Gereformeerde kerk Stellenbosch

Gereformeerde Kerk Stellenbosch
Sluit in	Stellenbosch (dorp en distrik) Universiteit Stellenbosch Boland-kollege
Denominasie	Gereformeerde Kerk
Klassis	Klassis Boland
Huidige predikant(e)	C.J. (Johan) van Heyningen
Belydende lidmate	265
Dooplidmate	53
Adres	Maraisstraat Stellenbosch
Geskiedenis
Stigtingsdatum	16 April 1967
Eerste predikant	J.C. Coetzee (1968–'70)

Die Gereformeerde kerk Stellenbosch is geleë in Maraisstraat.

Die gemeente het aanvanklik dienste gehou in die Hofmeyr-saal van die NG moedergemeente. In dié saal is die gemeente op Sondagmiddag 16 April 1967 gestig.

Cora Hamersma het die kerk se hoeksteen onthul by die ingebruikneming van die gebou op 17 Oktober 1970.

Dr. Jan Harm (Amie) van Wyk, leraar van 1973 tot 1981.

Dr. C.J.H. Venter toe hy vierdejaarstudent aan die Teologiese Skool Potchefstroom was. Hy was predikant hier van 1981 tot 1985.

Ds. Alwyn Johannes du Plessis, die leraar van 1987 tot 1997.

Die Gereformeerde kerk Stellenbosch is die negende oudste van die 20 gemeentes in die GKSA se Klassis Boland, wat die hele Wes-Kaap asook die westelike uithoeke van die Noord-Kaap beslaan. In 2015 het die gemeente 287 belydende en 54 dooplidmate gehad, die vyfde grootste gemeente in die Klassis. In 2001 was die syfers onderskeidelik 277 en 52.

Vanaf 1923 was daar verspreidwonende lidmate van die Gereformeerde kerk Kaapstad, wat in daardie jaar gestig is, in die omgewing van Stellenbosch en later, ná die stigting van die Gereformeerde kerk Bellville in 1957, is hulle van daar af bedien. Bellville het ook ’n saalfonds vir die Eikestad se lidmate gestig. Van 1950 af is dienste op Stellenbosch in verskeie sale gehou.

In April 1967 het Stellenbosch van Bellville afgestig en ’n perseel van laasgenoemde ontvang met ’n skuurtjie daarop. Eers het die nuwe gemeente oorweeg om die skuurtjie te restoureer, maar dienste is in die Hofmeyr-saal gehou. Danksy ruim skenkings uit die kerkverband en van veral suster Hamersma kon die gemeente hul eie kerkgebou oprig.

Tydens uitgrawings is bevind dat die gebou opgerig sou word op spoelklippe van die Eersterivier, wat met die eeue sy loop verander het. Hierdie gebou is op 17 Oktober 1970 in gebruik geneem. Dis ’n tweedelige A-raam-gebou met ’n beskeie toring. Binne vorm die struktuur ’n reghoekige gehoorsaal met ’n hoë gewelf en houtbanke wat sitplek aan 350 kerkgangers bied. Daar is ook ’n galery, waarop ’n elektroniese orrel aangebring is. Later is ’n saal, konsistorie, moederskamer, plaveisel en omheining aangebring. Die eerste dopeling in die nuwe kerk was Michael Adendorff, op 8 November 1970.

Predikante

1. Coetzee, Johannes Christiaan, 1968 – 1970 (in kombinasie met Paarl)
2. Dijkstra, dr. Hessel, 1971 – 1975 (in kombinasie met Paarl)
3. Van Wyk, dr. Jan Harm, 1973 – 1981 (in kombinasie met Strand)
4. Venter, dr. Casper Jan Hendrik, 1981 – 1982 (in kombinasie met Strand); 1982 – 1985
5. Venter, Herman Johannes Petrus, 1985 – 1987
6. Du Plessis, Alwyn Johannes, 1987 – 1997 (aanvaar sy emeritaat)
7. Grobler, Charl Stephanus, 1997 – 2008
8. Van Heyningen, Cornelius Johannes, 2009 – hede

Bronne

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
• (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• (af) Venter, ds. A.A. (hoofred.) 1960. Almanak van die Gereformeerde Kerk in Suid-Afrika vir die jaar 1961. Potchefstroom: Administratiewe Buro.
• (af) Vogel, Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.