Olimpiese Somerspele 2012

in Wikipedia, die vrye ensiklopedie
Spring na: navigasie, soek
Spele van die XXXe Olimpiade
Olimpiesespele van 2012

Gehou in Londen, Verenigde Koninkryk
Deelnemende lande 204
Deelnemende atlete 10 820
Items 302 in 26 sporte
Openingseremonie 27 Julie 2012
Sluitingseremonie 12 Augustus 2012
Amptelik geopen deur Koningin Elizabeth II
Atlete-eed Sarah Stevenson
Beampte-eed Mik Basi
Olimpiese vlam Callum Airlie
Jordan Duckitt
Desiree Henry
Katie Kirk
Cameron MacRitchie
Aidan Reynolds
Adelle Tracey
Vorige Spele 2008: Beijing (Sjina)
Volgende Spele 2016: Rio de Janeiro (Brasilië)

Die Olimpiese Somerspele van die XXXde Olimpiade is van 27 Julie tot en met 12 Augustus 2012 in Londen, die hoofstad van die Verenigde Koninkryk, aangebied. Dit was die dertigste aanbieding van die Somerspele sedert 1896. Dit was ook die derde keer dat Londen die spele georganiseer het na hulle eerste spele in 1908 en daarna in 1948. Tydens die geleentheid het 10 500 atlete aan 302 items in 26 verskillende sportsoorte deelgeneem. Danksy die insluiting van vroueboks was daar vir die eerste keer in alle sporte vroulike deelnemers.

Die opening- en sluitingseremonies het in die Olimpiese Stadion plaasgevind. Soos gebruiklik het die lande in alfabetiese volgorde die stadion ingestap. Caster Semenya, atleet en Wêreldkampioen tydens die Atletiekwêreldbeker in 2009, het die Suid-Afrikaanse vlag ingedra.

Die 2012 Paralimpiese Spele is van 29 Augustus tot en met 9 September in Londen gehou.

Toewysing[wysig]

Sebastian Coe, hoof van Londen se bod-komitee.

Londen is op 6 Julie 2005 in Singapoer deur die IOK gekies as die gasheer vir die Olimpiese Spele in 2012. Ander kandidate was: Parys, New York, Madrid en Moskou. In die eerste ronde het Moskou uitgeval, in die tweede ronde New York, in die derde ronde Madrid, en uiteindelik ook Parys.

Die stemming het as volg verloop:

Stemming vir gasheer van die 2012-Olimpiese Somerspele
Stad 1ste ronde 2de ronde 3de ronde 4de ronde
Vlag van Verenigde Koninkryk Londen 22 27 39 54
Vlag van Frankryk Parys 21 25 33 50
Vlag van Spanje Madrid 20 32 31
Vlag van Verenigde State New York Stad 19 16
Vlag van Rusland Moskou 15

Akkommodasie[wysig]

Wembley-stadion, waar die sokkerwedstryde plaasgevind het

Terwyl die beplande besteding aan die Spele in sommige kringe kritiek uitgelok het, het ander die herontwikkeling van baie stadsdele in Londen, waar Olimpiese wedstryde sal plaasvind, verwelkom - veral omdat die meeste infrastruktuurprojekte volgens die konsep van volhoubaarheid verwesenlik is.[1] Byna 90 persent van alle nuwe geriewe en die benodigde infrastruktuur was reeds in Julie 2011 voltooi - een jaar voor die begin van die Spele en sonder dat die beplande begroting oorskry is.[2] Die laaste skatting van die totale koste in 2007 was egter aansienlik hoër as die oorspronklike beplande begroting.

Die hooffokus van die Spele was nuwe Olimpiese Park met 'n oppervlakte van 200 hektaar wat op 'n voormalige nywerheidsterrein in Stratford oos van Londen ontstaan het. Vir die Spele is ook verskeie sportgeriewe gebruik wat reeds voor en onafhanklik van Londen se kandidatuur bestaan het.

