPN Brazil die regte het om die Amerikas Rugbykampioenskap uit te saai.

Verwysings[wysig | wysig bron]

  1. (en) "Most matches". ESPNscrum. Besoek op 3 Desember 2019.
  2. (en) "Most points". ESPNscrum. Besoek op 3 Desember 2019.
  3. (en) "Most tries". ESPNscrum. Besoek op 3 Desember 2019.
  4. 4,0 4,1 (pt) "Tupi is die nuwe embleem van Brasiliaanse Nasionale Span". Geargiveer vanaf die oorspronklike op 2014-11-29. Besoek op 10 Mei 2012.
  5. (pt) Edições Leia, 1950.
  6. 6,0 6,1 (en) Bath, Richard (ed.). The Complete Book of Rugby. bl. 64. Seven Oaks Ltd, 1997. ISBN 9781862000131.
  7. (pt) Niterói Rugby Geargiveer 24 Augustus 2011 op Wayback Machine Geskiedenis van Brasiliaanse Rugby. Besoek op 8 Februarie 2012.
  8. 8,0 8,1 (pt) "Geskiedenis van Rugby". Portal do Rugby. Besoek op 4 Mei 2016.
  9. (en) Stoney, Emma (5 Oktober 2012). "Sokkermal Brasilië meet vatbaar vir rugby". The New York Times. Besoek op 4 Mei 2016.
  10. (en) Panja, Tariq (7 Januarie 2015). "Brasilië Sokkerdebakel Gee Hupstoot Aan Rugby Voor Terugkeer Van Olimpiese Spele". Bloomberg. Besoek op 4 Mei 2016.
  11. (pt) A nova camisa dos Tupis! (YouTube). Confederação Brasileira de Rugby. 3 Februarie 2016.
  12. 12,0 12,1 (en) "International Rugby Union Statistics – Brazil". ESPNscrum. Besoek op 3 Desember 2019.

Eksterne skakels[wysig | wysig bron]