Gereformeerde kerk Brackenhof

in Wikipedia, die vrye ensiklopedie
Jump to navigation Jump to search
Die kerkgebou in Brackenhurst, einde 2017.

Die Gereformeerde kerk Brackenhof is ’n gemeente van die Gereformeerde Kerke van Suid-Afrika in die suide van die Randse dorp Alberton. Dit het op 24 Augustus 1996 tot stand gekom deur die samesmelting van die gemeentes Eikenhof (1946) en Brackenhurst (1982).

Agtergrond[wysig | wysig bron]

Die behoefte aan ’n derde Gereformeerde kerk op Alberton is aan die begin van die 1980's gevoel. In Mei 1982 het die Gereformeerde kerk Brackenhurst van Alberton-Wes (1966) afgestig nadat die moedergemeente Alberton reeds in 1939 as die sewende gemeente aan die Oos-Rand gestig is. Die nuwe gemeente Brackenhurst het eers kerk gehou in die saal van die Laerskool Willem Cruywagen (later herdoop tot die Laerskool Orion), terwyl die kerkraad onderhandel het oor ’n geskikte terrein vir die oprigting van ’n kerkgebou.

Kerkbou[wysig | wysig bron]

Bouwerk aan die siersteenkerk het in die tweede helfte van 1983 begin. Die argitek was Albert Monteith en die bouaannemer Capital Civil Building Constructors. Die totale boukoste het sowat R450 000 beloop. Die hoeksteen is op 18 Maart 1984 gelê en van 16 tot 18 November 1984 is die kerkgebou feestelik in gebruik geneem. Die siersteengebou is veeldoelig ontwerp, want die kerkruimte en -kantoor, saalkompleks en kombuisgeriewe is alles onder een dak. Net ’n gordyn skei die kerkgedeelte en saal wat oopgetrek kan word wanneer meer plek benodig word. Die kerkruimte bied sitplek aan 450 mense. Aan die suidekant van die kerkgebou is klaskamers vir kategese-onderrig, ’n integrale deel van die kerkkompleks.

Nadat Brackenhurst en Eikenhof saamgesmelt het, is Eikenhof se klein pyporrel oorgeplaas na die Brackenhurst-kerk, waarin die saamgestelde gemeente sedertdien aanbid. ’n Jaar of wat ná die samestelling het Brackenhof 396 belydende ’n 154 dooplidmate gehad, maar einde 2014 het dit afgeneem tot onderskeidelik 186 en 39. In die Gereformeerde Kerk se eeufeesjaar (1959) het Eikenhof, destydse die negende oudste Gereformeerde kerk aan die Oos-Rand, se belydende lidmate 93 getel en die dooplidmate 34. In 1995 het Eikenhof se belydende lidmate 194 en die dooplidmate 69 getel en Brackenhurst s'n onderskeidelik 319 en 152.

Predikante[wysig | wysig bron]

Eikenhof[wysig | wysig bron]

  1. Van der Walt, Nicolaas Hendrik, 1946–1947 (in kombinasie met Heidelberg; aanvaar sy emeritaat)
  2. Van Wyk de Vries, dr. Klaas Speleveldt, 1946–1952 (in kombinasie met Alberton)
  3. Duvenage, Abraham Petrus Carolus, 1959–1962
  4. Van der Vinne, Jacob Albert Hendrik, 1962–1963
  5. Van der Walt, Hendrik Bernardus, 1964–1967
  6. Malan, Nicolas Johannes, 1967–1976
  7. Kruger, Gert Daniël, 1977–1980
  8. Nagel, Cornelius Johannes, 1981–1986
  9. Du Plessis, Lourens Stephanus Daniël, 1986–1991
  10. Nel, Elias Paulus, 1991–1996, waarna Brackenhof sedert 1996

Brackenhurst[wysig | wysig bron]

  1. Krüger, dr. Petrus Paulus, 1982-1996 (waarna Brackenhof, 1996-2000; Brackenhurst se enigste leraar in sy 14-jarige bestaan)

Brackenhof[wysig | wysig bron]

  1. Nel, Elias Paulus, 1996 – hede (oorgekom vanaf Eikenhof, 1991–1996)
  2. Krüger, dr. Petrus Paulus, 1996 – 2000 (oorgekom vanaf Brackenhurst, 1982-1996)

Bronne[wysig | wysig bron]

  • (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
  • (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
  • (af) Venter, ds. A.A. (hoofred.) 1957. Almanak van die Gereformeerde Kerk in Suid-Afrika vir die jaar 1958. Potchefstroom: Administratiewe Buro.
  • (af) Venter, ds. A.A. (hoofred.) 1958. Almanak van die Gereformeerde Kerk in Suid-Afrika vir die jaar 1959. Potchefstroom: Administratiewe Buro.
  • (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.

Eksterne skakel[wysig | wysig bron]