Akkommodasie Funksie
Olympic Park Die hoofligging van die Spele geleë in Stratford met 'n aantal nuwe sportsentra, die Olimpiese dorp en die sentrale Olimpiese Stadion. Die openbare vervoernetwerk rondom die naasliggende Stratford-stasie, is uitgebreid om die groot aantal reisigers effektief te kan vervoer.
Olimpiese Stadion Hoofligging waar die begin- en eindseremonie opgevoer en veldatletiek beoefen is.
Basketball Arena Basketbal en handbal (eindstryde en halfeindstryde)
Copper Box Handbal, moderne vyfkamp, skerm en skyfskiet
London Aquatics Centre Duik, gesinchroniseerde swem, swem en die eindstryd van die waterpolo
London Velopark BMX en Baanfiets
Olympic Hockey Centre Hokkie
Earls Court Vlugbal
ExCeL Exhibition Centre Boks, gewigoptel, judo, skerm, taekwondo, tafeltennis en stoei
Greenwich Park Ruitersport (dressuur, eventing en springconcours)
Hadleigh Country Park Bergfiets
Horse Guards Parade Vlugbal (strand)
Hyde Park Driekamp, swem (oopwater)
Lord's Krieketgronde Boogskiet
Regent's Park Padfietswedrenne
Royal Artillery Barracks Skyfskiet
The O2 Arena Basketbal (eindstryde) en gimnastiek
Wimbledon Tennis
Wembley-stadion Sokker (eindstryde)
Wembley Arena Pluimbal
Lee Valley White Water Centre Kanovaart (slalom)
Dorney Lake van Eton Kollege Kanovaart (sprint), Roei
Die Kanaal by Weymouth Seiljag

Die "Olympic Park" is ná afloop van die Spele, in 2013, na koningin Elizabeth vernoem en staan nou bekend as Queen Elizabeth Olympic Park.[3]

Vervoer[wysig]

'n Olympic Javelin-pendeltrein in St. Pancras-stasie

Die uitbreiding van Londen se openbare vervoerstelsel was 'n belangrike element van Londen se kandidaatskap. Transport for London (TfL) het met die oog op die Olimpiese Spele 'n verskeidenheid verbeterings aan die vervoerinfrastruktuur aangebring, waaronder die verlenging van die East London Line, wat deel uitmaak van die bogrondse spoornetwerk, asook die uitbou van die Docklands Light Railway en die North London Line. Op die hoëspoed-spoorweglyn High Speed One sal 'n pendeldiens bedryf word wat as Olympic Javelin bekend staan. Volgens Network Rail sal tydens die Olimpiade 4 000 bykomende treinverbindings asook langer treinstelle beskikbaar gestel word.

Sowat 240 000 besoekers per uur sal na die twee nuwe treinstasies in die Olimpiese Park, Stratford International en Stratford, vervoer kan word. Ook alle ander wedstrydplekke word deur spoorvervoer (treine, moltreine en Docklands Light Railway) met ander stadsdele verbind. 'n Sweefspoor tussen die O2 Arena en die ExCel Exhibition Centre, die Emirates Air Line, is op 28 Junie 2012 in bedryf gestel.

Die meeste wedstrydplekke is binne kort ryafstande geleë. Reistye na wedstryde sal vir 80 persent van alle atlete minder as 20 minute beloop, en 93 persent van deelnemers sal hul oefenterreine in minder as 'n halfuur kan bereik. Ook padvervoer sal vir deelnemers en amptelike verteenwoordigers vergemaklik word - 'n Olympic Route Network met 'n totale lengte van 170 km sal geskep word waarvolgens rylane op belangrike hoofroetes tussen die Olimpiese dorp en wedstrydplekke vir Olimpiade-deelnemers gereserveer word.

