Gereformeerde kerk Kempton Park-Mooifontein

in Wikipedia, die vrye ensiklopedie
Spring na: navigasie, soek
Gereformeerde Kerk
Kempton Park-Mooifontein
Embleem van die Gereformeerde Kerke in Suid-Afrika.jpg
Sluit in  Birchleigh
Birchleigh-Noord
Chloorkop
Edleen
Esselenpark
Kempton Park-Wes
Marmaret-aftreedorp
Norkempark
Restonvale
Terenure
Van Riebeeckpark
Klassis  Sentraal-Oos-Rand
Huidige predikant(e)  Louis Aucamp
Belydende lidmate  274
Dooplidmate  45
Adres H.v. Oranjerievier- en
Bergrivierrylaan
Terenure
Geskiedenis
Stigtingsdatum  27 November 1976
Afgestig van  Kempton Park-Noord
Eerste predikant  C.J. van Vuuren (1976–2000)
Die kerkgebou op die hoek van Oranjerivier- en Bergrivierrylaan, Terenure.
Ds. Lammert Stavast was van 1983 tot 1986 die gemeente se tweede leraar. Dit was sy voorlaaste gemeente.
Ds. C.J. van Vuuren het die gedenksteen van die kerkgebou op 7 April 1979 onthul.

Die Gereformeerde kerk Kempton Park-Mooifontein is die jongste van die drie gemeentes van die Gereformeerde Kerke in Suid-Afrika in die Oos-Randse stad Kempton Park.

’n Groep wyke het op 27 Februarie 1976 van die Kempton Park-Noord afgestig, wat op sy beurt in 1966 van die Kempton Park afgestig het. Dit was destyds ’n besonder groot gemeente en skoolsale was te klein om al die kerkgangers tydens eredienste te huisves. Dadelik het die kerkraad aan die werk gespring om ’n eie kerkgebou op te rig terwyl die gemeente intussen nog Kempton Park-Noord se kerk gebruik het.

Victor Pieterson is as argitek aangestel en Jurgens Bouers (heel gepas) as bouaannemer. Die eerste slote is op ’n landbouhoewe gegrawe en op 7 April 1979 het ds. C.J. van Vuuren die gedenksteen onthul. ’n Lidmaat het ’n hek met ’n sewekandelaarpatroon vir die ingang na die perseel gemaak, maar dis skaars ’n jaar later gesteel en nie vervang nie.

Die voltooide kerk is plegtig ingewy op 12 Januarie 1980. Die ontwerp is eenvoudig en hoewel die muur bokant die ingang hoër gebou is om ’n toring voor te stel, is dit nie ’n toring in die ware sit van die woord nie. ’n Groot swaaideur van hout lei na die binneruim waar die preekstoel en Kanselbybel die fokuspunt is. ’n Moederskamer is nie gebou nie omdat die boukommissie gereken het moeders en hul kinders hoort binne-in die erediens.

Adelheid van Vuuren, ’n lidmaat, het die deur oopgesluit met die amptelike ingebruikneming en daarna het die gemeente met begeleiding deur orrel en trompet die voltooide gebou binnegegaan. Johanna Roets, een van die oudste lidmate, het ’n Kanselbybel aan die gemeente oorhandig. Die meganiese orrel is deur Fehrle en Roeleveld ontwerp. Later is by die kerkgebou ingebreek en die orrel so erg beskadig dat die herstelkoste drie keer meer as die aankoopprys was.

Einde 1997, toe Birchleigh, 'n dogtergemeente van Mooifontein, ook nog bestaan het, het dié twee gemeente saam 693 belydende lidmate gehad. ’n Jaar ná Birchleigh se inlywing, einde 2001, was Mooifontein se lidmaattal 611, maar in die daaropvolgende 13 jaar tot einde 2014 het dit afgeneem tot 330.

Predikante[wysig | wysig bron]

  1. Van Vuuren, Christoffel Johannes, 1976–2000 (aanvaar sy emeritaat)
  2. Stavast, Lammert Hendrik, 1983–1986
  3. Van der Walt, Jan Pelser, 1987–1989 (waarna Birchleigh tot 1990
  4. Van Blerk, Petrus Johannes, 2000–2005 (voorheen van 1991 af Birchleigh se tweede en laaste predikant)
  5. Eloff, Johannes Marthinus, 2001–2007 (verlaat die bediening)
  6. Aucamp, Johannes Louis, 2008 – hede

Bronne[wysig | wysig bron]

  • (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
  • (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
  • (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
  • (af) Venter, ds. A.A. (hoofred.) 1957. Almanak van die Gereformeerde Kerk in Suid-Afrika vir die jaar 1958. Potchefstroom: Administratiewe Buro.
  • (af) Venter, ds. A.A. (hoofred.) 1958. Almanak van die Gereformeerde Kerk in Suid-Afrika vir die jaar 1959. Potchefstroom: Administratiewe Buro.
  • (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.

Eksterne skakel[wysig | wysig bron]