Gereformeerde kerk Groblersdal

Gereformeerde Kerk Groblersdal
Sluit in	Groblersdal Loskopdam Maleoskop
Klassis	Lydenburg
Huidige predikant(e)	Lourens du Plessis
Belydende lidmate	170
Dooplidmate	35
Adres	H.v. Robertson- en Gemsboklaan Groblersdal
Geskiedenis
Stigtingsdatum	16 November 1940
Afgestig van	Erasmus
Eerste predikant	Louis Kruger 1951–1954

Ds. L.S. Kruger, van 1951 tot 1954 die gemeente se eerste leraar.

Ds. Petrus Venter (leraar van 1954–'57), sy vrou, wat hom jonk reeds ontval het, en hul dogtertjie, Anna.

Ds. P.A. Smit en sy gesin. Hy was leraar van Groblersdal van 1959 tot 1961.

Ds. L.S. van der Vyver, die leraar van 1965 tot 1969.

Dr. D.R. Fouché in sy laaste jaar aan die TSP, 1971. Hy was predikant hier van 1972 tot 1975, sy eerste gemeente.

Die Gereformeerde kerk Groblersdal is die sesde oudste van die 16 gemeentes in die GKSA se Klassis Lydenburg. Buiten die hoofdorp, Groblersdal, in Limpopo naby die grens met Mpumalanga en dié se grens met Gauteng, sluit ook Loskopdam en Maleoskop in. Einde 2015 was hier 159 belydende en 50 dooplidmate, vergeleke met 162 en 51 einde 2001.

Die Gereformeerde kerk Groblersdal het op 16 November 1940 afgestig van die Gereformeerde kerk Bronkhorstspruit, wat tot 1956 as Erasmus bekendgestaan het. Ene mnr. Bezaans het 2 morg grond in die bos buite die dorp aan die gemeente geskenk. ’n Boukommissie is aangestel en drie erwe is ook op Marble Hall aangekoop. Die hoeksteen van Groblersdal se Gereformeerde kerkgebou is in 1949 gelê en dis op 2 Desember 1950 in gebruik geneem. Tydens dié geleentheid het ds. H.J.R. du Plessis voorgegaan met as teks Psalm 100:2.

Die eerste pastorie is in 1950 gekoop en reeds in 1951 kon die eerste vaste leraar, ds. L.S. Kruger, bevestig word. Die nuwe pastorie is in 1966 voltooi, later verkoop en die nuwe pastorie in 2006 aangekoop.

Die Gereformeerde kerk Marble Hall het in 1961 van Groblersdal afgestig. Mettertyd het die kerk op Groblersdal te klein geraak en het die gemeente begin beplan aan ’n groter, doelmatiger gebou. Op 24 September 1977 is die nuwe, moderne kerkgebou in gebruik geneem. Die argitek was Renier Roos en die bouaannemer J. Moolman. Die ou kerkgebou is destyds volledig omgebou en ’n saal omskep met ’n goeie verhoog, ruim kombuisgeriewe en katkisasielokale. Op 16 Junie 1984 is die nuwe pyporrel feestelik in gebruik geneem met onder meer ’n orreluitvoering deur A.A. van Namen.

Predikante

1. Kruger, Louis Stephanus, 1951 – 1954
2. Venter, Petrus Johannes, 1954 – 1957
3. Smit, Petrus Albertus, 1959 – 1961
4. Van der Schyff, Jan Adriaan Venter, 1962 – 1964
5. L.S. van der Vyver, 1965 – 1969
6. Schulze, dr. Ludolf Ferdinand, 1969 – 1971
7. Fouché, dr. Daniël Rudolph, 1972 – 1975
8. Dijkstra, dr. Hessel, 1975 – 2002 (aanvaar sy emeritaat)
9. Coetzee, Gideon Christiaan, 2003 – 2007
10. Du Plessis, Lourens Stephanus Daniël, 2007 – hede

Bronne

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
• (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• (af) Venter, ds. A.A. (hoofred.) 1960. Almanak van die Gereformeerde Kerk in Suid-Afrika vir die jaar 1961. Potchefstroom: Administratiewe Buro.
• (af) Vogel, Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.