Veiligheid[wysig]

'n Rapier-vuurpyllanseerder

Die streng veiligheidsmaatreëls, wat deur die Britse polisiediens getref word en waarvoor 10 000 polisiebeamptes en 13 500 weermaglede ontplooi word, is as die grootste vredestydse veiligheidsoperasie in die Britse geskiedenis beskryf.[4] Vloot- en lugmageenhede word ter beskerming van die Spele aangewend, en terwyl vlootskepe in die Teemsrivier gestasioneer is, is Eurofighter-vegvliegtuie, helikopters en lugafweermissiele (waaronder Rapier-vuurpyllanseerders) ontplooi om moontlike lugaanvalle af te weer.

Vanaf 14 Julie is 'n gedeeltelike lug-spersone oor Londen ingestel. Die amfibiese aanvalskip HMS Ocean, wat in die Teems voor anker lê, het as helikopter-landingsblad, logistiese basis en verblyfplek vir 800 soldate gedien. Die koste vir hierdie veiligheidsoperasie het van 'n oorspronklik beraamde £282 miljoen gestyg tot £553 miljoen.

In Julie 2012 het nuus oor die probleme, wat die privaat veiligheidsmaatskappy G4S by die werwing van geskikte personeel ondervind het, bekend geword. Die leemte moes met 3 500 Britse weermaglede gevul word.

Medaljes[wysig]

Vir die Spele is sowat 4 700 medaljes deur die Koninklike Munt te Llantrisant in Wallis vervaardig. Hulle is deur David Watkins (Olimpiese Spele) en Lin Cheung (Paralimpiese Spele) ontwerp. Feitlik alle goud, silwer en koper wat in die vervaardiging gebruik is, is in Salt Lake County in die Verenigde State ontgin.

Elke medalje weeg tussen 375 en 400 gram (13,2-14,1 ons), het 'n deursnee van 85 mm (3,34 duim) en is 7 mm (0,27 duim) dik. 'n Gravure op die rand verwys na die betrokke sport en dissipline. Volgens 'n ou tradisie is Nike, die Griekse godin van oorwinning, op die voorkant uitgebeeld. Sy stap uit die Atheense Panathinaiko-stadion, waar die eerste moderne Olimpiese Spele in 1896 gehou is, met die Parthenon-tempel in die agtergrond. Die agterkant toon die kenteken van die Spele, die Teemsrivier en 'n reeks lyne wat "die energie van atlete en 'n saamstaan-gees" versinnebeeld. Die medaljes is op 2 Julie na die Tower of London se gewelwe geneem waar hulle tot die begin van die Spele bewaar is.

Elke goue medalje is uit 'n legering van 92,5 persent silwer, 1,34 persent goud asook koper saamgestel. Die silwermedaljes is van silwer (92,5 persent) en koper gemaak. Die bronsmedaljes is uit 'n legering van koper (97 persent), sink (2,5 persent) en tin (0,5 persent) saamgestel. Die goue medalje se materiële waarde word op $644 beraam (volgens markpryse wat op 30 Julie 2012 vasgestel is), dié van die silwermedalje op $330 en dié van die bronsmedalje op $4,71.

Simboliek[wysig]

Kenteken[wysig]

Die Londense Tower Bridge met die Olimpiese ringe

Die Olimpiese Spele se kenteken is deur die konsultasieonderneming Wolff Olins ontwerp en op 4 Junie 2007 aan die publiek bekend gestel. Die kenteken, wat teen 'n koste van £400 000 ontwikkel is en op glasskerwe lyk, is 'n abstrakte weergawe van die jaargetal 2012 waarby die Olimpiese ringe in die nul-syfer en die woord London in die syfer 2 bo-aan ingebed is. Hierdie kenteken sal met klein wysigings ook vir die Paralimpiese Spele 2012 gebruik word. Die standaardkleure is groen, magenta, oranje en blou, maar enige ander kleurkombinasie kon ook gebruik word sodat borge die kenteken maklik aan hul spesifieke behoeftes kon aanpas.[5]

Kort na sy bekendstelling het die kenteken negatiewe reaksies by die publiek uitgelok. Binne enkele ure het tienduisende Britte 'n petisie onderteken waarin beswaardes die organiseerders versoek het om 'n nuwe kenteken te ontwerp. 'n Aantal dagblaaie het hul eie kompetisies gehou waartydens lesers hul ontwerpe kon indien.

