Japanse nasionale rugbyspan

in Wikipedia, die vrye ensiklopedie
Jump to navigation Jump to search
Japan
Flag of Japan.svg
Unie Japanse Rugbyvoetbalunie
Bynaam(e) Die Kersiebloeisels, Dapper Bloeisels
Embleem die Sakura
Stadion Chichibunomiya Rugbystadion, Tokio
Kapasiteit 27 188
Afrigter(s) Jamie Joseph
Kaptein(s) Michael Leitch
Spankleure


Alt. kleure

Statistiek
Meeste toetse Hitoshi Ono (98)[1]
Meeste toetspunte Ayumu Goromaru (711)[2]
Meeste drieë Daisuke Ohata (69)[3]
Eerste internasionale wedstryd
Vlag van Japan Japan 9–8 Kanada Vlag van Kanada
(Osaka, Japan; 31 Januarie 1932)
Grootste oorwinning
Vlag van Japan Japan 155–3 Taiwan Vlag van Republiek van China
(Tokio, Japan; 7 Julie 2002)
Grootste nederlaag
Vlag van Nieu-Seeland Nieu-Seeland 145–17 Japan Vlag van Japan
(Bloemfontein, Suid-Afrika; 4 Junie 1995)
Wêreldbeker
Verskynings 9/9 (Eerste in 1987)
Beste uitslag Kwarteindrondte in 2019
Unie webwerf
www.rugby-japan.jp

Die Japanse nasionale rugbyspan (ook bekend as "Die Kersiebloeisels" of die Dapper Bloeisels) is ’n sportspan wat Japan in internasionale rugby verteenwoordig. Rugby word in Japan deur die Japanse Rugbyvoetbalunie, wat in 1926 gestig is, geadministreer. Die Japanse rugbyspan is tans (25 November 2019) agtste op Wêreldrugby se wêreldranglys gelys.[4] Die span neem jaarliks deel aan Wêreldrugby se Stille Oseaan Nasiesbeker teen Fidji, Kanada, Samoa, Tonga en die Verenigde State. Japan het voorheen ook aan die Asiatiese Kampioenskap deelgeneem en dié toernooi 25 keer gewen, by verre meer as enige ander span. Japan is tradisioneel die sterkste rugbymag in Asië en het tot dusver aan elke rugbywêreldbekertoernooi deelgeneem; hulle het in 2019 die eerste toernooi op Asiatiese bodem gehuisves.

Die openingswedstryd van die Rugbywêreldbeker 2019 teen Rusland in Chōfu

Japanse rugby dateer terug na 1866, toe dit in die verdragshawens gespeel is. Die eerste plaaslike universiteitsspanne is in 1899 gestig en Japan se eerste bekende internasionale wedstryd is in 1932 teen ’n Kanadese span gespeel. Beroemde Japanse spele sluit in ’n oorwinning oor die Opkomende All Blacks in 1968 en ’n net-net 6–3-verlies teen Engeland in 1971. Beroemde Japanse oorwinnings sluit in ’n 28–24 oor Skotland XV in 1989 en ’n 23–8 oor Wallis in 2013. Tydens die Rugbywêreldbeker 2007 het Japan ’n 12–12-gelykop teen Kanada aangeteken. In 2011 het Japan sy vordering getoon deur die 2011 Stille Oseaan Nasiesbeker teen Fidji, Samoa en Tonga te wen. Verdere vooruitgang is gedoen toe Japan in 2014 tien agtereenvolgende toetsoorwinnings aangeteken het (’n rekord vir ’n Vlak 2-span) en vir die eerste keer onder die wêreld se beste tien spanne was.[4] Dit het in 2015 voortgeduur toe hulle hul eerste van drie groot verrassings behaal en die Springbokke tydens die Rugbywêreldbeker 2015 se poelfase 34–32 kon klop.[5][6][7] Hul tweede groot verrassing was hul 19–12-oorwinning oor die destydse nommer 2 span Ierland tydens die Rugbywêreldbeker 2019 se poelfase. Vervolgens het hulle na ’n 28–21-oorwinning oor Skotland tot hul eerste kwarteindstryd nog gevorder, maar is deur Suid-Afrika 3–26 geklop.[8][9]

Geskiedenis[wysig | wysig bron]

