Gereformeerde kerk Hermanus
| Gereformeerde Kerk Hermanus | ||
| ||
| Sluit in | Gansbaai (De Kelders tot Pearly Beach) Hermanus (Fishershaven tot Voëlklip) Stanford | |
| Denominasie | Gereformeerde Kerk | |
| Klassis | Klassis Boland | |
| Huidige predikant(e) | Ds. Nikolaas Pienaar | |
| Belydende lidmate | 212 | |
| Dooplidmate | 29 | |
| Adres | Bergsigstraat Sandbaai, Hermanus | |
| Geskiedenis | ||
| Stigtingsdatum | 29 Oktober 2000 | |
| Afgestig van | Strand | |
| Eerste predikant | A.J. du Plessis (2000–'04) | |
Die Gereformeerde kerk Hermanus is die vyfde jongste van die 20 gemeentes in die GKSA se Klassis Boland, wat die hele Wes-Kaap en die noordwestelike uithoeke van die Noord-Kaap beslaan. Einde 2015 was hier 151 belydende en 19 dooplidmate, vergeleke met onderskeidelik 116 en 16 vyf jaar vantevore. Die buitengewone klein getal dooplidmate vergeleke met die belydende lidmate is daaraan te wyte dat die Overbergse en Suid-Kaapse kus vir baie Gereformeerde lidmate ’n aftreeplek is.
Die gemeente Hermanus is op 29 Oktober 2000 gestig met sowat 70 belydende lidmate en sluit ook die dorpe Gansbaai en Stanford in, maar die kerk is reeds die vorige jaar deur Hans Oostenbrink en sy seun Henk gebou en teen kosprys aan die gemeente oorgedra. Hulle het ook die erf geskenk waarop die kerk staan. Die kerk is op 4 Desember 1999 amptelik in gebruik geneem. Dit bied plek vir 150 stoele. Aan die linkerkant is ’n onthaal- en braaiplek en die katkisasiekamers. Regs voor is die kloktoring. Die afdakkie tussen die kerk en die kloktoring bied skuiling teen die reën.
Die gemeente se eerste lidmate was Josef en Lettie Kruger wat eers behoort het tot die Gereformeerde kerk Worcester, hoewel 115 km van Hermanus af destyds die naaste Gereformeerde gemeente.
Die kerkraad van het op 3 September 2023, saam met afgevaardigdes van die Gereformeerde Kerke Strand en Kleinmond en onder voorsitterskap van ds. Banie van der Walt van die Gereformeerde Kerk Paarl, vergader en verklaar dat ds. Nikolaas Pienaar behoorlik volgens die formulier wat daarvoor ingestel is, deur ds. Peet Coetzee, emeritus predikant van die Gereformeerde Kerk Potchefstroom, as bedienaar van die Woord bevestig is en dat die daarby behorende stukke onderteken is. Ds. Pienaar, sy vrou, Hanlie, en hul vierjarige dogter, Klara, het vanaf Oos-Londen hierheen verhuis. Daarmee het die gemeente sy tweede voltydse herder en leraar ontvang, sowat 10,5 jaar jaar nadat sy eerste herder en leraar, ds. Koos Cloete, op 24 Februarie 2013 bevestig is.
Predikant[wysig | wysig bron]
- Cloete, Jacobus Johannes, 24 Februarie 2023
- Pienaar, Nikolaas, 3 September 2023 – hede
Bronne[wysig | wysig bron]
- (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
- (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
- (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.