In Februarie 2011 het ook Iran se Nasionale Olimpiese Komitee beswaar teen die kenteken aangeteken wat volgens hulle baie op die woord "Zion" sou lyk en dus as rassisties beskou kon word.[6]

Gelukbringers[wysig]

Wenlock en Mandeville

Wenlock en Mandeville is as amptelike gelukbringers vir die Olimpiese en die Paralimpiese Spele gekies. Die twee figuurtjies is op 19 Mei 2010 aan die publiek bekend gestel.

Wenlock en Mandeville beeld twee staaldruppels in 'n menslike gedaante uit en word met die staalbedryf in Bolton in Groter Manchester verbind. Hul name gaan terug op die klein nedersetting Much Wenlock in die graafskap Shropshire naby die Walliese grens, waar reeds in 1850 die Wenlock Olympian Society Annual Games as voorloper van die moderne Olimpiese Spele gehou is, en Stoke Mandeville, 'n nedersetting in Buckinghamshire wat as gasheer van die eerste Paralimpiese Spele opgetree het.[7]

Die skrywer Michael Morpurgo het 'n storiekonsep vir Wenlock en Mandeville geskryf, en 'n animasierolprent is vervaardig. Twee verhale oor die twee gelukbringers is geskep: Out of a Rainbow en Adventures on a Rainbow.

Olimpiese fakkelloop[wysig]

Die Olimpiese fakkel in Cardiff, Wallis

Die Olimpiese fakkelloop het vanaf 18 Mei tot en met 27 Julie 2012 in die Verenigde Koninkryk plaasgevind. Nadat die Olimpiese vlam op 10 Mei tradisioneel in Olimpia, Griekeland aangesteek is, is dit tussen 10 en 17 Mei tydens 'n fakkelloop oor 'n afstand van sowat 3000 kilometer deur Griekeland gedra en het op die volgende in Land's End, die mees suidelike punt van Engeland in Cornwall, aangekom. Die vlam is van hier deur altesaam 8000 lopers langs 70 roetes en oor 'n afstand van 12 800 km deur die hele land gedra.

By die fakkelloop is eilandgroepe langs die kus soos die Kanaaleilande, die eiland Man, die Orkney-eilande, die Shetland-eilande en die Hebride-eilande ingesluit, so ook die Ierse hoofstad Dublin. 'n Aantal kulturele aanbiedings is ter geleentheid van die Olimpiese fakkelloop gehou.

Vir die fakkelloop is 8000 fakkels vervaardig wat uit 'n aluminium-legering bestaan het en met goud oortrek is. Hulle was 80 sentimeter lank en 800 gram swaar. Elke fakkel is met 8000 klein gaatjies geperforeer wat die fakkeldraers versinnebeeld het. Kort nadat die fakkel-ontwerp op 8 Junie 2011 aan die publiek bekend gestel is, het dit ironiese kommentaar uitgelok en die bynaam Golden Cheesegrater ("Goue Kaasrasper") gekry.

Die organisasiekomitee was egter onseker oor die betroubaarheid van die fakkels. Die Britse filiaal van die Duitse motorvervaardiger BMW, een van die amptelike borge van die Olimpiese Somerspele 2012, het aangebied om die fakkel-ontwerp in hul klimaatkanaal te toets. Die fakkels is hierby aan 'n verskeidenheid weerstoestande blootgestel, waaronder reën, sneeu, koue en hitte.