Afbeelding van ’n rugbywedstryd in Japan in Harpers Magazine in 1874

Die eerste gedokumenteerde geleentheid waarop daar in Japan rugby gespeel is was in 1874 toe Britse matrose ’n wedstryd in Jokohama gespeel het. Die sport is in 1899 deur Professor Edward Bramwell Clarke en Tanaka Ginnosuke aan studente by Keio-universiteit voorgestel. Japan se eerste internasionale wedstryd het op 31 Januarie 1932 toe ’n handelsending van Kanada ’n rugbyspan na die eilandnasie gebring het. Die Japannese het 9–8 gewen. In ’n tweede toets in Tokio elf dae later het die Japanse span die Kanadese 38–5 geklop.[10]

Japan het die Junior All Blacks in 1968 23–19 verslaan nadat hulle die eerste vier wedstryde in ’n toer na Nieu-Seeland verloor het. Die span het egter die laaste vyf gewen. Die Japannese (afgerig deur Waseda University Professor Onishi Tetsunosuke) het op 29 September 1971 in die RFU se eeufeesjaar met slegs 3–6 teen Engeland in Tokio verloor. Op 2 Oktober 1983 het Japan geskok met ’n nederlaag van slegs 24–29 by Cardiff Arms Park.

Op 28 Mei 1989 het ’n sterk Japannese span afgerig deur die gedugte taktikus Hiroaki Shukuzawa ’n verswakte Skotland, wat sonder nege Britse Leeus wat op toer na Australië was moes speel, vir die eerste keer by die Chichibunomiya-rugbystadion 28–24 verslaan. Die Japannese span het Kobe Staal staatmakers soos die senter Seiji Hirao (kaptein), en slot Atsushi Oyagi en Toshiyuki Hayashi (wat 38 keer vir Japan gespeel het en ’n lid van Oxford-universiteit se beste XV van alle tye was) ingesluit. Sinali Latu, die agsteman was toe ’n vierdejaar student by Daito Bunka Universiteit en die vinnige Yoshihito Yoshida wat vleuel gespeel het (nommer 14), was ’n derdejaar student by Meiji-universiteit. Skotland het ’n ongelooflike aantal strafskoppe misgeskop en geweier om die skoppen wat aangebied is te gebruik. Dit was so te sê dieselfde span wat Japan se oorwinning in die Rugbywêreldbeker oor Zimbabwe in 1991 behaal het.

Japan tydens die Rugbywêreldbeker[wysig | wysig bron]

Japan het Asië in nege Rugbywêreldbekertoernooie sedert die eerste toernooi in 1987 verteenwoordig.

Japan, afgerig deur Hiroaki Shukuzawa, het die span se eerste oorwinning tot dusver in 1991 behaal met ’n beslissende 52–8 oorwinning teen Zimbabwe in Belfast.

Met die Rugbywêreldbeker in 1995 het ’n onverskrokke Niue-Seelandse All Blackspan Japan met ’n Wêreldbekerrekordtelling van 145–17 in Bloemfontein verslaan. Die uitslag het die ontwikkeling van rugby in Japan vir verskeie jare erg geknou.

Sedertdien het Japan Taiwan 155–3 in ’n 2003-kwalifiseringwedstryd op 5 Julie 2002 geklop.[11] Dit het gehelp om die publiek se siening ietwat te verbeter en Japan se oorheersing in Asië bevestig.

Tydens die vyfde Rugbywêreldbeker 2003 wat in Australië gehou is, is Japan, afgerig deur Shogo Mukai, beskou as een van die beste van die kleiner rugbylande en het die span baie vriende gewen. Die span het egter nie daarin geslaag om enige wedstryde te wen nie.

Onder Mitsutake Hagimoto (afrigter in 2004)[wysig | wysig bron]

Die nasionale afrigter, Mitsutake Hagimoto (aangestel in 2004 nadat hy die Top Liga-titel met die Kobe Kobelco Steelers gewen het), het versoek om die "Dapper Bloeisel" meer konsekwent sukses te laat behaal. Die kaptein was Takuro Miuchi (No. 8), van NEC Green Rockets. Hagimoto se eerste wedstryd was ’n teleurstellende 19–19-gelykop teen Korea in Tokio op 16 Mei 2004.[12]

In Mei 2004 het Japan die tweede Super Powers-beker tussen vier nasies in Tokio gewen toe die land Rusland 29–12 (27 Mei) en Kanada 34–21 (30 Mei) in die proses verslaan het. Die VSA het Rusland in die wedstryd om die derde plek verslaan.

