Gereformeerde kerk Cachet

in Wikipedia, die vrye ensiklopedie
Jump to navigation Jump to search
Ds. (later dr.) Victor Edouardo d'Assonville was die gemeente se leraar van 1971 tot 1974.
Dr. Victor en Therese D'Assonville op gevorderde leeftyd.

Die Gereformeerde kerk Cachet is die GKSA se studentegemeente in Potchefstroom.

Die gemeente is op 20 Junie 1971 gestig. Dit is nie genoem na wyle prof. Jan Lion Cachet nie, maar na die omgewing waarin dit gestig is en waar ook ’n Cachet-stasie, -park en –poskantoor is.

Cachet se lidmate, meestal studente, het eers eredienste in die Totiusgedenksaal en Nagmaal in die kerkgebou van die Gereformeerde kerk Potchefstroom-Noord gehou. Vir ander vergaderings en byeenkomste het hulle gebruik gemaak van die geriewe van die gemeentes Potchefstroom-Noord en Noordbrug.

Die gemeente se eerste kerkkantoor, waar die meeste van die gemeente se beplanning plaasvind, is in 1980 betrek en die tweede in 1986, by Hoffmanstraat 18. Van 1979 tot vandag hou die gemeente eredienste in die Sanlam-ouditorium. In 2007 is ’n gemeentesentrum (sonder ’n kerkgebou) by Hoffmanstraat 28 ingerig. Dit was eers prof. Cassie Venter, hoogleraar aan die plaaslike teologiese skool van 1985 tot 2005, se huis. Die predikante en sekretaresse se kantore is hier asook ’n koffiekroeg, braaigeriewe, ’n onthaalvertrek en vergaderplek.

Terwyl die meeste Gereformeerde kerke se lidmaattal wissel na gelang van bevolkingsveranderings binne sy gemeentegrense, is Cachet se lidmaattal net afhanklik van die getal Gereformeerde studente aan die Noordwes-Universiteit se Potchefstroomkampus wat by die gemeente wil inskakel, want sy lidmate sluit alle koshuise en woonhuise van die Pukke in asook studente wat op die dorp woon. Spesiale voorsiening word gemaak vir Tswanasprekende studente en ’n Tswanasprekende wyk wat bedien word deur ’n Tswanasprekende hulppredikant. Cachet het einde 1997 415 belydende en 35 dooplidmate gehad, einde 2014 was dit onderskeidelik 807 en 78 en ’n jaar later 738 en 75.

Predikante[wysig | wysig bron]

  1. Victor Edouard d'Assonville, 1971 – 1974
  2. De Klerk, dr. Barend Jacobus, 1975 – 1981
  3. Van der Walt, dr. Sarel Jacobus, 1978 – 2003
  4. Schalekamp, dr. McDonald Etienne, 1981 – 1987
  5. Vogel, Willem, 2004 – 28 Junie 2016 (oorlede in die amp ná 'n operasie)
  6. Bain, Ronald Alexander, 2007 – hede

Bronne[wysig | wysig bron]