Sedert die eerste Olimpiese fakkelloop in 1936 in Berlyn is al 'n verskeidenheid brandstowwe getoets, waaronder magnesium, kruit, hars en olyfolie. Vir die Londense Spele is gaspatrone gebruik, maar die toetse deur BMW-ingenieurs het getoon dat die brander te swak was vir tipiese Engelse wind en reënweer. Die ontwerp is dus aangepas. Na bewering is die Olimpiese vlam nogtans twee keer op sy pad geblus - onder meer terwyl dit per renboot vervoer is: BMW se toetse het nie voorsiening vir hierdie uiterste blootstelling aan sterk seewind gemaak nie aangesien die ingenieurs nie daaroor ingelig is nie.[8]

Uitsaaidienste[wysig]

Die Internasionale Uitsaaisentrum in Junie 2011

Olympic Broadcasting Services (OBS), 'n agentskap van die Internasionale Olimpiese Komitee (IOK), het as gasheer-uitsaaidiens opgetree. OBS het van sy eie kamera's en van gehuurde personeel van ander Olimpiese uitsaaiers gebruik gemaak om die Spele te dek. Basiese video- en oudio is aan ander uitsaaiers verkoop wat dan hul eie kommentaar en aanbieding by te voeg.

Die amptelike opnameformaat van die Olimpiese Somerspele 2012 het gebruik gemaak van Panasonic se digitale tegnologieë waarby die amptelike videodekking, wat deur die Internasionale Uitsaaisentrum, die London Olympics Media Centre, vervaardig en versprei is, in 1080/50i hoëdefinisie (HD) aangebied is. Panasonic het vooraf bekend gemaak dat DVCPRO HD die amptelike opnameformaat sou wees.

Olympic Broadcasting Services London (OBSL), die gasheer-uitsaaier, het P2-HD-uitrusting gebruik vir die beeldsaai van Olimpiese wedstryde. Volgens die IOK se wens is die Spele vir wêreldwye gehore met terrestriële nasionale en streekgebonde uitsaaidienste gedek. In die gasheerland is die Olimpiese Spele deur die British Broadcasting Corporation (BBC) gebeeldsaai, terwyl Channel 4 die Paralimpiese Spele 2012 sal uitsaai. Die BBC het alle 5 000 ure se wedstryde op verskeie kanale uitgesaai. Naas uitgebreide dekking op BBC Three was altesaam 24 Olimpiese BBC-kanale beskikbaar wat deur Britse toeskouers per satelliet, kabel en die internet ontvang kon word.

Televisie-uitsaairegte vir die VSA is aan die NBC-netwerk verkoop en het meer as die helfte van die IOK se inkomste uit uitsaairegte verteenwoordig. YouTube het die Spele in 64 gebiede in Asië en Afrika suid van die Sahara gebeeldsaai waar geen amptelike uitsaaier verkies is nie. Alle uitsaaidienste, wat regte verkry het, het hulle dekking vanuit die Internasionale Uitsaaisentrum gebeeldsaai wat binne die Olimpiese Park se veiligheidskordon geleë was.

Seremonies[wysig]

Openingseremonie[wysig]

Die openingseremonie

Die openingseremonie het op 27 Julie 2012 in die Olimpiese Stadion plaasgevind. Die skouspel van £27 miljoen is deur William Shakespeare se toneelstuk The Tempest ("Die Storm") geïnspireer en onder die titel The Isles of Wonder as 'n wipwa-rit deur die Britse geskiedenis aangebied.[9] Die vervaardiger en kunsdirekteur was die rolprentregisseur en Oscar-wenner Danny Boyle, terwyl twee lede van die elektroniese musiekgroep Underworld, Rick Smith en Karl Hyde, as musiekdirekteur gefungeer het. Engelse vermaaklikheidsterre en sporthelde het hul verskyning gemaak.

Die eerste deel van die openingseremonie was aan die ekonomiese en maatskaplike ontwikkeling van die Verenigde Koninkryk gewy en het die tradisionele landelike lewe, die nywerheidsomwenteling en die 1960's behandel. 'n Verruklike landskap, waarvoor die heuwelpiek Glastonbury Tor as voorbeeld gedien het, is gaandeweg deur fabrieke, rokende skoorstene en stomende enjins verdring. Boere is deur 'n stedelike bevolking vervang. Werkers het 'n Olimpiese ring gesmee, terwyl betogers opgeruk het.