Japan het in Julie teen Italië 19–32 verloor – die uitslag kon egter maklik anders gewees het as Daisuke Ohata nie die bal laat val het en so ’n seker drie verlore laat gaan het nie. Op Saterdag, 13 November 2004, het ’n verrassend swak Japan toerspan 8–100 verloor teen 'n volsterkte Skotland op McDiarmid Park in Perth in die Kaledoniese Skotse rugbystreek, ’n rekordtelling vir Skotland.[13] ’n Week later, op 20 November, het die span 10–25 teen Roemenië op die Steaua-sokkerstadion in Boekarest verloor; en op 26 November moes Japan ’n vernederende 0–98 nederlaag teen Wallis by die Millennium-stadion deurmaak.[14] Dit was Wallis se grootste oorwinning ooit op ’n Vrydagaand in Cardiff voor ’n reuse 56 380 skare.

Onder Jean-Pierre Elissalde (2005–2006)[wysig | wysig bron]

Japan teen Tonga op Honjo-stadion in Kitakyushu, 4 Junie 2006
Japan teen Australië A op Level-5-stadion in Fukuoka, 8 Junie 2008

Japan het die Arabiese Golf (41ste op die Wêreldranglys) op 16 April 2006 82–9 geklop. Die kaptein was Daisuke Ohata. ’n Week later het Japan Korea 50–14 geklop, weer op die Chichibunomiya-rugbystadion. Japan het Georgië op 14 Mei 2006 32–7 geklop. In die wedstryd het Daisuke Ohata ’n driekuns behaal om die wêreldrekord vir die meeste toetsdrieë in te palm. Hy het in die wedstryd die 65 merk gehaal, een meer as die vorige rekordhouer David Campese.

Japan het 16–57 teen Tonga verloor in die openingswedstryd in die IRR Stille Oseaan Vyfnasies-wedstryd op 4 Junie 2006 – ondanks ’n goeie eerste helfte wat 15–13 in die guns van Tonga geëindig het.

Ten spyte van die span se teleurstellende vertoning in die toernooi waarin Japan slegs die "houtlepel" kon wen is Jean-Pierre Elissalde as hoofafrigter bevestig op 14 Julie 2006. Hy is in September 2006 afgedank toe hy ’n pos aanvaar het by ’n Franse klub, Aviron Bayonnais, sonder om dit met die JRFU te bespreek. Osamu Ota het daarna as afrigter oorgeneem. Op 26 Oktober 2006 het die Japanse Rugbyvoetbalunie algemene bestuurder Osamu Ota aangekondig dat John Kirwan vanaf 1 Januarie 2007 as hoofafrigter sal oorneem.

Onder John Kirwan (2007–2011)[wysig | wysig bron]

John Kirwan is op 25 Oktober 2006 deur die JRFU as Japan se hoofafrigter aangestel van 1 Januarie 2007 af. Voor hy die pos aanvaar het, het hy reeds as raadgewer vir die span opgetree. Hy het verklaar dat hy van plan is om van die begin af ’n Japannese vorm van rugby te kweek wat die "Samoeraigees" sou reflekteer en het hom ten doel gestel om ten minste twee wedstryde in die Rugbywêreldbeker 2007 te wen. In die kwalifiserende wedstryde het Japan vir Hongkong 52–3 en Korea 54–0 in November 2006 geklop om die span se plek in Poel B gemaklik te verseker.

Op 9 April 2007 het die span by hulle eerste oefenkamp sedert Kirwan se aanstelling op die NHK nasionale nuus verskyn, ’n teken van die groeiende verwagtings en belangstelling in die span. Hy het voor die kamera verklaar: "Ons wil die wêreld se fiksste span wees," ’n tipiese uitspraak van vertroue deur die afrigter. Hy het bygevoeg dat hy wou hê dat Japan op sy sterk punte moes bou wat hy gesê het spoed en ratsheid is, en dat die span rugby moes speel "waarvan groot manne nie hou nie."

Die eerste wedstryd onder Kirwan op 22 April 2007 teen Korea het die Kersiebloeisels maklik gewen met 82–0, en sewe nuwe spelers is ingevoer. James Arlidge het twee van die veertien drieë gedruk en tien uit tien verdoel.

