Samoaanse nasionale rugbyspan

in Wikipedia, die vrye ensiklopedie
Spring na: navigasie, soek
Samoa
Samoa Rugby.jpg
Unie Samoa Rugbyvoetbalunie
Bynaam(e) Manu Samoa
Embleem die Suiderkruis
Afrigter(s) Vlag van Samoa Stephen Betham
Kaptein(s) David Lemi
Spankleure


Alt. kleure

Statistiek
Meeste toetse 64 Brian Lima
Meeste toetspunte 172 Earl Va’a
Meeste drieë 29 Brian Lima[1]
Eerste internasionale wedstryd
Blue flag of colonial Samoa.png Wes-Samoa 0 – 6 Fidji Vlag van Fidji
(18 Augustus 1924)
Grootste oorwinning
Vlag van Samoa Samoa 115 – 74 Papoea-Nieu-Guinee Vlag van Papoea-Nieu-Guinee
(11 Julie 2009)
Grootste nederlaag
Vlag van Nieu-Seeland Nieu-Seeland 101 – 14 Samoa Vlag van Samoa
(3 September 2008)
Wêreldbeker
Verskynings 6 (Eerste in 1991)
Beste uitslag Kwarteindstryd, 1991, 1995 & 1999

Die Samoaanse nasionale rugbyspan (ook bekend as Manu Samoa) is die verteenwoordigende rugbyspan van Samoa vir mans. Die Samoaanse Rugbyunie word besit deur die geaffilieerde rugbyunies van Samoa. Die naam Manu Samoa is ter nagedagtenis aan ’n beroemde Samoaanse kryger. Die span voer ’n tradisionele krygsdans genaamd siva tau uit voor elke wedstryd. Die Samoaanse Rugbyunie was vroeër saam met Fidji en Tonga deel van die Pasifiese Eilande Rugbyalliansie (PIRA).[2] Samoa lê tans negende op Wêreldrugby se ranglys. Sedert 1996 word die Samoaanse nasionale rugbyspan deur Sir Michael Fay, een van Nieu-Seeland se rykste mense, befonds.[3][4]

Rugby is in die vroeë 1920’s na Samoa gebring en die beheerliggaam is kort daarna gevorm.[5] Die eerste internasionale wedstryd is in Augustus 1924 teen Fidji gespeel onder die naam Wes-Samoa. Fidji, Tonga en Somoa speel gereeld teen mekaar in toernooie soos die Pasifiese Drienasies, wat Samoa in die debuutjaar in 1982 gewen het. Samoa was van 1924 tot 1997 bekend as, en het ook aan internasionale rugby deelgeneem onder die naam Wes-Samoa.

Samoa het sedert 1991 elke keer vir die Wêreldbeker gekwalifiseer en die land het in 1991, 1995 en 1999 daarin geslaag om tot die kwarteindstryd deur te dring. Sedertdien het Samoa nie so goed gevaar in die Wêreldbeker nie. Die span speel in blou truie en wit broeke.

Geskiedenis[wysig | wysig bron]

Die Marist Broers het rugby in 1924 na Wes-Samoa gebring en die Wes-Samoaanse Rugbyvoetbalunie is in 1924 gevorm. Op 18 Augustus 1924 het Wes-Samoa hulle eerste internasionale wedstryd teen Fidji in die hoofstad Apia gespeel met die besoekers wat 6–0 gewen het. Die wedstryd is om 7 v.m. gespeel om die Samoane kans te gee om na die tyd te werk en is op ’n veld gespeel wat ’n groot boom op die middellyn gehad het. Die terugkeerwedstryd is met 9–3 deur Samoa gewen om ’n gelykopuitslag vir die reeks te lewer.

In 1954 het Wes-Samoa beide Stille Oseaan-buurlande Fidji en Tonga besoek, maar die span sou nog 20 jaar wag voor ’n toer na Nieu-Seeland onderneem is. Die Samoane het een van die agt wedstryde wat hulle op die toer gespeel het, gewen.

Die tradisionele drienasiesreeks tussen Tonga, Fidji en Wes-Samoa is in 1982 begin met Wes-Samoa wat die eerste toernooi gewen het. Wallis het Wes-Samoa besoek en het die toets in Apia met 32–16 gewen. Die toer het gelei tot ’n terugkeerbesoek aan Wallis wat Wes-Samoa se internasionale droogte gebreek het. Wes-Samoa is egter nie na die eerste Rugbywêreldbeker in 1987 genooi nie.

