Gereformeerde kerk Johannesburg-Suid

in Wikipedia, die vrye ensiklopedie
Die huidige kerk van die gemeente was eers die kerkgebou van die Gereformeerde kerk Klipriviersberg.
Die destydse kerkgebou van die Gereformeerde kerk Johannesburg-Suid, voor die groot palmbome op die perseel afgesaag is.
Die hoeksteen van die gemeente se vorige kerkgebou.
Die ou kerkgebou einde 2017 nadat die palmbome afgesaag is.
Die gemeente se kerksaal, die Postmasaal, wat verkoop is.
Dr. Sarel Petrus van der Walt, van 1932 tot 1946 die gemeente se eerste eie leraar. Dié foto is geneem toe hy tydens 1938 se Eeufeestrek sekretaris van die Sentrale Volksfeestekomitee in Johannesburg was.
Mev. Magdalena Duvenage, predikantsvrou van 1946 tot 1950.
Dr. S.C.W. Duvenage, leraar van 1946 tot 1950.
Dr. I.J. van der Walt, leraar van 1951 tot 1958.
Ds. Lammert Stavast, leraar van 1986 tot 1991 (in kombinasie met Klipriviersberg), waarna hy sy emeritaat aanvaar.
Ds. J.C. Buys, 1991 tot 2004.

Die Gereformeerde kerk Johannesburg-Suid is die laaste gemeente van die Gereformeerde Kerke in Suid-Afrika wat die naam van die stad Johannesburg bevat nadat vyf ander kerke met dié naam ontbind het, naamlik die Gereformeerde kerk Johannesburg (later genoem Johannesburg-Mayfair en eindelik Johannesburg-Melville), Johannesburg-Noord, Johannesburg-Oos, Johannesburg-Sentraal en Johannesburg-Wes.

Die Gereformeerde kerk Johannesburg-Suid is amptelik afgestig op 10 Januarie 1931, dieselfde dag waarop die gemeente se eerste kerkgebou, in Turffontein, in gebruik geneem is. Die indertydse minister van lande, P.G.W. Grobler, het die hoeksteen op 13 September 1930 gelê. Die 30 kerkbanke, twee Nagmaalstafels en die preekstoel is aangekoop teen £480. Die kerk is in ’n kruisvorm ontwerp op voorstel van die ds. W.J. de Klerk, wat ook die stoel op die preekstoel geskenk het. Volgens die hoeksteen was die argitek die Brits gebore Henry Rowe-Rowe (1870–1932).

Weens die Tweede Wêreldoorlog (1939–1945) kon die orrel eers in 1949 in gebruik geneem word. Dit was een van die eerste plaaslik vervaardigde orrels en word vandag nog gebruik, hoewel in die kerkgebou van die destydse Gereformeerde kerk Klipriviersberg in Oakdene, wat ontbind het en toe by Johannesburg-Suid ingeskakel het. H. Hoeksema het die doelmatige kerksaal ontwerp en die bouaannemer was A.L. Naudé. Dr. I.J. van der Walt het die saal se hoeksteen op 9 Maart 1957 gelê. Dit is indertyd as een van die land se beste kerksale beskou. Die gemeente het dié saal, met sy sitplek vir 450 mense en wat die naam Postma-saal gekry het, tot November 2004 gebruik, toe dit aan ’n ander kerkverband verkoop is.

Nadat Klipriviersberg ontbind en by Johannesburg-Suid ingeskakel het, het die gemeente uit sy kerkgebou in Turffontein oorgetrek na eersgenoemde se kerkgebou in die baie rustiger voorstad Oakdene. Die preekstoel en orrel is terselfdertyd na die Oakdene-kerk verskuif. Dié gebou is ontwerp deur André Venter en is op 8 September 1984 ingewy. Ds. R. Maré het die gedenkplaat onthul. Dit bied sitplek aan 250 kerkgangers, meer as twee keer die getal oorblywende belydende lidmate in Johannesburg-Suid.

Predikante[wysig | wysig bron]

  1. Van der Walt, dr. Sarel Petrus, 1932–1946
  2. Duvenage, dr. Schalk Carel Willem, 1946–1950
  3. Van der Walt, dr. Ignatius Johannes, 1951–1958
  4. Venter, dr. Mechiêl, 1958–1961
  5. Booyens, Johannes Hendrik, 1961–1966 (verlaat die bediening)
  6. Denkema, dr. Hendrik, 1967-1981
  7. Steenkamp, Willem Frederik, 1981–1985
  8. Maré, Roelof, 1985 (verlaat die bediening)
  9. Stavast, Lammert Hendrik, 1986–1991 (in kombinasie met Klipriviersberg (aanvaar sy emeritaat)
  10. Buys, Johannes Christiaan, 1991–2004

Bronne[wysig | wysig bron]

Eksterne skakels[wysig | wysig bron]