Onder Eddie Jones (2012–2015)[wysig | wysig bron]

Eddie Jones het in 2012 by Kirwan oorgeneem. Hy het op 19 September 2015 tydens die Rugbywêreldbekertoernooi ’n skokoorwinning in hul eerste wedstryd teen die Springbokke behaal. Die telling was 34–32 in Japan se guns en word as die "grootste ontsteltenis" in die rugbygeskiedenis beskou.[15] Op 3 Oktober 2015 het Japan Samoa met 26–5 geklop en op 11 Oktober 2015 die Verenigde State met 28–18. Ten spyte van sy drie oorwinnings kon Japan egter nie tot die uitklopfasie vorder nie; die eerste span tot dusver wat ondanks drie poeloorwinnings in die poelfase uitgeskakel is.[16]

Onder Jamie Joseph (sedert 2016)[wysig | wysig bron]

Jamie Joseph lewer ’n toespraak tydens ’n Sunwolves-wedstryd op 12 Mei 2018

Na die 2015-toernooi het verskeie voorlopige afrigters by Eddie Jones oorgeneem en sedert 2016 word Japan deur Jamie Joseph afgerig. Hy het Japan met die oog op die Rugbywêreldbeker 2019 op eie bodem voorberei.

Tydens die Junie 2018-toetse het Joseph Japan tot ’n gelykop teen Italië gelei, nadat Japan die eerste toets met 34–17 gewen, maar die tweede met 25–22 verloor het. Japan het later Georgië met 28–0 op Toyota-stadion geklop.

In 2019 het Japan die Stille Oseaan Nasiesbeker met oorwinnings oor Fidji, Tonga en die Verenigde State sonder verlore wedstryde ingepalm.

Japan het as gasheer van die Rugbywêreldbeker 2019 opgetree en die span kon hul skokoorwinning van 2015 herhaal, deur die tweede plekspan van die wêreldranglys, Ierland, met 19–12 op Shizuoka-stadion in Fukuroi, Shizuoka, te klop.[17][18] Japan het vir die eerste keer in sy rugbygeskiedenis tot die kwarteindrondte gevorder, nadat hulle Skotland met 28–21 op die Internasionale Stadion Jokohama kon klop, nadat dit die nag tevore deur die tifoon Hagibis geteister is.[19]

Rekords[wysig | wysig bron]

Algehele rekord[wysig | wysig bron]

Japan se plek op Wêreldrugby se ranglys vanaf 10 Oktober 2003 tot op hede

Japan het teen 25 November 2019 154 van hulle 352 toetswedstryde gewen, ’n wenrekord van 43,75%.[20]

Japan se toetsrekord teen alle lande: (Korrek op 25 November 2019)[20]

Teen Gespeel Gewen Verloor Gelykop % Gewen
 Arabiese Golf 3 3 0 0 100
Vlag van Argentinië Argentinië 6 1 5 0 26,7
Vlag van Australië Australië 5 0 5 0 0
Vlag van Australië Australië A 4 0 4 0 0
Vlag van Australië Australiese Universiteite 6 2 4 0 33,3
Vlag van Australië Opkomende Wallabies 2 1 0 1 50
Vlag van Sjinees Taipei Sjinees Taipei 4 4 0 0 100
Vlag van Engeland Engeland 2 0 2 0 0
Vlag van Engeland Engeland XV 5 0 5 0 0
Vlag van Engeland Engeland Saxons 2 0 2 0 0
Vlag van Engeland Engeland Studente 1 0 1 0 0
Vlag van Engeland Engeland o/23 2 0 2 0 0
Vlag van Engeland Cambridge-universiteit 4 1 3 0 25,0
Vlag van Engeland Oxford-universiteit 4 0 4 0 0
Vlag van Engeland Oxford en Cambridge 3 0 3 0 0
Vlag van Fidji Fidji 18 4 14 0 22,2
Vlag van Filippyne Filippyne 2 2 0 0 100
Vlag van Frankryk Frankryk 4 0 3 1 0
Vlag van Frankryk Frankryk XV 6 0 6 0 0
Vlag van Georgië Georgië 6 5 1 0 83,3
Vlag van Hongkong Hongkong 29 25 4 0 86,2
Ierse Rugbyvoetbalunie-vlag  Ierland 8 1 7 0 12,5
Vlag van Ierland Ierland XV 2 0 2 0 0
Vlag van Ierland Ierland Studente 1 0 1 0 0
Vlag van Italië Italië 7 2 5 0 25
Vlag van Kanada Kanada 25 15 8 2 60
Vlag van Kanada Brits-Columbië Bears 6 2 2 2 33,3
Vlag van Kasakstan Kasakstan 5 5 0 0 100
Vlag van Suid-Korea Korea 36 29 6 1 80,1
Vlag van Nederland Nederland 1 0 1 0 0
Vlag van Nieu-Seeland Nieu-Seeland 4 0 4 0 0
Vlag van Nieu-Seeland Māori All Blacks 1 0 1 0 0
Vlag van Nieu-Seeland Nieu-Seeland XV 2 0 2 0 0
Vlag van Nieu-Seeland Nieu-Seelandse Universiteite 15 2 11 2 13,3
Vlag van Nieu-Seeland Opkomende All Blacks 8 1 7 0 12,5
Vlag van Australië Queensland Reds 1 0 1 0 0
Vlag van Roemenië Roemenië 6 5 1 0 83,3
Vlag van Rusland Rusland 6 5 1 0 83,3
Vlag van Samoa Samoa 15 4 11 0 26,7
Vlag van Singapoer Singapoer 1 1 0 0 100
Vlag van Skotland Skotland 8 1 7 0 12,5
Vlag van Skotland Skotland XV 4 1 3 0 25
Vlag van Spanje Spanje 3 3 0 0 100
Vlag van Sri Lanka Sri Lanka 3 3 0 0 100
Vlag van Suid-Afrika Suid-Afrika 2 1 1 0 50
Vlag van Thailand Thailand 1 1 0 0 100
Vlag van Tonga Tonga 18 9 9 0 50
Vlag van Uruguay Uruguay 3 2 1 0 66,7
Vlag van Verenigde Arabiese Emirate Verenigde Arabiese Emirate 3 3 0 0 100
Vlag van Verenigde State van Amerika Verenigde State 24 10 13 1 41,7
Vlag van Wallis Wallis 10 1 9 0 10
Vlag van Wallis Wallis XV 4 0 4 0 0
Vlag van Wallis Walliese Klubs 1 0 1 0 0
Vlag van Zimbabwe Zimbabwe 1 1 0 0 100
Totaal 352 154 188 10 43,75

