Gereformeerde kerk Cradock/Somerset-Oos

in Wikipedia, die vrye ensiklopedie
Jump to navigation Jump to search
Die gemeente se kerkgebou op Cradock wat in 1964 ingewy is, 98 jaar nadat die kerk op Somerset-Oos opgerig is.
Ds. Dirk Wijnbeek was van 1983 tot 2012 leraar van die Gereformeerde kerk Steynsburg, maar het ook verantwoordelikheid vir Cradock/Somerset-Oos en Molteno aanvaar.
Die gemeente se kerkgebou op Somerset-Oos.

Die Gereformeerde kerk Cradock/Somerset-Oos is die vyfde oudste gemeente in die GKSA se Klassis Karoo-Kei. In 2015 het Cradock/Somerset-Oos net 20 belydende en twee dooplidmate gehad en was dit ook die kleinste van die 12 gemeentes in die Klassis. Buiten die twee hoofdorpe, Cradock en Somerset-Oos, sluit die gemeentegrense ook onder meer die dorpe Adelaide, Bedford en Cookhouse in.

Gereformeerde lidmate van Cradock is tot 1898 as verspreidwonendes van die Gereformeerde kerk Middelburg, Kaap, beskou, maar in daardie jaar het hulle ’n wyk met ’n eie ouderling geword. Vroeg in die 1960's het Cradock sy eie Gereformeerde kerk gekry al het die wyk Cradock, toe nog deel van Middelburg, in 1960 net 18 doop- en 25 belydende lidmate gehad. Die kerkgebou is veral opgerig met die oog daarop dat die Kerk hier moes omsien na die klompie Gereformeerde seuns aan die Hoër Landbouskool Marlow.

Prof. S.J. van der Walt het die kerkgebou se hoeksteen op 21 November 1964 gelê. Die argitek was ene P.A. Gouws en die bouaannemers B.F. Lutz en W. Smith. Die koste van die kerkgebou, met meublement ingesluit, het R10 644 beloop.

In 1972 (volgens die bron, maar dit moet waarskynlik 1962 wees) het Middelburg tydelike reëlings met Steynsburg getref om Cradock se bediening oor te neem, maar Cradock is net as wyk van Steynsburg bedien tot dit op 24 November 1964 ’n selfstandige gemeente geword het.

Die aftrede van ds. D.H.P. Wijnbeek in 2012 was nie net ’n groot terugslag vir Steynsburg wat sedertdien vakant is nie, maar ook vir Cradock/Somerset-Oos, want hy het Cradock elke Sondag bedien en Somerset-Oos elke tweede Sondag. Hy was ook verantwoordelik vir die Gereformeerde kerk Molteno.

Bronne[wysig | wysig bron]

Sien ook[wysig | wysig bron]