In 'n kort humoristiese film het die akteur Daniel Craig as James Bond saam met koningin Elizabeth II in 'n helikopter gevlieg. Die koningin het daarna in lewende lywe in die stadion verskyn.

In die tweede deel van die seremonie is die Verenigde Koninkryk as 'n kultuurnasie uitgebeeld. Belangrike elemente was Engelse kinderliteratuur, Rowan Atkinson as Mr. Bean, die Britse alledaagse kultuur en popmusiek asook die maatskaplike veranderinge wat aan die wêreldwye web te danke is.

Daarna het meer as tweehonderd lande se atlete die stadion binnegemarsjeer. Die vlae van deelnemerstate is op die terrasse van die namaaksel van Glastonbury Tor geplaas. Die amptelike deel van die seremonie het toesprake, die opening van die Spele deur die koningin en die hys van die Olimpiese Vlag ingesluit. Sewe jong Britse atlete het die Olimpiese Vlam aangesteek. Paul McCartney het die seremonie met twee liedere afgesluit.

Sluitingseremonie[wysig]

Die sluitingseremonie

Die sluitingseremonie van die Olimpiese Somerspele 2012 in Londen het op 12 Augustus 2012 in die Olimpiese Stadion plaasgevind. Dit was getiteld A Symphony of British Music. Die kreatiewe direkteur en choreograaf was Kim Gavin, Es Devlin was die hoofontwerper, en David Arnold het as musiekdirekteur gefungeer. Die beligting is deur Patrick Woodroffe gereël, terwyl die toneel- en rolprentregisseur Stephen Daltry weer as vervaardiger opgetree het.

Sowat 4 100 akteurs het opgetree, waaronder 3 500 volwassenes en 380 skoolkinders uit die ses Londense gasheerdistrikte as leke-akteurs, en 250 professionele akteurs. Vir die leke-akteurs is vyftien oefensessies in die Three Mills-ateljees asook 'n repetisie in die Ford-motorfabriek in Dagenham, waar 'n skaalmodel-oefensaal gebou is, gereël.

Die plegtige oorhandiging van die Olimpiese Vlag aan die gasheerstad van die volgende Olimpiese Somerspele 2016, Rio de Janeiro, was tradisioneel 'n vaste bestanddeel van die sluitingseremonie.

Finansiële en ekonomiese impak[wysig]

Die totale begroting vir die Olimpiese Spele in Londen was £9,3 miljard, waarvan £6,2 miljard deur die Britse regering en £2,1 miljard uit loteryfondse bygedra is. 'n Verdere £900 miljoen is deur die Londense Ontwikkelingsagentskap (London Development Agency) en die Greater London Authority beskikbaar gestel.

Daar is lewendige debatte oor die finansiële en ekonomiese impak van die Spele gevoer. Terwyl daar tydens die voorbereiding van die Olimpiade wél nuwe werkgeleenthede geskep is, het kleinhandelverkope in Julie en Augustus nie die verwagte styging getoon nie.[10] Weens waarskuwings oor erge verkeersopeenhopings het baie Londenaars die Spele tuis op televisie gekyk of met vakansie gegaan. Ook toeriste het weggebly. Hotelle, wat hul kamerpryse vooraf aansienlik verhoog het, het minder oornagtings geregistreer as wat voorspel is.

Sporte[wysig]

Ses-en-twintig Olimpiese sporte is tydens die Spele beoefen. Tydens die Spele is 302 medaljes oorhandig.

Atletiek
Pluimbal
Basketbal
Boks
Boogskiet
Gewigoptel
Gimnastiek
Artisties
Ritmies
Wipmat
Handbal
Hokkie
Judo
Kanovaart
Sprint
Slalom
Moderne vyfkamp
Ruitersport
Roei
Skerm
Skyfskiet
Tafeltennis
Taekwondo
Tennis
Driekamp
Sokker
Vlugbal
Strand
Saal
Fietsry
Baan
BMX
Bergfiets
Padfiets
Stoei
Seil
Swemsport
Duik
Gesinchroniseerde swem
Waterpolo
Swem

Kalender[wysig]

Die volgende tabel dui die Spele se daaglikse program aan. 'n Blou blokkie beteken dat wedstryde plaasgevind het, maar dat geen medaljes op die spel was nie. 'n Geel blokkie dui aan dat medaljes toegeken is, die getal dui op die aantal medaljeparades wat die dag gehou is.