Wêreldbekerrekord[wysig | wysig bron]

Jaar Uitslag
1987 Poelfase
1991 Poelfase
1995 Poelfase
1999 Poelfase
2003 Poelfase
2007 Poelfase
2011 Poelfase
2015 Poelfase
2019 Kwarteindrondte
2023 N.v.t.

Verwysings[wysig | wysig bron]

  1. (en) "Most matches". ESPNscrum. Besoek op 25 November 2019.
  2. (en) "Most points". ESPNscrum. Besoek op 25 November 2019.
  3. (en) "Most tries". ESPNscrum. Besoek op 25 November 2019.
  4. 4,0 4,1 (en) "World Rugby Rankings". Wêreldrugby. Besoek op 25 November 2019.
  5. (en) "Japan pull off greatest shock in World Cup history". ESPNscrum. 19 September 2015. Besoek op 25 November 2019.
  6. (en) "Rugby World Cup: Japan's Shocking Upset Commands Attention". The New York Times. 21 September 2015. Besoek op 25 November 2019.
  7. (en) "Japan beat South Africa". The Guardian. 19 September 2015. Besoek op 25 November 2019.
  8. (en) "Joyous fans roar Japan to thrilling win and place in the knockouts". Rugby World Cup. 13 Oktober 2019. Besoek op 25 November 2019.
  9. (en) "Springboks 'push the right buttons' to end Japan's party". Rugby World Cup. 20 Oktober 2019. Besoek op 25 November 2019.
  10. (en) Young, Keith (2015). "Japan". Complete Rugby Union Compendium. Edinburg: Arena Sport. ISBN 978-1-909715-34-9.
  11. (en) Japan Times
  12. (en) Japan Times
  13. (en) "Scotland 100–8 Japan". BBC. 13 November 2004. Besoek op 25 November 2019.
  14. (en) "Wales 98–0 Japan". BBC. 26 November 2004. Besoek op 25 November 2019.
  15. (en) "Rugby World Cup 2015: South Africa 32–34 Japan". BBC. 19 September 2015. Besoek op 25 November 2019.
  16. (en) Rees, Paul (11 Oktober 2015). "Japan sign off with third win of the tournament by beating the USA". The Guardian. Besoek op 25 November 2019.
  17. (en) McCurry, Justin; Doward, Jamie (28 September 2019). "High fives and Guinness as Japan celebrates latest rugby shock". The Guardian. Besoek op 25 November 2019.
  18. (en) Cary, Tom; Stokes, Ali (28 September 2019). "Sensation of Shizuoka: Japan shock Ireland with another historic Rugby World Cup upset". The Telegraph. Besoek op 25 November 2019.
  19. (en) Kitson, Robert (13 Oktober 2019). "Japan hang on to reach Rugby World Cup last eight and send Scotland out". The Guardian. Besoek op 25 November 2019.
  20. 20,0 20,1 (en) "International Rugby Union Statistics – Japan". ESPNscrum. Besoek op 25 November 2019.

Eksterne skakels[wysig | wysig bron]