Gereformeerde kerk Bloempark

in Wikipedia, die vrye ensiklopedie
Jump to navigation Jump to search
Gereformeerde Kerk
Bloempark
Embleem van die Gereformeerde Kerke in Suid-Afrika.jpg
Sluit in  Fichardtpark (gedeeltelik)
Hospitaalpark
Pellissier
Klassis  Suid-Vrystaat
Huidige predikant(e)  Zak Scholtz
Belydende lidmate  577
Dooplidmate  107
Adres H.v. Stollreither- en Charlie Suttonstraat, Fichardtpark, Bloemfontein
Geskiedenis
Stigtingsdatum  1979
Afgestig van  Bloemfontein-Suidheuwels
Eerste predikant  J.P.L. van der Walt (1979–1983)
Die Gereformeerde kerk Bloempark, opgerig in 1982.
Die binnekant van die kerkgebou.
Ds. Zak en mev. Tanya Scholtz is in 2015 in die gemeente ontvang.

Die Gereformeerde kerk Bloempark is die derde jongste en ook die grootste gemeente van die GKSA in die Vrystaat se hoofstad, Bloemfontein.

Dit beslaan voorstede of woonbuurte soos Fichardtpark (gedeeltelik), Hospitaalpark en Pellissier. Oos van Bloempark sluit Bloemfontein-Suidheuwels, waarvan Boempark afgestig het, voorstede in soos Fauna, ’n gedeelte van Fichardtpark, Fleurdal, Ehrlichpark, Oranjesig en Uitsig, terwyl Bloemfontein-Suid, waarvan Suidheuwels afgestig het, die woonbuurte noord van Bloempark beslaan, soos Universitas, Gardeniapark, Wilgehof en Willows. Binne Bloempark se gemeentegrense is ook die grootste NG gemeente in Bloemfontein en tewens in die Vrystaat, die NG gemeente Pellissier, wat einde 2014 3 977 belydende en 1 273 dooplidmate gehad het. Bloempark se sieletal was 921 in 1997, 885 in 2001 en 598 in 2011, maar 707 in 2014 en 727 in 2015.

Bloempark het in 1979 van Bloemfontein-Suidheuwels afgestig met ds. Johan van der Walt en sy vrou, Duba, as eerste predikantspaar. Die kerkgebou is in 1982, tydens sy bedieningstyd, opgerig. Die bouer was Jan Vorster, ’n lidmaat van Bloempark. Omdat daar ’n tekort aan bakstene was, is groot dele van die kerkgebou gebou met betonblokke van 6 t elk wat op die terrein gegiet is. Onder ds. Van der Walt se leiding het talle lidmate saans en Saterdae met die afrondingswerk kom help. Tydens die uitgrawings vir Suidheuwels se saal (omstreeks 1976) – wat gebou is omdat die kerk te klein geword het, maar waarna vir afstigting van Bloempark besluit is omdat die boukoste om die kerk te vergroot te hoog sou wees – is ’n groot klip met ’n holte daarin uitgehaal wat iewers as voëlbad moes dien. Ds. Van der Walt het egter besluit om dit met ’n koperplaat te laat uitvoer en op ’n voetstuk te monteer sodat dit as doopvont en as simbool van Bloempark se bande met Suidheuwels kon dien.

Predikant[wysig | wysig bron]

  1. Van der Walt, Johannes Petrus Lodewikus, 1979 – 1983
  2. Labuscagne, dr. Gert Christoffel Petrus, 1983 – 2009
  3. Vermeulen, Hendrik Johannes, 1989 – 14 April 2007
  4. Zwemstra, Dinant Gerrit, 2010 – 2015
  5. Scholtz, Zak, 21 November 2015 – hede

Bronne[wysig | wysig bron]

  • Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
  • Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
  • Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
  • Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.

Eksterne skakels[wysig | wysig bron]