Die volgende jaar is ’n toer van 14 wedstryde na Europa onderneem voor ’n Wêreldbeker uitklopreeks in Tokio wat aan Wes-Samoa ’n plek in die 1991 Rugbywêreldbeker in Brittanje besorg het. Daar het die span ’n groot impak gehad. Nadat hulle Wallis met ’n oorwinning van 16–13 in Cardiff uit die pad gevee het, Argentinië met 35–12 geklop het, en net-net met 3–9 teen die uiteindelike kampioen Australië in hulle poelwedstryd verloor het, het Wes-Samoa, ’n land met ’n bevolking van slegs 160 000 hulle in die kwarteindstryd teen Skotland op Murrayfield bevind. Die Skotte het egter maklik met 28-6 gewen.

In die volgende twee jaar het die span ’n aantal noemenswaardige oorwinnings behaal. Die mees uitstaande prestasie was in die Sewesformaat waar die land die 1993 Hong Kong en 1992 Middlesex Sewes gewen het. Die 1995 Rugbywêreldbeker in Suid-Afrika het bewys dat die span inderdaad in die boonste kringe hoort. Die span het weerens die kwarteindstryd gehaal met oorwinnings oor Argentinië en Italië, maar is met 42–14 geklop deur die uiteindelik wenners, die Springbokke. Na die Wêreldbeker het Manu Samoa ’n toer van 13 wedstryde na Engeland en Skotland onderneem waarin hulle met 15–15 gelykop teen Skotland gespeel het en met 9–27 teen Engeland verloor het.

Met rugby wat in 1995 ’n professionele sportsoort geword het, was dit noodsaaklik vir Samoa om ’n nuwe administratiewe struktuur te ontwikkel. Dit is moontlik gemaak deur ’n samevoeging van kragte tussen Fay Richwhite en die Wes-Samoaanse Rugbyunie om Manu Samoa Rugby Beperk te vorm wat nou die span se sake hanteer. Samoa het met onaangetaste eer uit die 1999 Rugbywêreldbeker gestap na ’n skokoorwinning van 38-31 teen die gasheerland Wallis in die poelfase van die toernooi. Die span het weer in die kwarteindstryd verloor, hierdie keer weer teen Skotland.

Samoa het vir die 2003 Rugbywêreldbeker gekwalifiseer nadat hullenaelskraap met 16–17 teen Fidji verloor het toe Earl Va’a ’n strafskop in beseringstyd misgeskop het. Hulle het egter herstel om Tonga tuis en weg te klop en deur wraak te neem op die nederlaag teen Fidji met ’n oorwinning van 22–12 in Nadi. In daardie jaar moes Samoa tevrede wees met ’n derde plek in ’n sterk poel wat Engeland en Suid-Afrika ingesluit het. In een van die wedstryde van die toernooi het hulle vir die meeste van die wedstryd voorgeloop voor hulle teen die uiteindelike wenners, Engeland met 22–35 verloor het.

Samoa het vir die 2011 Rugbywêreldbeker gekwalifiseer deur Papoea-Nieu-Guinee op 18 Julie 2009 met 73–12 in Port Moresby te klop. Hulle het met ’n gemiddeld van 188–17 oor twee wedstryde gewen nadat hulle die vorige week met 115–7 op Apiapark gewen het.[6]

Samoa het hul voorbereiding vir die 2011 Rugbywêreldbeker afgeskop met ’n oorwinning van 32–23 oor Australië wat die tweede posisie op die wêreldranglys beklee het.[7]

Die Nieu-Seeland Verbintenis[wysig | wysig bron]

Samoa voer hulle vorm van die Haka uit voor die span se Poel A-wedstryd teen Suid-Afrika by die 2007 Wêreldbeker