 ●  Openingseremonie  ●  Wedstryde  ●  Wedstryde met medaljes  ●  Sluitingseremonie
Julie / Augustus 2012 Wo
25
Do
26
Vr
27
Sa
28
So
29
Ma
30
Di
31
Wo
1
Do
2
Vr
3
Sa
4
So
5
Ma
6
Di
7
Wo
8
Do
9
Vr
10
Sa
11
So
12
Tot.
Athletics pictogram.svg Atletiek 2 6 6 5 4 4 5 6 8 1 47
Badminton pictogram.svg Pluimbal 1 2 2 05
Basketball pictogram.svg Basketbal 1 1 02
Boxing pictogram.svg Boks 3 5 5 13
Olympic pictogram Archery.png Boogskiet 1 1 1 1 04
Weightlifting pictogram.svg Gewigoptel 1 2 2 2 2 2 1 1 1 1 15
Gymnastics (artistic) pictogram.svg Gimnastiek 1 1 1 1 1 1 3 3 4 1 1 18
Handball pictogram.svg Handbal 1 1 02
Field hockey pictogram.svg Hokkie 1 1 02
Judo pictogram.svg Judo 2 2 2 2 2 2 2 14
Canoeing (flatwater) pictogram.svg Kanovaart 1 1 2 4 4 4 16
Modern pentathlon pictogram.svg Moderne vyfkamp 1 1 02
Equestrian pictogram.svg Ruitersport 2 1 1 1 1 06
Rowing pictogram.svg Roei 3 3 4 4 14
Fencing pictogram.svg Skerm 1 1 1 1 2 1 1 1 1 10
Shooting pictogram.svg Skyfskiet 2 2 1 1 1 1 2 2 1 2 15
Diving pictogram.svg Duik 1 1 1 1 1 1 1 1 08
Synchronized swimming pictogram.svg Gesinchroniseerde swem 1 1 02
Taekwondo pictogram.svg Taekwondo 2 2 2 2 08
Table tennis pictogram.svg Tafeltennis 1 1 1 1 04
Tennis pictogram.svg Tennis 2 3 05
Triathlon pictogram.svg Driekamp 1 1 02
Football pictogram.svg Sokker 1 1 02
Volleyball (indoor) pictogram.svg Vlugbal 1 1 1 1 04
Water polo pictogram.svg Waterpolo 1 1 02
Cycling (road) pictogram.svg Fietsry 1 1 2 2 2 1 1 1 3 2 1 1 18
Wrestling pictogram.svg Stoei 2 3 2 2 2 2 3 2 18
Sailing pictogram.svg Seil 2 2 2 1 1 1 1 10
Swimming pictogram.svg Swem 4 4 4 4 4 4 4 4 1 1 34
Totaal 12 14 12 15 20 18 22 25 23 18 21 16 23 16 32 15 302
Kumulatief 12 26 38 53 73 91 113 138 161 179 200 216 239 255 287 302
Seremonies
Julie / Augustus 2012 Wo
25
Do
26
Vr
27
Sa
28
So
29
Ma
30
Di
31
Wo
1
Do
2
Vr
3
Sa
4
So
5
Ma
6
Di
7
Wo
8
Do
9
Vr
10
Sa
11
So
12
Tot.

Aantal medaljes[wysig]

Hier is die top tien lande wat medaljes tydens die Spele verower het. Vir 'n volledige lys, sien Olimpiese Somerspele 2012 medaljes.

