Gereformeerde kerk Bloemburg
| Gereformeerde kerk Bloemburg | ||
 | ||
| Sluit in | Bloemfontein en omgewing | |
| Klassis | Suid-Vrystaat | |
| Huidige predikant(e) | Ds. M.D. Meijer | |
| Belydende lidmate | 138 | |
| Dooplidmate | 26 | |
| Adres | Boerneefstraat 3, Langenhovenpark Bloemfontein | |
| Geskiedenis | ||
| Stigtingsdatum | 2006 | |
| Afgestig van | Ventersburg | |
| Eerste predikant | A.M. Stavast (2006–'07) | |
| Saamgesmelt met | Vleuels | |
Die Gereformeerde kerk Bloemburg is die jongste gemeente van die Gereformeerde Kerke in Suid-Afrika in die Vrystaat se hoofstad, Bloemfontein.
Bloemburg het op 19 November 2006 tot stand gekom toe dit afstig van die Gereformeerde kerk Ventersburg. Die lidmate was oorspronklik Bloemfonteinse lidmate wat per attestasie in 2004 na Ventersburg vertrek het. Aanvanklik het hulle byna elke Sondag die 160 km gereis om eredienste daar by te woon. Toe hulle vier wyke sterk geword het, het hulle in 2006 'n selfstandige gemeente gevorm.
Lidmate woon oral in die Rosestad en voeg hulle onder meer by dié gemeente omdat dit hou by die gebruik van die gemeenskaplike Nagmaalbeker. Kort ná sy stigting was ’n derde van die lidmate studente. Einde 2011 het die belydende lidmate 45 getel en die dooplidmate 12. Einde 2014 was dit onderskeidelik 34 en agt. Ná die samesmelting met Vleuels, toe elf belydende en een dooplimaat oorgekom het, het die belydende lidmate sowat 138 getel en die dooplidmate 26.
Aan die begin is die gemeente in kombinasie met Ventersburg/Hennenman/Senekal bedien, maar in Februarie 2009 het dit in kombinasie met Colesberg getree. In 2015 was albei dié gemeentes vakant ná die vertrek van ds. D.J. Dykstra.
Bloemburg het eers sy eredienste gehou in die Engelse kerk op die hoek van Erns Jansen- en Oscar Hoexterstraat, Heuwelsig, maar later geskuif na Haarburgersingel, Westdene, die perseel van die NG gemeente Bloemheuwel. Daarna het hulle die kerkkompleks van die Gereformeerde kerk Vleuels in Langenhovenpark gebruik, en ná samesmelting in 2025 besit daarvan geneem.
Samesmelting met Vleuels
[wysig | wysig bron]Op Donderdag 20 November 2025 het die Gereformeerde kerke Bloemburg en Vleuels formeel tot een gemeente saamgesmelt, hoewel dit eintlik 'n geval was dat Vleuels opgeneem is in Bloemburg. Bloemburg het reeds geruime tyd die gebouekompleks van GK Vleuels in Langenhovenpark vir eredienste, Bybelstudies, kategese en ander geleenthede gebruik GK Vleuels se lidmaattal het die laaste jare sodanig afgeneem dat dié gemeente nie meer selfstandig kon voortbestaan nie. Ná die samesmelting het elf lidmate van Vleuels na Bloemburg oorgegaan, onder wie net een dooplidmaat, 'n 94-jarige, 'n 82-jarige, 'n 80-jarige, hul emeritus predikant ds. Gerrie Labuschagne (75), 'n 74-jarige, Labuschagne se eggenote, Alice (71), 'n 69-jarige, 'n 62-jarige tweeling en 'n 58-jarige.
Bloemburg se kerkraad was ’n ruk lank in gesprek met Vleuels oor die voortgesette gebruik van die kerkgebou en ander middele. Eindelik het die gemeentes besluit om saam te smelt om te verseker dat ordelik voortgegaan word met die middele wat in hulle sorg is. Die predikant, ouderlinge en diakens van GK Bloemburg sou voorgaan as die kerkraad van die gemeente, en die versorging van Vleuels se emeritus egpaar het die verantwoordelikheid van Bloemburg geword. Die gebouekompleks het ook die verantwoordelikheid van Bloemburg geword.
Predikante
[wysig | wysig bron]- Stavast, Arie Harm, 2006 – 2007
- Dykstra, Dirk Jacob, 2009 – 2013
- Britz, dr. Dolf, 2016 – 2019
- Meijer, Dirk, 2020 – hede
Bronne
[wysig | wysig bron]- (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
- (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
- (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.
Eksterme skakels
[wysig | wysig bron]- (af) Verdelingslyne in Gereformeerde Kerke ál skerper getrek Geargiveer 29 November 2015 op Wayback Machine, Beeld, 14 November 2007. URL besoek op 19 Februarie 2015.
- (af) Beswaarde gemeente se optrede lei tot afskeiding Geargiveer 29 November 2015 op Wayback Machine, Beeld, 26 September 2010. URL besoek op 20 Desember 2015.