Wes-Samoa se prestasie in die 1991 Rugbywêreldbeker is geïnspireer deur hulle hulpafrigter Bryan Williams, ’n Nieu-Seelandsgebore Somoaan en All Black-held van die 1970’s. Die wêreldbekerspan van 1991 het baie Nieu-Seelandsgebore en -opgeleide spelers ingesluit. Die aansporing hiervoor was Aucklandse stut Peter Fatialofa wat in 1989 die eerste Nieu-Seeland-gebaseerde speler geword het wat besluit het om vir Samoa te speel. Teen die tyd van die 1991 Wêreldbeker het verskeie ander Nieu-Seelandsgebore Samoane soos Pat Lam, Stephen Bachop, Frank Bunce en Apollo Perelini hulle by hom aangesluit. Dit was in die tyd dat spelers van Samoaanse afkoms, die kinders van die massa-migrasie van die 1960’s en 1970’s, beegin het om golwe in Nieu-Seelandse rugby te maak. Sommige, soos Michael Jones, is in Nieu-Seeland gebore terwyl ander soos Inga Tuigamala op ’n vroeë ouderdom na Samoa geïmmigreer het. Die aantal Samoaansgebore spelers wat die All Blacks verteenwoordig het, het in die 1990’s toegeneem. Baie van die spelers het in Nieu-Seeland grootgeword en daar skoolgegaan en het hulle rugbyvaardighede in die strawwe Nieu-Seelandse skolekompetise geslyp. Mils Muliaina, Jerry Collins, Isaia Toeava en Casey Laulala is net ’n handvol van die baie Samoaansgebore spelers wat gekies is om Nieu-Seeland te verteenwoordig.

In die afgelope tyd het Nieu-Seelanders van Samoaanse afkoms sleutelspelers vir die All Blackspan geword, insluitend voormalige All Black-kaptein Tana Umaga. In sommige toetswedstryde tydens hulle 2005 Grand Slam-toer van die Tuisnasies het Nieu-Seelandse spanne talle spelers van Samoaanse afkoms ingesluit. Nieu-Seelandsgebore spelers van Somaanse afkoms het ook weer vir Samoa gespeel, soos Earl Va’a, Pat Lam en Lome Fa’atau.

Die rugbyverhouding tussen Nieu-Seeland en Samoa is ongetwyfeld ’n ingewikkelde aangeleentheid. Noue bande bestaan tussen die twee lande wat vir die eerste maal gevorm is met die aanvangs van die Polinesiese migrasie na Nieu-Seeland in die laaste helfte van die 20ste eeu. Baie spelers wat vir Samoa mag speel het besluit om vir die All Blacks te speel as gevolg van die ooglopende sport en finansiële voordele wat dit vir hulle inhou. As gevolg van bestaande internasionale reëls kan Samoane wat hulle tot Nieu-Seelandse verteenwoordiging verbind het, nie meer vir kleiner nasies soos Samoa speel wanneer hulle nie meer span kry nie.

In die Rugbywêreldbeker 2007|2007 Rugbywêreldbeker]] was daar 14 Nieu-Seelandsgebore spelers in die Samoaanse span en vyf Samoaansgebore spelers in die Nieu-Seelandse span.[8] Die enigste span wat meer buitelandsgebore spelers ingesluit het was Italië met 15.[8]

Wêreldbekerrekord[wysig | wysig bron]

Year(s) Result
1987 Geen deelname
1991 Kwarteindstryd
1995 Kwarteindstryd
1999 Kwarteindstryd plaat.
2003 Poelfase
2007 Poelfase
2011 Poelfase

Verwysings[wysig | wysig bron]

Commons-logo.svg
Wikimedia Commons het meer media verwant aan:
  1. Hoewel Lima 30 drieë vir Samoa gedruk het was een in ’n vriendskaplike wedstryd en word dit dus nie bygereken nie.
  2. (en) We quit: SRU Samoa Observer
  3. (en) Rattue, Chris. "Michael Fay beplan tweedaagse gesprek oor Pasifika-voorstel", The New Zealand Herald, 13 Maart 2004. URL besoek op 7 November 2011.
  4. (en) "Samoa se Eerste Minister loof bankier, Sir Michael Fay, vir ondersteuning van Manu Samoa", Radio New Zealand International, 18 April 2004. URL besoek op 7 November 2011.
  5. (en) Manu Samoa.net Die webwerf vir ondersteuners van Manu Samoa, Geskiedenis, besoek op 31 Augustus 2007
  6. (en) "Samoa kwalifiseer vir 2011 Wêreldbeker", BBC Sport, 18 Julie 2009. URL besoek op 4 Augustus 2009.
  7. (en) Samoa skok Australië met 32–23 oorwinning in Sydney BBC Sport, 17 Julie 2011
  8. 8,0 8,1 (en) "Almal in die buiteland gebore", Planet Rugby. URL besoek op 2 Oktober 2007.[dooie skakel]