Kaart van medaljes volgens lande:
Goud vertoon lande, wat ten minste een goue medalje gewen het.
Silwer vertoon lande, wat ten minste een silwer medalje gewen het.
Brons vertoon lande, wat ten minste een brons medalje gewen het.
Blou vertoon lande, wat geen medaljes gewen het nie.
Rooi vertoon lande, wat nie aan die Olimpiese Somerspele 2012 deelgeneem het nie.
 Plek  Land  Deelnemers Goud Goud Silwer Silwer Brons Brons Totaal
1 Vlag van Verenigde State Verenigde State 530 46 29 29 104
2 Vlag van die Volksrepubliek van Sjina Volksrepubliek van Sjina 380 38 27 22 87
3 Vlag van Verenigde Koninkryk Verenigde Koninkryk 542 29 17 19 65
4 Vlag van Rusland Rusland 436 24 25 33 82
5 Vlag van Suid-Korea Suid-Korea 245 13 8 7 28
6 Vlag van Duitsland Duitsland 391 11 19 14 44
7 Vlag van Frankryk Frankryk 331 11 11 12 34
8 Vlag van Italië Italië 284 8 9 11 28
9 Vlag van Hongarye Hongarye 158 8 4 5 17
10 Vlag van Australië Australië 410 7 16 12 35
24 Vlag van Suid-Afrika Suid-Afrika 125 3 2 1 6

Suid-Afrikaanse deelname[wysig]

Caster Semenya, nadat sy die silwer medalje in die 800 meter-naellope gewen het.

Suid-Afrika het in totaal 3 goue, 2 silwer- en 1 bronsmedalje gewen:

  • Suid-Afrika se Cameron van der Burgh het 'n goue medalje in die 100 m-borsslag vir mans met 'n nuwe wêreldrekord van 58.46 sekondes gewen.
  • Chad le Clos van Suid-Afrika het 'n goue medalje in 200 m-vlinderslag met 'n tyd van 1:52,96 sekondes gewen. Hy het Michael Phelps van die VSA uitgestof wat met 'n tweede plek tevrede moes wees. In die 200 m-wisselslag het hy tweede geëindig en 'n silwer medalje ontvang.
  • Suid-Afrika se liggewig-roeiers het 'n onverwagte goue medalje gewen. Brittanje moes met silwer tevrede wees en Denemarke in die derde plek met 'n brons medalje. Die spanlede was: Matthew Brittain, Sizwe Ndlovu, John Smith en James Thompson.
  • Bridgitte Hartley het 'n bronsmedalje in die eindstryd van die 500 meter-kanowedvaart (K1) vir vroue gewen.
  • Caster Semenya het silwer in die 800 meter-naellope gewen.

Deelnemende nasies[wysig]

Hier volg 'n alfabetiese lys van al die Nasionale Olimpiese Komitees wat deelgeneem het. Waar beskikbaar word die aantal atlete per land in hakies aangedui:


Verwysings[wysig]

Eksterne skakels[wysig]

Commons-logo.svg
Wikimedia Commons het meer media verwant aan:


Olimpiese Spele Logo van die Olimpiese Spele

Olimpiese Somerspele: 1896 · 1900 · 1904 · 1906* · 1908 · 1912 · 1916 · 1920 · 1924 · 1928 · 1932 · 1936 · 1940 · 1944 · 1948 · 1952 · 1956 · 1960 · 1964 · 1968 · 1972 · 1976 · 1980 · 1984 · 1988 · 1992 · 1996 · 2000 · 2004 · 2008 · 2012 · 2016 · 2020

Olimpiese Winterspele: 1924 · 1928 · 1932 · 1936 · 1940 · 1944 · 1948 · 1952 · 1956 · 1960 · 1964 · 1968 · 1972 · 1976 · 1980 · 1984 · 1988 · 1992 · 1994 · 1998 · 2002 · 2006 · 2010 · 2014 · 2018 · 2022
Internasionale Olimpiese Komitee - Nasionale Olimpiese Komitee
(*) Die spele van 1906 is deur die IOK georganiseer, maar word nie amptelik deur die IOK erken nie.